សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ក្រុមជនសង្ស័យចំនួន០២នាក់ត្រូវបានកម្លាំងនគរបាលស្រុកឱរ៉ាល់ ក្រោមការដឹកនាំផ្ទាល់ពី លោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់ បានធ្វើការឃាត់ខ្លួនបាន ខណៈដែលក្រុមជនសង្ស័យបានធ្វើសកម្មភាពលួចម៉ូតូរបស់ប្រជាពលរដ្ឋ ហើយព្យាយាមជិះគេចខ្លួន ប៉ុន្តែសំណាងមិនល្អនគរបាលស្ទាក់ជាប់ ឃាត់ខ្លួនតែម្តង។
សមត្ថកិច្ច នគរបាលឃាត់ខ្លួន ក្រុមជនសង្ស័យធ្វើសកម្មភាពលួចម៉ូតូប្រជាពលរដ្ឋ បានធ្វើឡើងកាលពីវេលាម៉ោង១២និង៤០នាទីថ្ងៃត្រង់ ថ្ងៃទី ២៤ ខែមករា ឆ្នាំ២០២៣ ត្រង់ចំណុខាងត្បូងរង្វង់មូលផ្សារកន្តួត ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។
លោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់ បាននិយាយឱ្យដឹងថា កាលពីវេលាម៉ោង១២និង២៥នាទីថ្ងៃត្រង់ ថ្ងៃទី២៤ ខែមករា ឆ្នាំ២០២៣ នៅចំណុចភូមិច្រកទៀក ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ មានករណីលួចម៉ូតូមួយកើតឡើងដែលបង្ករដោយជនសង្ស័យមិនស្គាល់អត្តសញ្ញាចំនួន០២នាក់ បានធ្វើសកម្មភាពលួចម៉ូតូ០១គ្រឿងម៉ាកហុងដាសេ១២៥( C125) ពណ៌ខ្មៅស៊េរីឆ្នាំ២០១៥ ពាក់ផ្លាកលេខ កណ្តាល 1D.7795 ដែលជនរងគ្រោះជាម្ចាស់ម៉ូតូមានឈ្មោះ វ៉េង ហៀង ភេទប្រុស អាយុ៥៥ឆ្នាំ រស់នៅភូមិច្រកទៀក ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺជិះយកទៅបាត់។
លោកវរសេនីយ៍ឯក ប៊ុត ប៊ុនធឿន អធិការនគរបាលស្រុកបានបន្តទៀតថា÷ ក្រោយពីបានទទួលព័ត៌មានភ្លាមៗលោកបានដឹកនាំ កម្លាំងជំនាញរបស់អធិការដ្ឋាននគរបាលស្រុកឱរ៉ាល់ រួមជាមួយកម្លាំងនគរបាលប៉ុស្តិ៍រដ្ឋបាលទាំង៥ ធ្វើការល្បាតស្ទាក់ ដេញប្រផាប់ ចាប់ប្រភីង ឃាត់ខ្លួនជនសង្ស័យបានម្នាក់ ឈ្មោះខាន់ សាមិត្ត ភេទប្រុស អាយុ៣៧ឆ្នាំមុខរបរមិនពិតប្រាកដ រស់នៅភូមិទំលាប់ ឃុំស្គុះ ស្រុកសំរោងទងខេត្តកំពង់ស្ពឺ ត្រង់ចំណុច ខាងត្បូងរង្វង់មូលផ្សារកន្តួត ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ចាប់យកបានសម្ភារៈវត្ថុតាងម៉ូតូ០១គ្រឿងម៉ាកហុងដាសេ១២៥(C125 )ពណ៌ខ្មៅស៊េរីឆ្នាំ២០១១ បិទតែមឡើង ស៊េរីឆ្នាំ២០២១គ្មានផ្លាកលេខ(ដែលម៉ូតូជិះធ្វើសកម្មភាព) និងដាវចំនួន០១ដើម(លាក់ក្រោមកែបម៉ូតូ)។ ភ្លាមៗនោះកម្លាំង សមត្ថកិច្ចរបស់លោកបានកំពុងបន្តដេញប្រផាប់ ចាប់ប្រភីង ទៅដល់ចំណុចភូមិមនោរម្យ ឃុំហោងសំណំ ស្រុកឱរ៉ាល់ ខេត្តកំពង់ស្ពឺបានស្ទាក់ ឃាត់ខ្លួនជនសង្ស័យម្នាក់ទៀតកំពុងផ្តួលម៉ូតូ ហើយព្យាយាមរត់គេចខ្លួននោះមានឈ្មោះ បាន សាវធីម ភេទប្រុស អាយុ១៧ឆ្នាំមុខរបរមិនពិតប្រាកដ រស់នៅភូមិពាណិជ្ជ ឃុំយាអង្គ ស្រុកថ្ពង ខេត្តកំពង់ស្ពឺ និងបានដកហូតសម្ភារៈ វត្ថុតាងម៉ូតូ០១គ្រឿម៉ាកហុងដាសេ១២៥ ឍពណ៌ខ្មៅស៊េរីឆ្នាំ២០១៥ ពាក់ផ្លាក លេខកណ្តាល1D.7795 ជាម៉ូតូរបស់ជនរងគ្រោះ។
អធិការនគរបាលស្រុកឱរ៉ាល់ លោកប៊ុត ប៊ុនធឿន បានបញ្ជាក់បន្ថែមទៀតថាក្រោយឃាត់ខ្លួនជនសង្ស័យទាំង០២នាក់ និងដកហូតសម្ភារៈ ម៉ូតូ០២គ្រឿងក្នុងនោះម៉ូតូជនរងគ្រោះ០១គ្រឿង ដាវ០១ដើម និងមួកសុវត្ថិភាពរបស់ជនសង្ស័យ០១ពណ៌សរ មួយផងនោះ។
បច្ចុប្បន្នកំពុងសួរនាំ និងកសាងសំណុំរឿងដើម្បីបញ្ជូនទៅស្នងការដ្ឋាននគរបាលខេត្តកំពង់ស្ពឺចាត់ការបន្តតាមផ្លូវច្បាប់ តាមនីតិវិធីនិងបន្តបញ្ជូនទៅសាលាដំបូងខេត្ត៕
ដោយ ៖ សហការី
