សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តប្រភេទបែនដឹកខ្សាច់ មួយគ្រឿងដែលបើកបរដោយបុរសម្នាក់ បានដាច់ហ្វ្រ័ងហើយរេចង្កូតជ្រុលទៅបុករថយន្តចំនួន២គ្រឿងនិងផ្ទះរបស់ប្រជាពលរដ្ឋបណ្ដាលឱ្យរងការខូចខាតយ៉ាងដំណំ កាលពីវេលាម៉ោង១១និង៣០នាទីព្រឹក ថ្ងៃទី២ ខែតុលា ឆ្នាំ២០២២ នៅចំណុចភ្លើងស្តុបទំនប់ទឹកផ្លូវលេខ២៧១ សង្កាត់ទួលទំពូងទី២ ខណ្ឌចំការមន ។
បើតាមប្រភពព័ត៌មានពីកន្លែងកើតហេតុ បានឱ្យដឹងថា មុនពេលកេីតហេតុគេបានឃើញបុរសម្នាក់វ័យប្រហែលជាង២០ឆ្នាំ បេីករថយន្តប្រភេទបែនដឹកខ្សាច់ ពណ៌ស ម៉ាកនីស្សាន់ ពាក់ស្លាកលេខ ចង្កូតស្តាំ PP-3362 ធ្វើដំណើរតាមបណ្ដោយផ្លូវ លេខ២៧១ក្នុងទិសដៅពីត្បូងទៅជេីង លុះមកដល់ចំណុចកេីតហេតុក៏ស្រាប់តែជាន់ហ្រ្វ័ងមិនស៊ី ទេីបអ្នកបេីកបរបានបួងចង្កូតទៅខាងស្ដាំដៃឡើងលើចិញ្ចើមផ្លូវ ជ្រុលទៅបុករថយន្តឡង់គ្រីស័រ ពណ៌ស ពាក់ស្លាកលេខ ភ្នំពេញ 2AY-2526 ដែលចតនៅមុខផ្ទះរងការខូចខាតមួយចំហៀងខាងស្តាំ ហេីយរថយន្ដបង្កក៏បន្តទៅបុកផ្ទះគេបណ្តាលឱ្យរងខូចខាតបែកជញ្ជាំង និងទ្វាររូតអស់ចំនួន១ផ្ទាំងបន្ថែមទៀត។
ប្រភពដដែលបន្តទៀតថា បន្ទាប់ពីបុកផ្ទះគេហើយ រថយន្តបែនដឹកខ្សាច់នោះក៏រអិលថយក្រោយវិញជ្រុលទៅបុករថយន្ត ហាយឡេនឌ័រ ពណ៌ស្ករ ពាក់ស្លាកលេខ ស្វាយរៀង 2B-0062 ដែលបេីកស្របទិសគ្នាធ្វើឱ្យរងការខូចខាតក្រពឹតត្រគាកផ្នែកខាងក្រោយខាងស្តាំបន្ថែមទៀត តែក្នុងហេតុការណ៍នេះមិនបង្កឱ្យមានគ្រោះថ្នាក់ដល់ដល់មនុស្សនោះទេ ។ ហើយអ្នកបេីកបរក៏ត្រូវសមត្ថកិច្ចឃាត់ខ្លួនផងដែរ ។
បន្តិចក្រោយមកឃើញមានតំណាងខាងរថយន្តបង្កបែនដឹកខ្សាច់មកធ្វើការសម្របសម្រួលជាមួយភាគីរថយន្ដរងគ្រោះក៏ដូចជាម្ចាស់ផ្ទះ ក្នុងនោះភាគីរថយន្ដបែនដឹកខ្សាច់បានសងសំណងទៅខាងរថយន្តហាយឡេនឌ័រចំនួន២០០ដុល្លារបញ្ចប់រឿងមួយវគ្គ ។ ដោយនៅសល់តែរថយន្តឡង់គ្រីស័រ និងម្ចាស់ផ្ទះគឺទាមទារសំណងរហូតដល់១៥ពាន់ដុល្លារឯណោះ។
ក្រោយពេលកេីតហេតុ ដោយសារតែការដោះស្រាយគ្នាមិនត្រូវ រថយន្តទាំង២គ្រឿង រួមទាំងអ្នកបេីកបរក៏ត្រូវបានសមត្ថកិច្ចជំនាញចរាចរណ៍ចុះទៅធ្វើការវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយនៅពេលក្រោយជាបន្តទៀត ៕
ដោយ ៖ ភារ៉ា ដង្កោ
