សារព័ត៌មាន នគរវត្ត តែងតែនាំមុខគេជានិច្ច
ក្នុងរយៈពេល៩ខែ ឆ្នាំ២០២៦នេះ អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ បានយកចិត្តទុកដាក់ក្នុងការស្រាវជ្រាវ ស៊ើបអង្កេត និងបង្ក្រាបជនបរទេសដែលប្រព្រឹត្តល្មើសច្បាប់ក្នុងព្រះរាជាណាចក្រកម្ពុជា ដោយបានឃាត់ខ្លួន និងរៀបចំតាមនីតិវិធីបណ្ដេញចេញពីព្រះរាជាណាចក្រកម្ពុជា សរុបចំនួន ៣.១០៤លើក មនុស្សចំនួន ៥២.០៣៩នាក់ មកពី ៨៧សញ្ជាតិ។ ចំនួននេះ បើធៀបនឹងរយៈពេលដូចគ្នានៃឆ្នាំ២០២៥ កើនឡើងចំនួន ៤១.៦៨៥នាក់ ស្មើនឹង ៤០២,៥៩ភាគរយ។ នេះបើតាមរបាយការណ៍របស់អគ្គនាយកដ្ឋានអន្តោប្រវេសន៍ ផ្ដល់មកកាន់ក្រុមអ្នកនាំពាក្យក្រសួងមហាផ្ទៃ។
របាយការណ៍បានឱ្យដឹងថា ក្នុងចំណោមជនបរទេសទាំងនោះ រួមមាន ជនជាតិចិនចំនួន ២២.៩២៦នាក់ ឥណ្ឌូនេស៊ី ៨.១៦៦នាក់ វៀតណាម ៤.០៩៦នាក់ បង់ក្លាដែស ៣.០៥១នាក់ ប៉ាគីស្ថាន ២.៥២២នាក់ មីយ៉ាន់ម៉ា ១.៩៥២នាក់ ថៃ ១.៥៤៦នាក់ ឥណ្ឌា ១.៣៦០នាក់ យូហ្គង់ដា ១.១១១នាក់ ហ្វីលីពីន ៩៤៥នាក់ នេប៉ាល់ ៧៣៦នាក់ នីហ្សេរីយ៉ា ៦១៩នាក់ ចិនតៃវ៉ាន់ ៥២០នាក់ កេនយ៉ា ៣៦១នាក់ ម៉ាឡេស៊ី ៣៥៩នាក់ ហ្គាណា ៣៤៨នាក់ កូរ៉េខាងត្បូង ៣១០នាក់ កាមេរូន ១៧១នាក់ ស្រីលង្កា ១៥៣នាក់ ជប៉ុន ១០២នាក់ រ៉វ៉ាន់ដា ៩៦នាក់ ឡាវ ៦៦នាក់ និងអេត្យូពី ៦១នាក់។
ក្រៅពីនេះ រួមមាន ប្រទេសសេរ៉ាឡេអូន ៦០នាក់ លីបេរីយ៉ា ៥០នាក់ តូហ្គោ ៤២នាក់ ហ្ស៊ីមបាវេ ២៦នាក់ ប្រេស៊ីល ២៥នាក់ ប៊ូរុនឌី ២៥នាក់ អាហ្វ្រិកខាងត្បូង ២២នាក់ រុស្ស៊ី ១៨នាក់ ទួកគី ១៤នាក់ អាមេរិក ១២នាក់ អង់គ្លេស ១២នាក់ និង (៥៣សញ្ជាតិទៀត មានពី១ ដល់ ១០នាក់)។ ក្នុងចំណោមនោះ អគ្គនាយកដ្ឋានក៏ទទួលបានកិច្ចសហការយ៉ាងល្អពីតំណាងស្ថានទូតនានា ក្នុងដំណើរការបណ្តេញពលរដ្ឋរបស់ខ្លួនទៅកាន់ប្រទេសវិញផងដែរ។
