🔴នាយអាវុធហត្ថខេត្តកំពង់ធំ លោក ណុប ពុត្ថា ដើរតួជាសមត្ថកិច្ចមន្ត្រីយុត្តិធម៌នគរបាល ចរាចរណ៍ ចេញមុខបង្ខំអោយប្រជាពលរដ្ឋបើកគោយន្ត សង៦លានរៀល (មានវីដេអូ)

ខេត្តកំពង់ធំ ៖ លោក ណុប ពុត្ថា ជំនួយការ ការិយាល័យគ្រឿងញៀន នៃកងរាជអាវុធហត្ថខេត្តកំពង់ធំ កំពុងដើរតួគ្រប់សមត្ថកិច្ច អនុវត្ត ខុសពីតួនាទី ភារកិច្ច របស់ខ្លួន ក្នុងនាមជានាយអាវុធហត្ថ១រូប ដែលថ្នាក់លើ សាមីអង្គភាព ត្រូវមានវិធានការចំពោះបុគ្គលនេះ អោយមានប្រសិទ្ធភាពផង ខណៈគាត់មានឈ្មោះបោះសំឡេងខាង ប្រមូលលុយបទល្មើសឈើហើយ មកដើរតួជាមន្ត្រីនគរបាលចរាចរណ៍ថែមទៀត ខ្លាំងមែន ចរិកបំពានច្បាប់ ដែលខ្លួនហ៊ានធ្វើ ។

ជាក់ស្តែងមាន គណនី facebook មួយមានឈ្មោះថា, (ហៀង ធូ) Tage ទៅកាន់គណនី facebook ដល់ ៩៩នាក់ទៀត បានបង្ហោះមុននេះ ១២ម៉ោង យ៉ាងដូច្នេះថា, (នៅរំលងអាធ្រាត ថ្ងៃទី២៩ ខែមេសា ឆ្នាំ២០២៣ ខ្ញុំបានបត់គោយន្តចូលផ្ទះ ហើយបានប៉ះពាល់ឡានដែលកំពុងបើកបរពីក្រោយ។ ម្ចាស់ឡានឈ្មោះ #ណុប_ពុត្ថា ជាកងរាជអាវុធហត្ថខេត្តកំពង់ធំ ហើយបានទារសំណងចំនួន ៦,០០០,០០០៛(ប្រាំមួយលានរៀល) តែខ្ញុំសុំត្រឹម៤,០០០,០០០៛(បួនលានរៀល)និងបានឲ្យរួចហើយ ដោយគិតថាចប់ត្រឹមហ្នឹង។ ប៉ុន្តែពេលរសៀល ថ្ងៃខែឆ្នាំដដែល លោក ណុប ពុត្ថា បានយកឡានមកស្ទូចគោយន្តខ្ញុំដែលដាក់ក្នុងផ្ទះ ព្រមទាំងយកសំបកជនាឈើ ដែលខ្ញុំយកមកប្រើប្រាស់ជាគ្រួសារប៉ុនណោះទៅផងដែរ។

ដូចនេះសូម ជម្រាបជូន សម្តេចពុក ព្រមទាំងសមត្ថកិច្ចគ្រប់ជាន់ថ្នាក់ មេត្តាជួយរកយុត្តិធម៌ដល់ក្រុមគ្រួសារយើងខ្ញុំផង!👏👏👏

facebook ដដែលបានបន្តថា, #បញ្ជាក់ហេតុការណ៍នេះ កើតឡើងនៅភូមិបន្ទាយចាស់ ឃុំត្នោតជុំ ស្រុកបារាយណ៍ ខេត្តកំពង់ធំ!

ពាក់ព័ន្ធក្នុងករណីនេះ លោកឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ នៅព្រឹកថ្ងៃទី ៣០ ខែមេសា ឆ្នាំ២០២៣ បានប្រាប់អង្គភាពមជ្ឈមណ្ឌលព័ត៌មាន”នគរវត្ត” តាមទូរសព្ទយ៉ាងដូច្នេះថា, តាមពិតរឿងនេះ ឈ្មោះ ណុប ពុត្ថា បានទៅចូលរួមសហការ ជាមួយតំណាងអយ្យការ ដើម្បីចាប់យកគោយន្តដឹកជំនាឈើចំនួន ៤ គ្រឿង ប៉ុន្តែលោក  ណុប ពុត្ថា បានយកឡានរបស់ខ្លួន ទៅដាក់ពាំង ទើបបណ្ដាលឲ្យគោយន្តប៉ះរថយន្តគាត់។ លោកឧត្តមសេនីយ៍ត្រី មាស យ៉ត បានបន្តថា , លោក ណុប ពុត្ថា ខ្លាចអត់បានលុយជួសជុលរថយន្ត ក៏ព្យាយាមឲ្យម្ចាស់គោយន្ត សងសំណង ៦លានរៀល ចំណុចនេះជាអំពើខុសឆ្គង មិនត្រូវដើរតួជាមន្ត្រីនគរបាលចរាចរណ៍ ហើយចេញមុខទាមទារប្រាក់ ពីម្ចាស់គោយន្តដោយខ្លួនឯង ធ្វើជាមន្ត្រីនគរបាលចរាចរណ៍ខ្លួនឯង សុទ្ធតែជារឿងមិនត្រឹមត្រូវ។ ម្យ៉ាងទៀតខ្ញុំទើបនឹងទទួលបានព័ត៌មានបឋមផងដែរអំពីបញ្ហាទាំងអស់នេះ។ 

