សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ ក្មេងស្ទាវពីរនាក់ជិះម៉ូតូមួយគ្រឿងម៉ាកPCXពណ៌សអត់ស្លាកលេខដេញកាប់បុរស៣នាក់បណ្ដាលឲ្យរងរបួសធ្ងន់ស្រាល ខណៈមេឃកំពុងរលឹមស្រិចៗតាមបណ្ដោយផ្លូវបេតុងនៅវេលាម៉ោងប្រហែល៧និង១០នាទីព្រឹកចំណុចខាងត្បូងអគារ៨ជាន់(K) ស្ថិតនៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ។
សមត្ថកិច្ចក្នុងហេតុការណ៍បានឱ្យដឹងថា ជនរងគ្រោះមានឈ្មោះ ទី១- ឈ្មោះ ថន តង ភេទប្រុស អាយុ៣០ឆ្នាំ រងរបួសធ្ងន់, ទី២- ឈ្មោះ សៀម ម៉េងឡុង ភេទប្រុស អាយុ១៨ឆ្នាំ រងរបួសត្រូវប្រអប់ដៃខាងឆ្វេង, ទី៣- ឈ្មោះ រុង ភារម្យ ភេទប្រុស អាយុ២៨ឆ្នាំ រងរបួសស្រាល អ្នកទាំងបីនាក់រស់នៅភូមិទំនប់ក៥ សង្កាត់-ក្រុងប៉ោយប៉ែត។
សមត្ថកិច្ចបន្តថា មុនពេលកើតហេតុ ជនរងគ្រោះបានជិះម៉ូតូម៉ាកហុងដា ស៊េរីឆ្នាំ2022 ពណ៌ខ្មៅ ពាក់ស្លាកលេខប/ជ 1Y-3688 មកដល់ចំណុចកើតហេតុជនបង្កមានគ្នាចំនួន២នាក់ មិនស្គាល់អត្តសញ្ញាណ បើកបរម៉ូតូម៉ាកPCX ពណ៌ស គ្មានស្លាកលេខ បានដកដាវចេញពីស្រោមកាប់ទៅលើជនរងគ្រោះតែម្តង បន្ទាប់ពីធ្វើសកម្មភាពរួចជនសង្ស័យជិះម៉ូតូរត់គេចខ្លួនបាត់។
សមត្ថកិច្ចបញ្ជាក់ថាៈក្រោយពីកើតហេតុភ្លាមៗនោះកម្លាំងប៉ុស្តិ៍បានចុះទៅដល់កន្លែងកើតហេតុ សហការជាមួយកម្លាំងប៉ុស្តិ៍នគរបាលរដ្ឋសង្កាត់អូរជ្រៅ ជួយលើកជនរងគ្រោះដាក់លើម៉ូតូកង់បី ដឹកយកសង្គ្រោះនៅមន្ទីរពេទ្យបង្អែកប៉ោយប៉ែត(ដីថ្មី) ចំណែកឯម៉ូតូជនរងគ្រោះ ត្រូវបាកម្លាំងប៉ុស្តិ៍នគរបាលរដ្ឋសង្កាត់អូរជ្រៅ យកទៅរក្សាទុក ។
បញ្ហាខាងលើនេះលោកអធិការក្រុងប៉ោយប៉ែតមានប្រសាសន៍តាមប្រព័ន្ធតេលេក្រាមថាៈលោកទទួលបានព័ត៌មានហើយ ពេលនេះកម្លាំងជំនាញកំពុងតែស្រាវជ្រាវរកមុខសញ្ញា ៕
ដោយ ៖ វណ្ណា
