សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ យុវជនពីរនាក់បានជិះម៉ូតូពីរគ្រឿងទាក់ដៃចង្កូតគ្នាបណ្ដាលឲ្យដួលត្រូវរថយន្តបែនដឹកដីបុកនិងកិនម៉ូតូជាប់ខាងក្រោមរថយន្ត បណ្ដាលឲ្យយុវជនទាំងពីរនាក់រងរបួសធ្ងន់ត្រូវបានរថយន្តសាមុយបញ្ជូនទៅសង្គ្រោះភ្លាមៗ កាលវេលាម៉ោង៨ និង៥០នាទីយប់ថ្ងៃអង្គារ ទី៣ ខែមករា ឆ្នាំ២០២៣ ស្ថិតនៅតាមបណ្ដោយផ្លូវបេតុងកោះនរា ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគាត់ឃើញយុវជនម្នាក់ជិះម៉ូតូហុងដាឌ្រីម ពណ៌ខ្មៅ ស៊េរីឆ្នាំ២០២១ ពាក់ស្លាកលេខកំពង់ចាម1S -8603 និងម៉ូតូម៉ាកហុងដា វ៉េវ ពណ៌ខ្មៅ ពាក់ស្លាកលេខភ្នំពេញ1IA-5982 ធ្វើដំណើរទិសពីជើងទៅត្បូងស្របគ្នាទាំងពីរ ខណៈមកដល់ចំណុចកើតហេតុខាងលើបានទាក់ដៃចង្កូតគ្នាបណ្ដាលឲ្យម៉ូតូវ៉េវដួលអូសទៅបុករបងថ្មផ្ទះប្រជាពរដ្ឋរងរបួសបែកក្បាល ចំណែកភាគីម៉ូតូហុងដាឌ្រីមដួលមកខាងឆ្វេងដៃ តែម្ចាស់ម៉ូតូខ្ទាតចេញពីម៉ូតូត្រូវរថយន្តបែនដឹកដីបើកបញ្ច្រាសគ្នាពីត្បូងមកជើងកិនជាប់ម៉ូតូខ្ទេច ។ ក្នុងហេតុការណ៍គ្រោះថ្នាក់ចរាចរណ៍នេះបានធ្វេីឱ្យម្ចាស់ម៉ូតូទាំងពីរនាក់រងរបួសធ្ងន់ត្រូវបានរថយន្តសាមុយដឹកយកទៅសង្គ្រោះភ្លាមៗ។
ក្រោយកើតហេតុ សមត្ថកិច្ចមូលដ្ឋាន សហការជាមួយជំនាញចរាចរណ៍ខណ្ឌច្បារអំពៅ ចុះមកធ្វេីការវាស់វែងយករថយន្តនិងម៉ូតូទៅរក្សាទុក រង់ចាំដោះស្រាយគ្នានៅពេលក្រោយ ៕
ដោយ ៖ ភារ៉ា ដង្កោ
