🔴លោក ហាក់ ម៉ៅ អះអាងថា ករណីនៅខេត្តមណ្ឌលគិរី ជាទីតាំងដែលគាត់ទៅចូលរួមកម្មវិធីរបស់អ្នកភូមិតែប៉ុណ្ណោះ

ភ្នំពេញ ៖ ក្រោយពីមានការចុះផ្សាយ លើបណ្ដាញទំនាក់ទំនងសង្គមហ្វេសប៊ុក និងគេហទំព័រក្នុងស្រុកមួយចំនួនកាលពីម្សិលមិញ និងនៅថ្ងៃទី ១៩ ខែមករា ឆ្នាំ ២០២៣ ប៉ះពាល់យ៉ាងធ្ងន់ធ្ងរមកលើឈ្មោះ ហាក់ ម៉ៅ ថាបានប្រើប្រាស់កម្លាំងទាហាន,រថយន្តយោធា និងរថយន្ត សឺរ៉ែន ដើម្បីបំភិតបំភ័យបំបាក់ស្មារតីអ្នក ភូមិ ហើយបានព័ទ្ធ និងឈូសឆាយយកដីធ្លីរបស់ពួកគាត់នៅចំណុចភូមិអូរស្ពាន សង្កាត់ស្ពានមានជ័យ ក្រុងសែននោរម្យ ខេត្ត មណ្ឌលគិរី ដែលអះអាងថាជាដីជនជាតិភាគតិច ។

 លោក ហាក់ ម៉ៅ បានច្រានចោលនូវការចោទប្រកាន់ទាំងនេះ ថាពុំមែនជាការពិត ។ 

 នៅព្រឹកថ្ងៃទី ១៩ ខែមករា ឆ្នាំ ២០២៣ លោក ហាក់ ម៉ៅ បានបញ្ជាក់យ៉ាងដូច្នេះថា  , ទីតាំងដីដែលត្រូវបានគេចុះផ្សាយ និងថតរូបនោះ គឺជាទីតាំងម្ចាស់ដីបានហៅគាត់ទៅចូលរួមនៅក្នុងកម្មវិធី អាហារសាមគ្គីតែប៉ុណ្ណោះ។ លោក ហាក់ ម៉ៅ បានលើកអំណះអំណាងថា , ជាការពិតទីតាំងដីនោះ ជាដីរបស់ឈ្មោះ ឡាយ ស្រីពៅ ដែលគាត់បានទិញពីឈ្មោះ ភ្លីន ព្យីន និងមានឈ្មោះសាក្សីទាំងអ្នកលក់និងអ្នកទិញដូចខាងក្រោមនេះ :

 -សាក្សីអ្នកលក់ ១-ឈ្មោះ ចាន់ វេត 

 -សាក្សីអ្នកទិញ ១-ឈ្មោះ ជុន ស្រីមុំ ។

លោក ហាក់ ម៉ៅ បានបន្តថា, បើតាមខ្ញុំដឹង អ្នកលក់ និងអ្នកទិញ ផ្ទះនិងដីនេះ គឺភាគីអ្នកលក់ បានធ្វើរបងព័ទ្ធជុំវិញដីឲ្យទៅភាគីអ្នកទិញ យ៉ាងត្រឹមត្រូវទៀតផង ទើបភាគីអ្នកទិញ មានលិខិតប្រគល់ប្រាក់គ្រប់ចំនួនតាំងពីឆ្នាំ ២០២២ មកម៉្លេះ។ 

សូមបញ្ជាក់ថា, ឈ្មោះ ឡាយ ស្រីពៅ ទិញដីខាងលើ ដោយសារភាគីអ្នកលក់បានអះអាងថា, ដីរបស់គាត់មានច្បាប់ពិតប្រាកដ ដោយមានអនុក្រឹត្យរាជរដ្ឋាភិបាល លេខ ១៩៤ អនក្រ.បក សម្រេច កាត់ផ្ទៃដីទំហំ ៤៤ហិកតា ៤២អា ៦៨សង់ទីអា ចេញពីគម្របព្រៃឈើ ឆ្នាំ២០០២ និងផ្ទៃដីទំហំ ៣១៣ ហិកតា ២៤អា ១៥សង់ទីអា ចេញពីដីសម្បទានសេដ្ឋកិច្ច របស់ក្រុមហ៊ុន អ៊ូជីសាន និងក្រុមហ៊ុន ហូរលីង ស្ថិតនៅភូមិជ្រៃសែន សង្កាត់មនោរម្យ និងភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី តាមប្រព័ន្ធនិយាមកា WGS_1984_UTM_Zone_48N ដូចមានផែនទីបង្ហាញទីតាំងដី និងនិយាមកាភ្ជាប់ជាឧបសម្ព័ន្ធ នៃអនុក្រឹត្យនេះ ធ្វើអនុប្រយោគជាដីឯកជនរបស់រដ្ឋ និងប្រទានកម្មជាកម្មសិទ្ធិជូនប្រជាពលរដ្ឋ ដែលកាន់កាប់ និងអាស្រ័យផលជាក់ស្តែង។ 

លោក ហាក់ ម៉ៅ បានបន្តថា , ចំពោះការចោទប្រកាន់ ថាមានឡានពាក់ស្លាកលេខ (ខម)នោះ គឺជាឡានរបស់គាត់ប្រើប្រាស់ផ្ទាល់ខ្លួន ដែលបានជិះទៅចូលរួមកម្មវិធីអាហារសាមគ្គីនៅទីនោះ។ ដោយឡែកឡាន ចំណុះ៣តោន ដែលគេបានឃើញនិងថតបង្ហោះនោះ គឺគាត់បានជួយដឹកដី និងដឹកថ្ម ចំនួន៣ ទៅ៤ឡាន ដើម្បីដាក់កន្លែងគំហុកតែប៉ុណ្ណោះ។ ចំពោះមនុស្ស ប៉ុន្មាននាក់ដែល បានឈរនៅកន្លែងដីនោះ គឺពួកគាត់បានទៅចូលរួមក្នុងកម្មវិធីដែរ ព្រមទាំងនាំគ្នាថតរូប ឱ្យគ្នាទៅវិញទៅមក ដើម្បីផ្ដិតយកទេសភាពនៅទីនោះតែប៉ុណ្ណោះ ។ លោកបន្តថា, កម្មវិធីអាហារសាមគ្គី ដែលធ្វើនៅទីនោះ មានទាំងបងប្អូនប្រជាពលរដ្ឋជនជាតិ អាជ្ញាធរ មន្ត្រីមូលដ្ឋាន ដែលអាចចាត់ទុកថាជាសាក្សីបញ្ជាក់ជូនបាន ។ ដូច្នេះចំពោះការចុះផ្សាយកន្លងទៅនេះលោកសូមធ្វើការបដិសេធចោលទាំងស្រុង ហើយស្នើសុំឱ្យបណ្តាញផ្សព្វផ្សាយ និងសាធារណៈជន  មេត្តាជ្រាបជាព័ត៌មានផងដែរ ៕ 

IMG_9524 IMG_9526 IMG_9525 IMG_9527 IMG_9530

ដោយ ៖ សហការី