សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ព្រឹកនេះជាថ្ងៃប្រកាសសាលដីកាចុងក្រោយរបស់សាលាក្តីខ្មែរក្រហមទៅលើលោក ខៀវ សំផន វ័យ៩១ឆ្នាំ អតីតប្រមុខរដ្ឋនៃរបបកម្ពុជាប្រជាធិបតេយ្យពីឆ្នាំ១៩៧៥ ដល់១៩៧៩។
លោក ខៀវ សំផន ស្ថិតក្នុងចំណោមមនុស្ស៥នាក់ដែលត្រូវបានចោទប្រកាន់ដោយតុលាការកូនកាត់ដែលមានចៅក្រមកម្ពុជានិងអន្តរជាតិ។ បួននាក់ទៀតបានស្លាប់ជាបន្តបន្ទាប់មុនពេលដែលតុលាការត្រូវបិទបញ្ចប់នៅថ្ងៃនេះ។
លោក ខៀវ សំផន ត្រូវបានកាត់ទោសឱ្យជាប់ពន្ធនាគារអស់មួយជីវិតម្តងរួចទៅហើយកាលពីឆ្នាំ២០១៤ ពីបទឧក្រិដ្ឋកម្មប្រឆាំងមនុស្សជាតិ និងប្រល័យពូជសាសន៍។ ជនជាប់ចោទបានប្តឹងឧទ្ធរណ៍ចំពោះសេចក្តីសម្រេចនេះ ដោយអះអាងថាមិនមានកំហុសដូចការចោទប្រកាន់ដោយសារគាត់មានតែឈ្មោះនិងតួនាទី តែមិនមានអំណាចទេ។
សាលាក្តីខ្មែរក្រហមបានត្របាក់អស់ថវិការជិត៣៤០លានដុល្លារក្នុងដំណើរការរបស់ខ្លួនអស់រយៈពេល១៦ឆ្នាំរាប់ចាប់ពីឆ្នាំ២០០៦មក។
បួននាក់ទៀតជានរណា?
នួន ជា ជាបងធំទី២ត្រូវបានកាត់ទោសរួមគ្នាជាមួយលោក ខៀវ សំផន ឱ្យជាប់ទោសមួយជីវិតក្នុងឆ្នាំ២០១៤ ហើយគាត់បានស្លាប់នៅឆ្នាំ២០១៩។ ឥស្សរជនខ្មែរក្រហមទីបីដែលតុលាការកាត់ទោសគឺ កាំង ហ្កេកអ៊ាវ ហៅ ឌុច ដែលជាប្រធានគុកទួលស្លែងដ៏ល្បីឈ្មោះ។ គាត់បានស្លាប់នៅក្នុងពន្ធនាគារក្នុងឆ្នាំ២០២០។ លោក អៀង សារី អតីតរដ្ឋមន្ត្រីការបរទេស និងភរិយាលោកស្រី អៀង ធីរិទ្ធ ដែលជារដ្ឋមន្ត្រីក្រសួងសង្គមកិច្ច ក៏បានទទួលមរណភាពខណៈដំណើរការនីតិវិធីកំពុងដំណើរការ។
សាលដីការចុងក្រោយនៅថ្ងៃនេះនឹងនាំដល់ការជជែកវែកញែកថា តើរយៈពេល៤៣ឆ្នាំទម្រាំបិទបញ្ចប់សំណុំរឿងខ្មែរក្រហមសមល្មមដែរឬទេ? តើយុត្តិធម៌បានផ្តល់ដល់ជនរងគ្រោះហើយឬនៅ? តើអ្វីជាប្រយោជន៍សម្រាប់ជាតិនិងប្រជាជនកម្ពុជា ចេញពីសាលដីការនេះ? តើការប្រឹងប្រែងរបស់រាជរដ្ឋាភិបាលកម្ពុជានិងអង្គការសហប្រជាជាតិបានអ្វីមកវិញសម្រាប់ពិភពលោក ជាពិសេសសម្រាប់មេដឹកនាំ? ៕
ដោយ ៖ លោក ពុយ គា
