សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សាលាគណរាជធានីភ្នំពេញ យោងស្មារតីអង្គប្រជុំ នារសៀលថ្ងៃព្រហស្បតិ៍ ១កើត ខែពិសាខ ឆ្នាំថោះ បញ្ចស័ក ព.ស.២៥៦៦ ត្រូវនឹងថ្ងៃទី២០ ខែមេសា ឆ្នាំ២០២៣ របស់រដ្ឋបាលរាជធានីភ្នំពេញ សាលាគណរាជធានីភ្នំពេញ និងជំនាញពាក់ព័ន្ធ សូមប្រគេនព្រះអនុគណខណ្ឌទាំង១៤ ព្រះចៅអធិការ គ្រប់វគ្គ ព្រះមេត្តាជ្រាបដ៏ខ្ពង់ខ្ពស់ថា រដ្ឋបាលរាជធានីភ្នំពេញ នឹងរៀបចំពិធីដង្ហែព្រះអគ្គិជ័យកីឡា ពីតំបន់អាស៊ានចូលមកព្រះរាជាណាចក្រកម្ពុជា តាមច្រកទ្វារព្រំដែនអន្តរជាតិ ត្រពាំងគៀល-ណងណុក យៀន ខេត្តស្ទឹងត្រែង និងដង្ហែបន្តឆ្ពោះទៅតាមបណ្តាខេត្តជុំវិញបឹងទន្លេសាប។
នៅថ្ងៃសុក្រ ៩កើត ខែពិសាខ ឆ្នាំថោះ បញ្ចស័ក ព.ស.២៥៦៦ ត្រូវនឹងថ្ងៃទី២៨ ខែមេសា ឆ្នាំ ២០២៣ វេលាម៉ោង ១៧ : ២០ នាទី សាលាគណ សូមស្នើព្រះអនុគណ ព្រះចៅអធិការគ្រប់វត្តអារាម ក្នុងរាជធានីភ្នំពេញ ព្រះមេត្តា វាយជួង រគាំង និងទូងស្គរ ឱ្យបានកងរំពងគ្រប់វត្តអារាម ដើម្បីចូលរួម អបអរសាទរក្នុងពិធីទទួល និងដង្ហែព្រះអគ្គិជ័យកីឡា ពីត្រង់ចំណុចផ្សារព្រែកអញ្ចាញ ស្ពានទី១២ ព្រំ ប្រទល់ខេត្តកណ្តាល-រាជធានីភ្នំពេញ បន្តឆ្ពោះទៅចំណុចវមណីយដ្ឋានវត្តភ្នំ នឹងទៅតម្កល់រក្សាទុកនៅ វត្តលង្កាព្រះកុសុមារាម រហូតដល់ចប់ក្បួនដង្ហែ។
សេចក្ដីដូចបានទូល-ថ្វាយ និងប្រគេនខាងលើ សូមព្រះអនុគណៈ និងព្រះចៅអធិការគ្រប់វគ្គ ព្រះមេត្តាចូលរួមសហការអនុវត្តដោយសេចក្តីសោមនស្សរីករាយ៕
ដោយ ៖ សិលា
