រថយន្តបុកគ្នាជ្រុលទៅបុកម៉ូតូរងរបួសធ្ងន់ស្រាល២នាក់

ខេត្តកណ្ដាល៖ ប្តីប្រពន្ធ២នាក់បានរងរបួសធ្ងន់និងស្រាលដោយសារតែរថយន្តនិងរថយន្តបុកគ្នាពេញទំហឹង ហើយជ្រុលមកបុកម៉ូតូជនរងគ្រោះប្តីប្រពន្ធពីរនាក់ខាងលើនៅថ្ងៃទី៧ ខែតុលា ឆ្នាំ២០២២ វេលាម៉ោង០៦និង៤០នាទីព្រឹកនៅត្រង់ចំណុចខាងមុខក្រុមហ៊ុន CHIP MONG លើកំណាត់ផ្លូវជាតិលេខ២១ ស្ថិតនៅភូមិលេខ១ ”ក” សង្កាត់ស្វាយរលំ ក្រុងតាខ្មៅ ខេត្តកណ្ដាល ។

មន្ត្រីនគរបាលក្រុងតាខ្មៅបានឱ្យដឹងថា ជនរងគ្រោះឈ្មោះ កឹម ណាន់ ភេទប្រុស អាយុ៣៤ឆ្នាំ (របួសស្រាល) បើកម៉ូតូម៉ាកម៉ាក Pulsar ពណ៌ខ្មៅ ពាក់ស្លាកលេខ ភ្នំពេញ1CE-3697 និងប្រពន្ធរួមដំណើរពីក្រោយឈ្មោះ ឆែ ស្រីនិច  អាយុ២៦ឆ្នាំ(របួសធ្ងន់) ទាំងពីរនាក់ស្នាក់នៅក្នុងបុរីសិរីមង្គល ស្ថិតនៅភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្ដាល ។  ចំណែករថយន្តបង្កមាន២គ្រឿង ទី១۔រថយន្តម៉ាកSPRAYING WATER ប្រភេទ ស៊ីទែន ពណ៌ខៀវ ពាក់ស្លាកលេខ ភ្នំពេញ3E-7747 អ្នកបើកបរឈ្មោះ សៀង រិទ្ធ ភេទប្រុស អាយុ២៤ឆ្នាំ មានទីលំនៅភូមិដូងខ្ពស់ ឃុំបានកាម ស្រុកព្រៃកប្បាស ខេត្តតាកែវ (ឃាត់ខ្លួន) ទី២۔រថយន្តម៉ាក SANY ប្រភេទក្រឡុកស៊ីម៉ងត៍ ពណ៌ស ពាក់ស្លាកលេខ ភ្នំពេញ5A-0570 អ្នកបើកបរមិនទាន់ស្គាល់អត្តសញ្ញាណ (គេចខ្លួនបាត់មុនពេលសមត្ថកិច្ចទៅដល់)។

ប្រភពដដែលបន្តថា មុនពេលកើតហេតុ មានរថយន្តមួយគ្រឿងម៉ាក SPRAYING WATER ប្រភេទ ស៊ីទែន ពណ៌ខៀវ ពាក់ស្លាកលេខ ភ្នំពេញ3E-7747 អ្នកបើកបរឈ្មោះ សៀង រិទ្ធ ធ្វើដំណើរមានទិសដៅពីត្បូងទៅជើង ពេលមកដល់ចំណុចកើតហេតុខាងលើក៏បានបុកជាមួយរថយន្តម៉ាក SANY ជាប្រភេទក្រឡុកស៊ីម៉ងត៍ ពណ៌ស ពាក់ស្លាកលេខ ភ្នំពេញ5A-0570 រថយន្តបើកបរមានទិសដៅពីត្បូងទៅជើង  រួចបត់ឆ្វេង(ស្របទិសគ្នា) ហើយរថយន្តស៊ីទែនខាងលើបានជ្រុលទៅបុកពីក្រោយម៉ូតូមួយគ្រឿងទៀតម៉ាក Pulsar ពណ៌ខ្មៅ ពាក់ស្លាកលេខ ភ្នំពេញ1CE-3697 (ពាក់មួកសុវត្ថិភាព និងមានកញ្ចក់មើលក្រោយ) អ្នកបើកម៉ូតូឈ្មោះ កឹម ណាន់ ភេទប្រុស អាយុ ៣៤ឆ្នាំ (របួសស្រាល) និងប្រពន្ធរួមដំណើរពីក្រោយ ឈ្មោះឆែ ស្រីនិច អាយុ ២៦ឆ្នាំ(របួសធ្ងន់)  ម៉ូតូបើកបរមានទិសដៅពីត្បូងទៅជើង (ស្របទិសគ្នា) ។

ក្រោយពេលកើតហេតុជនរងគ្រោះរបួសទាំងពីរត្រូវបានរថយន្តសង្រ្គោះដឹកយកទៅសង្រ្គោះនៅមន្ទីរពេទ្យជ័យជំនះ។

ចំពោះមធ្យោបាយដែលពាក់ព័ន្ធត្រូវបានយកមករក្សាទុកបណ្តោះអាសន្ននៅអធិការដ្ឋាននគរបាលក្រុងតាខ្មៅដើម្បីបន្តនីតិវិធី ។

មូលហេតុករណីខាងលើ៖ បណ្ដាលមកពីអ្នកបើកបររថយន្តម៉ាក SANY ប្រភេទក្រឡុកស៊ីម៉ងត៍ បើកបត់ឆ្វេងខ្វះការប្រុងប្រយ័ត្ន ។  អ្នកបើកបររថយន្តម៉ាក SPRAYING WATER ប្រភេទស៊ីទែនបើកបរមានល្បឿនលឿនខ្វះការប្រុងប្រយ័ត្នដូចគ្នា៕

ដោយ៖ ស្អាងជ័យ