សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ បេីយោងតាមប្រភពព័ត៌មានពីរបាយការណ៍របស់ស្នងការដ្ឋាននគរបាលខេត្តសៀមរាប នៅព្រឹកថ្ងៃចន្ទទី០៧ ខែវិច្ឆិកា ឆ្នាំ២០២២នេះ បានឱ្យដឹងថា ចៅក្រមសេីុបសួរសាលាដំបូងខេត្តសៀមរាប សម្រេចឃុំខ្លួនជនជាប់ចោទម្នាក់ ពាក់ព័ន្ធករណីរក្សាទុក ជួញដូរ និងប្រើប្រាស់គ្រឿងញៀនខុសច្បាប់ ដាក់ពន្ធនាគារបណ្តោះអាសន្ន កាលពីថ្ងៃទី០៦ ខែវិច្ឆិកាម្សិលមិញនេះ។
របាយការណ៍ដដែលបន្តថា កម្លាំងការិយាល័យប្រឆាំងគ្រឿងញៀន ដោយបានការចូលរួមសហការពីអធិការដ្ឋាននគរបាលក្រុងសៀមរាប កាលពីយប់ថ្ងៃ០៥ ខែវិច្ឆិកា ឆ្នាំ២០២២ វេលាម៉ោង២០និង១០នាទី បានចុះបង្រ្កាបករណី រក្សាទុក ជួញដូរ និងប្រើប្រាស់ដោយខុសច្បាប់នូវសារធាតុញៀន នៅត្រង់ចំណុចហាងម៉ាស្សាយីហោ ២២២ ស្ថិតនៅក្នុងភូមិថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប ឃាត់ខ្លួនជនសង្ស័យម្នាក់ឈ្មោះ ប៉ាល់ ផល ហៅ ខ្លី ភេទប្រុស ឆ្នាំកំណើត ១៩៩០ ជនជាតិខ្មែរ មុខរបរ កម្មករសំណង់ មានទីលំនៅ ភូមិភ្នំក្រោម សង្កាត់សៀមរាប ក្រុងសៀមរាប ខេត្តសៀមរាប ។(រក្សាទុក ជួញដូរ និងប្រើប្រាស់) (មានសារធាតុ ញៀននៅក្នុងខ្លួន) ។
សូមជម្រាបថា ក្នុងប្រតិបត្តិការចុះបង្ក្រាបខាងលេីនេះកម្លាំងសមត្ថកិច្ចស្រាវជ្រាវដកហូតវត្ថុតាងរួមមាន ៖ ម្សៅមេតំហ្វេតាមីនចំនួន ០៩កញ្ចប់ ស្មើនឹងទម្ងន់ ៣.៩៧ក្រាម (ទម្ងន់សុទ្ធ), ជញ្ជីងថ្លឹងគ្រឿងញៀនចំនួន ០១ គ្រឿង, ទូរស័ព្ទដៃចំនួន ០៣ គ្រឿង ឧបករណ៍ប្រើប្រាស់ និងសម្ភារវេចខ្ចប់គ្រឿងញៀនខុសច្បាប់មួយចំនួន ។
បច្ចុប្បន្នជនជាប់ចោទ ត្រូវបានកម្លាំងនគរបាលខេត្តសៀមរាបបញ្ជូនទៅឃុំខ្លួនដាក់ពន្ធនាគារខេត្តសៀមរាប៕
ដោយ៖សហការី
