សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត ៖ នៅព្រឹកថ្ងៃទី១០ ខែមេសា ឆ្នាំ២០២៣ រថយន្តហ្ស៊ីបមួយគ្រឿងបានបើកបរក្នុងល្បឿនលឿន រួចជ្រុលបុកម៉ូតូពីក្រោយចំនួន២គ្រឿងបណ្តាលឱ្យស្រ្តីម្នាក់បាត់ បង់ជីវិត និងបុរសម្នាក់ទៀតរងរបួសធ្ងន់នៅលើកំណាត់ ផ្លូវជាតិលេខ៣ ស្ថិតក្នុងភូមិព្រេច ឃុំបឹងនិមល ស្រុកឈូក ខេត្តកំពត ។
ស្ត្រីដែលបានស្លាប់ឈ្មោះ កឹម តុល អាយុ ៥២ឆ្នាំ មានទីលំនៅភូមិឃុំកើតហេតុនេះ ។ ចំណែកបុរសដែលរងរបួសឈ្មោះ សំ ពេជ្រ អាយុ ៣៨ឆ្នាំ រស់នៅភូមិពោធិ៍ដុះ ឃុំបឹងនិមល ស្រុកឈូក ខេត្តកំពត។
ប្រភពដដែលបានរៀបរាប់ថា កាលពីវេលាម៉ោង៧ និង៣០នាទីព្រឹកថ្ងៃទី ១០ ខែមេសា២០២៣ មានករណីគ្រោះថ្នាក់ចរាចរណ៍បង្កឡើងដោយរថយន្ត១គ្រឿងនិងម៉ូតូ២គ្រឿងនៅលើកំណាត់ផ្លូវជាតិលេខ៣ ត្រង់ចន្លោះបង្គោលគីឡូម៉ែត្រលេខ ១១០- ១១១ បណ្តាលឱ្យស្ត្រីម្នាក់បាត់បង់ជីវិត និងបុរសម្នាក់ ទៀតរងរបួសបាក់ភ្លៅខាងស្តាំ។
សមត្ថកិច្ចបានបន្តថា មុនហេតុការណ៍កើតឡើង គេឃើញម៉ូតូទាំង២គ្រឿងបើកមកពីទិសខាងលិច លុះដល់ចំណុចកើត ស្រាប់តែមានរថយន្តហ្ស៊ីបពណ៌ខ្មៅ គ្មានស្លាកលេខបើកមកពីក្រោយក្នុងល្បឿនយ៉ាងលឿន រួចបុកម៉ូតូពេញទំហឹងជាបន្តបន្ទាប់បណ្តាលឱ្យម៉ូតូដួល និងមនុស្សដេករដូករណែលតែម្តង។ ក្នុងស្ថានភាពបែបនោះ អ្នកបើកបរបានរត់គេចបាត់ដោយបន្សល់ទុករថយន្តនៅកន្លែងកើតហេតុ។
លុះអ្នកជិតខាងចូលទៅជួយ ស្រាប់តែឃើញស្ត្រីជាអ្នកបើកម៉ូតូបានស្លាប់ភ្លាមៗ ចំណែកបុរសម្ចាស់ម៉ូតូមួយគ្រឿងទៀតរងរបួសធ្ងន់ទើបហៅរថយន្តដឹកទៅកាន់មន្ទីរពេទ្យជាបន្ទាន់។ រថយន្តនិងម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកឈូកដើម្បីដោះស្រាយពេលក្រោយ៕
ដោយ៖ សូរិយា
