សារព័ត៌មាន នគរវត្ត តែងតែនាំមុខគេជានិច្ច
FIFA បានបង្ហាញពី “ការមិនយកចិត្តទុកដាក់ទាំងស្រុង” ចំពោះសារៈសំខាន់នៃការប្រកួតថ្នាក់ជាតិនេះ បន្ទាប់ពីស្ថាប័នគ្រប់គ្រងបាល់ទាត់ពិភពលោកមួយនេះបានអនុម័តការប្រកួត Club World Cup ដែលមានក្រុមចំនួន៣២ក៏ដូចជាការប្រកួតបាល់ទាត់ពិភពលោកដែលបានពង្រីកជាមួយនឹងការប្រកួតចំនួន ១០៤ប្រកួត។
នៅមុនសមាជរបស់ខ្លួននៅទីក្រុង Kigali ប្រទេស Rwanda សហព័ន្ធបាល់ទាត់ពិភពលោក FIFA បានប្រកាសថា World Cup ឆ្នាំ២០២៦ នឹងមានការប្រកួតចំនួន១០៤ជំនួសឱ្យការប្រកួតប្រពៃណីចំនួន៦៤ដោយសារតែទម្រង់ដែលបានពង្រីកដោយមាន៤៨ក្រុមចូលរួម។
ស្ថាប័នគ្រប់គ្រងក៏បានអនុម័តការប្រកួត Club World Cup ដែលមានក្រុមចំនួន៣២ដែលនឹងត្រូវលេងរៀងរាល់៤ឆ្នាំម្តងចាប់ពីខែមិថុនា ឆ្នាំ២០២៥តទៅ។
ក្នុងករណីនេះលីកកំពូលអេស្ប៉ាញ La Liga បានប្រកាសនៅក្នុងសេចក្តីថ្លែងការណ៍មួយថា “FIFA បន្តការប្រព្រឹត្តមិនត្រឹមត្រូវរបស់ខ្លួនក្នុងការសម្រេចចិត្តជាឯកតោភាគីនៅលើប្រតិទិនបាល់ទាត់ពិភពលោកដោយបង្ហាញពីការមិនយកចិត្តទុកដាក់ទាំងស្រុងចំពោះសារៈសំខាន់នៃការប្រកួតជើងឯកជាតិ និងសហគមន៍បាល់ទាត់ជាទូទៅ” ។
សេចក្តីថ្លែងការណ៍បន្តថា “FIFA ធ្វេសប្រហែសទាំងស្រុងចំពោះការខូចខាតសេដ្ឋកិច្ច ដែលការសម្រេចចិត្តទាំងនេះប៉ះពាល់ដល់លីកនៅជុំវិញពិភពលោក។ លីកមិនត្រូវបានពិគ្រោះអំពីការផ្លាស់ប្តូរណាមួយដែលបានបង្ហាញនៅថ្ងៃនេះ ជាពិសេសអំពីការប្រកួតប្រចាំឆ្នាំថ្មីរបស់ក្លិប។ ការសម្រេចចិត្តទាំងនេះមិនគិតពីផលប៉ះពាល់នៃការប្រកួតប្រជែង កីឡា និងសេដ្ឋកិច្ចលើលីកជាតិ ក្លិប និងកីឡាករនោះទេ ដោយបន្ថែមពីលើកាលវិភាគដែលលើសទម្ងន់រួចហើយ។ FIFA គិតតែពីក្រុមតូចមួយនៃក្លិប និងកីឡាករ ដោយមិនគិតពីកីឡាករដែលមានកាតព្វកិច្ចជម្រើសជាតិ និងលេងឲ្យក្លិបនោះទេ“។
La Liga បានបន្ថែមថា ខ្លួន និងលីកផ្សេងទៀតនៅក្នុងវេទិកាលីកពិភពលោក (WLF) ដែលជាអង្គការតំណាងឱ្យលីកបាល់ទាត់សមាគមអាជីពនឹងវិភាគការសម្រេចចិត្តរបស់ FIFA និងសម្រេចចិត្តលើជំហានបន្ទាប់ដែលសមស្របបំផុត” ។
កាលពីខែធ្នូ WLF បានរិះគន់ការប្រកាសនៃការប្រកួត Club World Cup ដែលមានក្រុមចំនួន៣២ដោយនិយាយថា វាអាចមានផលវិបាកសម្រាប់សេដ្ឋកិច្ចបាល់ទាត់ និងសុខុមាលភាពកីឡាករ។ ប្រតិទិននៃការប្រកួតដែលត្រូវបានកែលម្អត្រូវបានអនុម័តដោយក្រុមប្រឹក្សា FIFA ដែលជាស្ថាប័នធ្វើការសម្រេចចិត្តដ៏សំខាន់របស់អង្គការបាល់ទាត់ពិភពលោក។
ក្រុមប្រឹក្សា FIFA មានសមាជិក៣៧រូប រួមទាំងប្រធាន លោកGianni Infantinoដែល២៨រូបត្រូវបានជ្រើសរើសដោយសមាគមសមាជិក។ UEFA ដែលជាស្ថាប័នគ្រប់គ្រងរបស់អឺរ៉ុប ក៏ត្រូវបានតំណាងនៅក្នុងក្រុមប្រឹក្សាផងដែរ៕ ដោយ ៖ ភារៈ
(រូបភាព ៖ Reuters/CNA)
