សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល ៖ ប្រកាសតែងតាំង និងផ្ទេរភាកិច្ចប្រធានការិយាល័យគយ និងរដ្ឋាករក្អមសំណ, លោក សុង មាល័យ ជំនួសលោក សូ សុវណ្ណារ៉េត ត្រូវទៅបំពេញការងារជាអនុប្រធានសាខាគយ និងរដ្ឋាករខេត្តស្វាយរៀង ។
សូមបញ្ជាក់ថា ៖ ប្រកាសតែងតាំង និងផ្ទេរភារកិច្ចលោក សុង មាល័យ ជាប្រធានការិយាល័យគយ និងរដ្ឋាករក្អមសំណ ជំនួសលោក សូ សុវណ្ណារ៉េត ដែលត្រូវផ្ទេរភារកិច្ចទៅបំពេញការងារជាអនុប្រធានសាខាគយ និងរដ្ឋាករខេត្តស្វាយរៀង។
ពិធីនេះធ្វើឡើងនៅថ្ងៃទី៤ ខែមេសា ឆ្នាំ២០២៣ ក្រោមវត្តមានលោក ណុប ដារ៉ា អភិបាលរងខេត្តកណ្តាល តំណាងលោកគង់ សោភ័ណ្ឌ អភិបាលខេត្ត និងលោក អន ស៊ីនួន ប្រធានសាខាគយ និងរដ្ឋាករខេត្តកណ្តាល តំណាងលោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា។
លោក ណុប ដារ៉ា បានថ្លែងថា ការតែងតាំងផ្លាស់ប្ដូរ និងផ្ទេរភារកិច្ច គឺជារឿងធម្មតារបស់មន្ត្រីរាជការមុខងារសាធារណៈ ដែលធ្វើឡើងដើម្បីផ្លាស់ប្ដូរបទពិសោធន៍ សម្រាប់មុខតំណែងផ្សេងៗក្នុងស្ថាប័នរដ្ឋ តាមតម្រូវការចាំបាច់ ស្របតាមលិខិតបទដ្ឋានគតិយុត្តរបស់រាជរដ្ឋាភិបាល ដើម្បីលើកកម្ពស់ប្រសិទ្ធភាពការងារក្នុងការដឹកនាំ គ្រប់គ្រង សំដៅធ្វើឱ្យមានការកែទម្រង់ប្រព័ន្ធការងារ ឱ្យកាន់តែល្អប្រសើរស្របតាមគោលនយោបាយរបស់រដ្ឋាភិបាលកម្ពុជា។
លោកអភិបាលរងខេត្ត បានផ្តាំផ្ញើដល់ប្រធានការិយាល័យគយ និងរដ្ឋាករក្អមសំណថ្មី និងកងកម្លាំងប្រដាប់អាវុធ មន្ត្រីរាជការបណ្ដាស្ថាប័នអង្គភាពជំនាញនានាជុំវិញស្នាក់ការត្រួតពិនិត្យច្រកទ្វារព្រំដែនអន្តរជាតិក្អមសំណ សូមយកចិត្តទុកដាក់បំពេញការងារអោយស្របតាមតួនាទី និងភារកិច្ចរបស់ខ្លួន ឱ្យអស់ពីសមត្ថភាពធ្វើយ៉ាងណាឱ្យចរន្តការងារមានភាពរលូន ស៊ីសង្វាក់គ្នា ដោយឈរលើស្មារតីទទួលខុសត្រូវខ្ពស់ ជាពិសេសត្រូវតម្កល់ផលប្រយោជន៍ជាតិ និងប្រជាជនជាធំ។
ជាមួយគ្នានេះ លោក អន ស៊ីនួន បានឱ្យដឹងថា ការផ្ទេរភារកិច្ចប្រធានការិយាល័យគយ និងរដ្ឋាករក្អមសំណ គឺជាកិច្ចការធម្មតារបស់អង្គភាពគយ និងរដ្ឋាករ ដែលមានគោលការណ៍ផ្ទេរភារកិច្ចបំពេញការងាររបស់មន្ត្រី ស្របតាមយុទ្ធសាស្ត្រកែទម្រង់និងទំនើបកម្មគយ ដើម្បីផ្លាស់ប្ដូរនូវបទពិសោធន៍ និងពង្រឹងប្រសិទ្ធភាពនៃការផ្ដល់សេវា ការបង្ការ និងបង្ក្រាបអំពើរត់គេចពន្ធ និងជាពិសេសការប្រមូលពន្ធនឹងអាករចូលថវិកាជាតិ របស់អង្គភាពនីមួយៗ។
សូមជំរាបជូនថា, ការប្រកាសតែងតាំង និងផ្ទេរភាកិច្ចប្រធានការិយាល័យគយ ប្រធាន អនុប្រធានសាខា ក៏ដោយ គ្មានពាក់ព័ន្ធទៅនឹងកំហុសណាមួយឡើយ។ គឺថ្នាក់លើបានប្ដូរបទពិសោធន៍របស់ថ្នាក់ដឹកនាំមន្ត្រីគយ និងរដ្ឋាករ ឱ្យកាន់តែពង្រឹងនិងកំណែទម្រង់រដ្ឋបាល ដើម្បីមានភាពទទួលខុសត្រូវ តាមតួនាទីភារកិច្ច បង្ក្រាបបទល្មើសគេចពន្ធ ប្រមូលពន្ធជូនរដ្ឋ ដែលជាថវិកា ទ្រទ្រង់ដល់សេដ្ឋកិច្ចជាតិ៕
ដោយ ៖ សហការី
