សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ បន្ទាប់ពីសមត្ថកិច្ចនគរបាលប៉ុស្តិ៍រដ្ឋបាលបាវិតបានធ្វើការឃាត់ខ្លួនជនសង្ស័យចំនួន២នាក់ក្នុងករណីជិះម៉ូតូ ឆក់កាបូបស្ពាយពីស្ត្រីបុគ្គលិកកាស៊ីណូម្នាក់ នៅចំណុចខាងមុខផ្សារអន្តរជាតិបាវិតយកមកសាកសួររួចមកកំលាំងសមត្ថកិច្ចនគរបាលក្រុងបាវិតសហការជាមួយ ប៉ុស្តិ៍រដ្ឋបាលបានធ្វើការស្រាវជ្រាវរហូតឈានទៅរកការឃាត់ខ្លួនបានម្នាក់ទៀតសរុបចំនួន៣នាក់។
ការឃាត់ខ្លួននេះបានធ្វើឡើងវេលាម៉ោង៨និង១០នាទីព្រឹកថ្ងៃទី២៣ខែមករាឆ្នាំ២០២៣ស្ថិតនៅភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀង។
យោងតាមសមត្ថកិច្ចនគរបាលក្រុងបាវិតបានឱ្យដឹងថាជនសង្ស័យមានឈ្មោះ សៀង សុវណ្ណ (ហៅយួន)អាយុ២៥ឆ្នាំជនជាតិខ្មែរមុខរបរមិនពិតប្រាកដ មានទីលំនៅភូមិត្រពាំងផ្លុង សង្កាត់បាទីក្រុងបាវិតខេត្តស្វាយរៀង។
បន្ទាប់ពីទទួលបានចម្លើយសារភាពរបស់ជនសង្ស័យខាងលើ ថាខ្លួនពិតជាធ្វើសកម្មភាពពិតប្រាកដ ជាមួយបក្សពួក រួចមកសមត្ថកិច្ច បានសុំយោបល់ពីលោកព្រះរាជអាជ្ញា អមសាលាដំបូងខេត្តស្វាយរៀងដើម្បីចាត់ការបន្តតាមច្បាប់។
សូមរំលឹកឡើងវិញថា ជនសង្ស័យ២នាក់ត្រូវបានសមត្ថកិច្ចនគរបាលប៉ុស្តិ៍រដ្ឋបាលបាវិតឃាត់ខ្លួនមកសាកសួរបន្ទាប់ពីធ្វើសកម្មភាពឆក់កាបូបពីស្ត្រីបម្រើការងារនៅកាស៊ីណូម្នាក់នៅចំណុចខាងមុខផ្សារអន្តរជាតិបាវិតរួចបើកគេចខ្លួនប៉ុន្តែចៃដន្យអាក្រក់សមត្ថកិច្ចមើលតាមប្រព័ន្ធ GPS ក្នុងទូរស័ព្ទ របស់ជនរងគ្រោះ ទើបចាប់បាន។
ហេតុការណ៍ឆក់កាបូបនេះបានកើតឡើងកាលពីវេលាម៉ោង៥និង៤៥នាទីល្ងាចនាថ្ងៃទី២២ ខែមករា ឆ្នាំ២០២៣ នៅចំណុចខាងមុខផ្សារអន្តរជាតិ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
យោងតាមសមត្ថកិច្ចនគរបាលក្រុងបាវិតបានឱ្យដឹងថាជនសង្ស័យមានឈ្មោះ យ៉ាត់ ចំណាប់ ហៅញ៉យ អាយុ១៨ឆ្នាំជនជាតិខ្មែរ មុខរបរមិនពិតប្រាកដ មានទីលំនៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង និងឈ្មោះ អ៊ុង ចន្ធី ហៅ ពៅ អាយុ២៦ឆ្នាំជនជាតិខ្មែរ មុខរបរមិនពិតប្រាកដ មានទីលំនៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
ចំណែកស្ត្រីរងគ្រោះមានឈ្មោះ ង្វៀង ធីហុងហ្គាម (NGUYEN THI HON GAM) អាយុ២៩ឆ្នាំជនជាតិវៀតណាម មុខរបរបុគ្គលិកក្រុមហ៊ុនកាស៊ីណូ ស្នាក់នៅក្រុមហ៊ុន ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
សម្ភារ:ក្នុងកាបូបស្ពាយដែលបាត់បង់រួមមាន ៖ ទូរស័ព្ទ០១គ្រឿងម៉ាក I PHONE 12 PROMAX ពណ៌ស្លឹកឈើ(មានភ្ជាប់GPS) កាតATM ចំនួន០៤ សន្លឹក សំបុត្រកំណើតកូន០១សន្លឹក និងប្រាក់ចំនួន ៤០០ដុល្លារ (បួនរយដុល្លារអាមេរិក) ។
ប្រភពបន្តថាបន្ទាប់ពីទទួលបណ្តឹង១ច្បាប់ពីជនរងគ្រោះ ថាមានជនសង្ស័យចំនួន០២នាក់(មិនស្គាល់អត្តសញ្ញាណ) បានធ្វើសកម្មភាពជិះម៉ូតូ ឆក់កាបូបស្ពាយរបស់ខ្លួន នៅចំណុចខាងមុខផ្សារអន្តរជាតិ បាវិតរួច ជិះម៉ូតូគេចខ្លួនបាត់ សមត្ថកិច្ច បានចុះទៅដល់កន្លែងកើតហេតុ ដើម្បីធ្វើការស្រាវជ្រាវ ។
រហូតដល់ម៉ោង១០និង២៥នាទីយប់នាថ្ងៃខែឆ្នាំដដែល សមត្ថកិច្ច បានមើលតាមប្រព័ន្ធ GPS ក្នុងទូរស័ព្ទ របស់ជនរងគ្រោះនិង ធ្វើការប្រម៉ាញ់បានមុខសញ្ញាដែលជាជនសង្ស័យចំនួន០២នាក់ រួចនាំខ្លួនមកប៉ុស្តិ៍នគរបាលរដ្ឋបាលបាវិត ដើម្បីសាកសួរ ៕
ដោយ៖ សុថាន
