មនុស្សចំនួន៤នាក់ បានស្លាប់ និងរងរបួសធ្ងន់ម្នាក់ ក្នុងករណីគ្រោះថ្នាក់ចរាចរណ៍រថយន្តបុកម៉ូតូឈប់នៅចិញ្ចើមផ្លូវបម្រុងឆ្លងថ្នល់

ខេត្តពោធិ៍សាត់៖ ស្នងការដ្ឋាន​នគរបាល​ជាតិ​ នៅព្រឹកថ្ងៃ​ចន្ទ​ទី​១៧​ ខែមេសា​ ឆ្នាំ​២០២៣នេះ​ បានឱ្យដឹងថា​ មនុស្សចំនួន៤នាក់ បានស្លាប់ និងរងរបួសធ្ងន់ម្នាក់ ក្នុងករណីគ្រោះថ្នាក់ចរាចរណ៍រថយន្តបុកម៉ូតូឈប់នៅចិញ្ចើមផ្លូវបម្រុងឆ្លងថ្នល់​ កាលពីយប់ថ្ងៃអាទិត្យ ទី១៦ ខែមេសា ឆ្នាំ២០២៣ វេលាម៉ោង២០៖៥៨នាទី នៅលើផ្លូវជាតិលេខ៥ (ផ្លូវកោង) ចន្លោះគីឡូម៉ែត្រ១៥៤-១៥៥ ស្ថិតក្នុងភូមិកណ្ដាល ឃុំអន្លង់ត្នោត ស្រុកក្រគរ ខេត្តពោធិ៍សាត់។

ប្រភពដដែលបន្តថា​ ក្នុងហេតុការណ៍ខាងលើបណ្ដាលឲ្យខូចខាតរថយន្ត០១គ្រឿង ម៉ូតូ០១គ្រឿង ស្លាប់ និងរងរបួសមនុស្ស មានចំនួន០៥នាក់ស្រី០២ក្នុងនោះ, ស្លាប់០៤នាក់ ស្រី០២នាក់ (ស្លាប់កូនក្នុងផ្ទៃពោះ ៩ខែ០១នាក់) នៅកន្លែងកើតហេតុ។ រងរបួសធ្ងន់០១នាក់ប្រុស (បានបញ្ជូនទៅសង្រ្គោះបន្ទាន់នៅមន្ទីរពេទ្យបង្អែកខេត្តពោធិ៍សាត់)។

សមត្ថកិច្ចបានបន្តថា រថយន្តម៉ាក MG.RX5 ពណ៌ស ពាក់ផ្លាកលេខ កម្ពុជា NARY7170 (ធ្វើចរាចរណ៍ពីកើតទៅលិច) បើកបរដោយឈ្មោះ ញិល ឆេងកុសល ភេទប្រុស អាយុ៣៣ឆ្នាំ ជនជាតិខ្មែរ រស់នៅភូមិក្បាលហុង សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ (មិនរងរបួស)។ ម៉ូតូរងគ្រោះម៉ាក HONDA.C125ស៊េរីឆ្នាំ017 ពណ៌ខ្មៅ ពាក់ផ្លាកលេខ 1W-3374 (ធ្វើចរាចរណ៍ពីជើងទៅត្បូងទិសដៅទៅកើត) បើកបរដោយឈ្មោះ ណា រ៉ូ ភេទប្រុស អាយុ៤១ឆ្នាំ ជនជាតិខ្មែរ រស់នៅភូមិផ្សារ ឃុំអន្លង់ត្នោត ស្រុកក្រគរ ខេត្តពោធិ៍សាត់ (ស្លាប់)។

អ្នករួមដំណើរទី១-ឈ្មោះ សុខ គីមឡាង ភេទស្រី អាយុ៣៨ឆ្នាំ ជនជាតិខ្មែរ រស់នៅភូមិ ឃុំជាមួយគ្នា ត្រូវជាប្រពន្ធ (ស្លាប់ទាំងកូនក្នុងផ្ទៃ)។

អ្នករួមដំណើរទី២-ឈ្មោះ ណាប៊ិន យ៉ា ភេទស្រី អាយុ៣ឆ្នាំ ជនជាតិខ្មែរ រស់នៅភូមិ ឃុំជាមួយគ្នា ត្រូវជាកូន (ស្លាប់)។

អ្នករួមដំណើរទី៣-ឈ្មោះ ណាប៊ិន កេត ភេទប្រុស អាយុ៥ឆ្នាំ ជនជាតិខ្មែរ រស់នៅភូមិ ឃុំជាមួយគ្នា ត្រូវជាកូន (រងរបួសធ្ងន់)។

  ជុំវិញករណីខាងលេីនេះ​លោក កូយ កាន់យ៉ា ព្រះរាជអាជ្ញា នៃអយ្យការអមសាលាដំបូងខេត្តពោធិ៍សាត់ នៅថ្ងៃទី១៦ ខែមេសា ឆ្នាំ២០២៣ វេលាម៉ោង២១និង២១នាទីយប់ បានបញ្ជាតាមទូរស័ព្ទឱ្យកំណត់ហេតុប្រគល់/ទទួលសពឱ្យទៅក្រុមគ្រួសារយកទៅធ្វើបុណ្យតាមប្រពៃណី។ ចំណែក​វត្ថុតាងបានប្រគល់រក្សាទុកនៅការិយាល័យនគរបាលចរាចរណ៍ផ្លូវគោកខេត្តពោធិ៍សាត់៕

ដោយ៖ អរុណរះ