ក្នុងចំណោមជនបរទេសប្រព្រឹត្តបទល្មើស ដែលត្រូវបានបណ្តេញចេញជាង ៥ម៉ឺននាក់នោះ មានពាក់ព័ន្ធនឹងបទល្មើសបច្ចេកវិទ្យា (Online Scams) ចំនួន ១៨.៣៨៩នាក់ មកពី ៣៨សញ្ជាតិ។ ដោយឡែក បើគិតចាប់ពីឆ្នាំ២០១៤ ដល់ថ្ងៃទី៣០ ខែកញ្ញា ឆ្នាំ២០២៦ កម្ពុជាបានបណ្តេញចេញជនបរទេសខុសច្បាប់សរុបចំនួន ១០០.៨០៦នាក់ មកពី ១១៣សញ្ជាតិ។
បើតាមរបាយការណ៍ដដែល ក្នុងរយៈពេល ៩ខែនេះ មានជនបរទេសចេញពីពន្ធនាគារក្រោយអនុវត្តទោសចប់ ចំនួន ២៨៦នាក់ (ស្រី ៤៣នាក់) មកពី ២១សញ្ជាតិ រួមមាន ជនជាតិចិន ១៤០នាក់ វៀតណាម ៨៩នាក់ ចិនតៃវ៉ាន់ ១៣នាក់ ម៉ាឡេស៊ី ៤នាក់ កូរ៉េខាងត្បូង ៤នាក់ ឥណ្ឌូនេស៊ី ៥នាក់ រុស្ស៊ី ៥នាក់ ឥណ្ឌា ៤នាក់ នេប៉ាល់ ៤នាក់ អង់គ្លេស ៣នាក់ ហ្វីលីពីន ២នាក់ អាល្លឺម៉ង់ ២នាក់ នីហ្សេរីយ៉ា ២នាក់ កាមេរូន ២នាក់ អៀរឡង់ ១នាក់ បែលហ្សិក ១នាក់ ញូស៍ឡេន ១នាក់ ស្រីលង្កា ១នាក់ ស៊ុយអែត ១នាក់ ថៃ ១នាក់ និងអ៊ុយក្រែន ១នាក់។
ក្រៅពីការអនុវត្តនីតិវិធីបណ្តេញចេញ របាយការណ៍ក៏បានបង្ហាញឱ្យដឹងផងដែរថា ក្នុងរយៈពេលដូចគ្នានេះ មានជនបរទេសរងគ្រោះ និងត្រូវបានសង្គ្រោះតាមបណ្ដឹងអនឡាញ ចំនួន ១៩០លើក ស្មើនឹងមនុស្សចំនួន ៤២៦នាក់ មកពី ១៣សញ្ជាតិ រួមមាន ចិន ៧៦នាក់ ហ្វីលីពីន ៧២នាក់ វៀតណាម ៦៥នាក់ ឥណ្ឌា ៦៤នាក់ ឥណ្ឌូនេស៊ី ៦១នាក់ មីយ៉ាន់ម៉ា ៣៧នាក់ ប៉ាគីស្ថាន ២១នាក់ ជប៉ុន ១១នាក់ កូរ៉េខាងត្បូង ១០នាក់ ម៉ាឡេស៊ី ៦នាក់ បង់ក្លាដែស ១នាក់ នេប៉ាល់ ១នាក់ និងចិនតៃវ៉ាន់ ១នាក់។ ដោយឡែក ចំពោះការសង្គ្រោះជនរងគ្រោះដោយអំពើចាប់ជម្រិត មានចំនួន ២២លើក មនុស្សចំនួន ៤៩នាក់ មកពី ៦សញ្ជាតិ រួមមាន វៀតណាម ២៧នាក់ ចិន ១៨នាក់ ជប៉ុន ១នាក់ នេប៉ាល់ ១នាក់ ហ្វីលីពីន ១នាក់ និងឥណ្ឌា ១នាក់៕
ដោយលោក សេង បូលីន
