សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ ចៅក្រមស៊ើបសួរសាលាដំបូងខេត្តតាកែវ លោកស្រី វៃ រចនា កាលពីរសៀលថ្ងៃទី១៥ ខែមេសា ឆ្នាំ២០២៣ បានសម្រេចឃុំខ្លួនជនត្រូវចោទ ដាក់ពន្ធនាគារបណ្ដោះអាសន្ន ដែលបានប្រើកាំបិតចាក់ប្រហារប៉ុនប៉ងឃាតកម្ម លើជនរងគ្រោះបណ្តាលអោយធ្លាយពោះម្នាក់ និង២នាក់របួសធ្ងន់ធ្ងរ នៅស្រុកទ្រាំងខេត្តតាកែវ ។ ចៅក្រមស៊ើបសួរសម្រេចឃុំខ្លួន ជនត្រូវចោទ ធ្វើឡើងបន្ទាប់ពីតំណាងអយ្យការ អមសាលាដំបូងខេត្ត លោក ស្រី ស៊ុន យឺត សម្រេចចោទប្រកាន់ឈ្មោះ សំ វុទ្ធី ភេទប្រុស អាយុ៤១ឆ្នាំមានទីលំភូមិឈើទាលបាក់ ឃុំធ្លក ស្រុកទ្រាំង ខេត្តតាកែវ ពីបទប៉ុនប៉ងឃាតកម្ម ។ នេះបើយោងតាមប្រភពច្បាស់ការណ៍ ពីមន្ត្រីនគរបាលយុត្តិធម៌ខេត្តតាកែវ។
ចៅក្រមសម្រេចឃុំខ្លួនជនត្រូវចោទរូបនោះធ្វើឡើងក្រោយពីសាមីអង្គភាព ធ្វើការឃាត់ខ្លួនជនដៃដល់ប្រព្រឹត្តបទល្មើស ពីបទប៉ុនប៉ងឃាតកម្មដែលត្រូវឃាត់ខ្លួន នៅក្នុងបន្ទាយមួយកន្លែងក្នុងភូមិសាស្ត្រខេត្តកណ្តាល អស់រយៈពេលជាច្រើនថ្ងៃ អនុវត្តពិន័យកងទ័ព ទើបនៅព្រឹកថ្ងៃទី១៣ ខែមេសា ឆ្នាំ២០២៣នេះ ខាងអង្គភាព បានប្រគល់ខ្លួន ជនដៃដល់ឲ្យសមត្ថកិច្ចនគរបាលខេត្តតាកែវ ចាត់ការបន្តតាមនីតិវិធី ។
គួររំឭកថា. កាលពីយប់ថ្ងៃទី៨ ខែមេសា ឆ្នាំ២០២៣ ជន ដៃដល់ខាងលើនេះបានជិះរថយន្តមួយគ្រឿងម៉ាកកាមរី ស៊េរីឆ្នាំ២០០៧ ពណ៌ស ពាក់ស្លាកលេខភ្នំពេញ2AV-7891 ធ្វើសកម្មភាព បើកឡាន ដេញតាមស្ទាក់ ឡានជនរងគ្រោះ ខណៈកំពុងជិះរថយន្តត្រឡប់មកពីហូបការវិញ បានប្រមាណជា១-២គីឡូម៉ែត្រ នៅភូមិឈើទាលបាក់ ឃុំធ្លក ស្រុកទ្រាំង ខេត្តតាកែវ ។ បន្ទាប់ពីបើកស្ទាក់កាក់ឡានជនរងគ្រោះរួច ជនដៃដល់ដែលមានគ្នាច្រើននាក់ បានធ្វើសកម្មភាពវាយជនរងគ្រោះដោយដំបងរលាស់ និងយកកាំបិតចាក់ប្រហារដោយកាំបិតដែលពួកគេសុទ្ធតែជាកងកម្លាំង ដើម្បីសម្លាប់ជនរងគ្រោះ តែដោយមានការផ្អើលឆោឡោពីប្រជាពលរដ្ឋ និងដឹងដល់សមត្ថកិច្ច ពួកគេបានចាក់ជនរងធ្លាយពោះវៀន បណ្តាលអោយរងរបួសធ្ងន់ធ្ងរចំនួន៣នាក់។
ក្រោយពីធ្វើសកម្មភាព ប៉ុនប៉ងឃាតកម្មរួច ជនដៃដល់ដែលសមត្ថកិច្ចឃាត់រូបនេះ បានព្យាយាមឡើងជិះរថយន្តមួយគ្រឿងទៀតរបស់បក្ខពួកខ្លួន ម៉ាកហាយឡេនឌ័រ ពណ៌ក្រហម មិនចាំស្លាកលេខ ដើម្បីគេចខ្លួន បន្ទាប់ពីដឹងថា, ប្រជាពលរដ្ឋឆោឡោរាយការណ៍ជូនសមត្ថកិច្ច ។ ប៉ុន្តែពួកគេបាន បន្សល់ទុករថយន្ត១គ្រឿង នៅកន្លែងកើតហេតុ យកអត់ទាន់ខ្លាចសមត្ថកិច្ចមកប្រមាញ់ឃាត់ខ្លួន ។
សូមបញ្ជាក់ថា មុនពេលកើតហេតុនេះ ជនរងគ្រោះខាងលើបានចេញពីហូបការអ្នកស្រុកនៅក្នុងឃុំកើតហេតុ ខណៈបើករថយន្ត ជិតដល់រថយន្តខ្លួន ស្រាប់តែមានភ្ញៀវដែលចេញពីហូបការដែលនោះ បើកឡានហាយឡេនឌ័រពណ៌ក្រហមទៅមុខ ថយក្រោយ បត់មិនរួចទំនងជាស្រវឹងស្រាខ្លាំងទើបគ្នីគ្នាខាងរងគ្រោះម្នាក់និយាយថា,… (តាមមើលគាត់ទើបរៀនបើកឡាន) ! ឮពាក្យបែបនេះ ជាហេតុធ្វើអោយអ្នកបើកឡានរូបនោះច្រឡោតខឹងនិងបានស្រែកគំរាមថា (ពួកអ្ហែងចង់សុីគ្រាប់សំណរមែន? ពួកអ្ហែងអត់ដឹងថា, អញជានរណាទេអី?).,.. ! គំរាមរួចតៃកុងឡានចិត្តភ្លើង ដៃឆៅរូបនោះក៏បានខលទូរស័ព្ទ ហៅបក្ខពួករបស់គេមកជាច្រើននាក់ ។ ភ្លាមនោះដោយខ្លាចមានរឿងភាគីរងគ្រោះបាននាំគ្នាចូលក្នុងឡាន បើកចេញ ដែលមានគ្នា៥នាក់រួមដំណើរ ។ ខណៈបើកមកដល់ចំណុចផ្លូវស្ងាត់ក៏ស្រាប់តែមានរថយន្ត១គ្រឿងបើកវ៉ាមកបត់ឈប់ ពីមុខឡានខ្លូននិងមានរថយន្ត១គ្រឿងទៀតឈប់បិទគូទពីក្រោយ ជាហេតុធ្វើអោយរថយន្តភាគីរងគ្រោះទៅមុខមិនរួច ថយក្រោយមិនរួច ទើបភាគីរងគ្រោះចំនួន២នាក់បើកទ្វារចេញមកសួរ ក៏ត្រូវជនដៃដល់យកដំបងដែករលាស់មកវាយក្បាលជនរងគ្រោះបែកក្បាលហូរឈាម ភ្លាមនោះអ្នកជិះក្នុងរថយន្តជនរងគ្រោះចេញមកមើល ដើម្បីឃាត់កុំអោយជនបង្កបន្តសកម្មភាព ក៏ត្រូវជនដៃឆៅរូបនោះយកកាំបិតចុចមកចាក់ប្រហារបណ្តាលអោយជនរងគ្រោះម្នាក់រងរបួសសុះពេញខ្លួន និងធ្លាយពោះវៀនចេញក្រៅ រីឯ២នាក់ទៀតរងរបួសធ្ងន់។ ភ្លាមនោះក៏មានសាច់ញាតិជនរងគ្រោះនិងនគរបាលមូលដ្ឋានមកដល់ ទើបជនដៃដល់ បើកឡានរត់គេចខ្លួន ទាំងបន្សល់ចោលរថយន្ត១គ្រឿងនៅកន្លែងកើតហេតុ។
សមត្ថកិច្ចក៏បានយករថយន្តនោះទៅរក្សាទុកនៅអធិការដ្ឋាននគរបាលស្រុកទ្រាំង។ រីឯជនរងគ្រោះត្រូវបានសាច់ញាតិដឹកទៅសង្គ្រោះនៅមន្ទីរពេទ្យនេសា ក្នុងទីរួមខេត្តតាកែវ។
សូមបញ្ជាក់ថា, មន្ត្រីនគរបាលយុត្តិធម៌ តំណាងអយ្យការ ចៅក្រមស៊ើបសួរសាលាដំបូងខេត្តតាកែវ បានយកចិត្តទុកដាក់អនុវត្តតាមនីតិវិធី រហូតដល់មានការគាំទ្រយ៉ាងខ្លាំងពីមជ្ឈដ្ឋានទូទៅរបស់ប្រជាពលរដ្ឋ ដើម្បីបំបាត់នូវនិទណ្ឌភាព នៃការប្រព្រឹត្តបទល្មើស ដែលបង្កឡើងដោយកម្លាំងមានសមត្ថកិច្ច ជនមានអំណាច បុគ្គលប្រដាប់ដោយអាវុធ ធ្វើឱ្យមានការរៀងចាល និងចូលរួមគោរពច្បាប់ ស្មើភាពគ្នា ៕
ដោយ៖ ស្អាង ជ័យ