លោកឧត្តមសេនីយ៍ត្រីបន្តថា, ខ្ញុំបានឱ្យធ្វើការសម្របសម្រួលជុំវិញបញ្ហាករណីប៉ះរថយន្តជាមួយគោយន្តនោះបញ្ចប់ទៅ ដោយឱ្យទៅខាងជំនាញមន្ត្រីនគរបាលចរាចរណ៍ជាអ្នកចាត់ចែង ។ ដោយឡែកចំពោះបញ្ហាគោយន្ត ៤ គ្រឿង ដែលពាក់ព័ន្ធនឹងករណីដឹកជញ្ជូនអនុផលព្រៃឈើ ទុកឱ្យខាងតំណាងអយ្យការ និងជំនាញរដ្ឋបាលព្រៃឈើ ចាត់ចែងតាមនីតិវិធីចុះ។ 

ចំពោះបញ្ហាដែលពាក់ព័ន្ធថា, លោក ណុប ពុត្ថា និង លោក ព្រហ្ម វាសនា បានកាន់លិខិតបេសកកម្ម អង្គភាពអាវុធហត្ថខេត្ត ជាអ្នកដើរប្រមូលប្រាក់ពីបទល្មើសព្រៃឈើនោះ អោយមេបញ្ជាការរង កងរាជអាវុធហត្ថខេត្តនោះ ! លោកឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំបានបញ្ជាក់ប្រាប់ថា , ចំពោះខ្ញុំដាច់ខាត មិនឱ្យមន្ត្រីអាវុធហត្ថណាមួយ ពាក់ព័ន្ធនិងបទល្មើសព្រៃឈើ ឬបទល្មើសអ្វីនោះឡើយ ។ ខ្ញុំក៏ត្រូវបានគេចោទប្រកាន់ ថាខ្លាចឈ្មួញឈើឈ្មោះរ៉េត យ៉ាងរួញខ្លួន មិនហ៊ានបង្ក្រាប រហូតដល់ករណីនេះ មេធំបានសួរនាំ ។ ប៉ុន្តែដោយខ្ញុំជាប់មានភារកិច្ចមករៀនផ្នែកជំនាញការងារមួយរយៈ ក៏មានករណីពីរកើតឡើង ទី១ថាខ្ញុំ ខ្លាចឈ្មួញឈើ ឈ្មោះ រ៉េត  ,ទី២ មានករណី លោក ណុប ពុត្ថា ចេញមុខធ្វើជាមន្ត្រីនគរបាលចរាចរណ៍សុទ្ធតែជារឿងខុស។ ដូច្នេះជាបឋមខ្ញុំគ្រាន់តែជម្រាបជូនថា រឿងលោក ណុប ពុត្ថា ត្រូវតែដោះស្រាយបញ្ចប់ជាមួយម្ចាស់គោយន្ត តាមនីតិវិធីដោយមន្ត្រីនគរបាលចរាចរណ៍ , ចំពោះករណីថាខ្ញុំខ្លាចឈ្មួញឈើ ខ្ញុំនឹងមានវិធានការ ស៊ើបអង្កេត ស្រាវជ្រាវ ខណៈខ្ញុំមានវិធានការបំផុតចំពោះការបង្ក្រាបបទល្មើសព្រៃឈើ។ 

សូមរម្លឹកថា, លោកវរៈសេនីយ៍ឯក ឃុន ប៊ុនហូ មេបញ្ជាការរង កងរាជអាវុធហត្ថខេត្ត មានជាប់ពាក់ព័ន្ធចំពោះការទទួលផលប្រយោជន៍ពីបទល្មើសព្រៃឈើ។ នេះបើយោងតាមការទម្លាយឲ្យដឹងពីមន្ត្រី ខណៈលោកស័ក្តិប្រាំរូបនេះ មានសិទ្ធិ ស្នើសុំឲ្យលោកមេបញ្ជាការខេត្ត ចេញលិខិតបេសកកម្មឲ្យមន្ត្រីរបស់ខ្លួន ហើយទៅប្រព្រឹត្តផ្ទុយពីគោលការណ៍របស់អង្គភាព។ 

 ដោយឡែកលោកវរ:សេនីយ៍ត្រី ព្រហ្ម វាសនា   អនុប្រធានមន្ទីរព័ត៌មានសន្តិសុខ កងរាជអាវុធហត្ថខេត្តកំពង់ធំ ជាអ្នកដើរប្រមូលសេដ្ឋកិច្ចពីបទល្មើសព្រៃឈើ និងជាដៃស្ដាំរបស់លោកវរៈសេនីយ៍ឯក ឃុន ប៊ុនហូ នោះតែម្តង ។

 ពាក់ព័ន្ធករណីនេះ លោកវរៈសេនីយ៍ឯក ឃុន ប៊ុនហូ មេបញ្ជាការរង កងរាជអាវុធហត្ថខេត្តកំពង់ធំ  បានប្រាប់អង្គភាពមជ្ឈមណ្ឌលព័ត៌មាន” នគរវត្ត” តាមទូរស័ព្ទថា, ខ្ញុំសូមប្រាប់ការពិត ខ្ញុំមិនបានពាក់ព័ន្ធជាមួយនឹងសេដ្ឋកិច្ចបទល្មើសព្រៃឈើឡើយ។ និយាយរួមប៉ុន្មានថ្ងៃនេះ ខ្ញុំទេដែលកំពុងមមាញឹក អនុវត្តតាមបទបញ្ជាមេ ចុះបង្ក្រាបបទល្មើសព្រៃឈើ ស៊ើបអង្កេត តាមដាន ។

ចំពោះករណីផ្សេងៗ មានតែលោកមេបញ្ជាការទេ និងអ្នកនាំពាក្យ ក្នុងការបំភ្លឺបកស្រាយ ជូនសាធារណជនបានដឹង។ 

 សូមបញ្ជាក់ថា, សកម្មភាពរបស់ លោក ណុប ពុត្ថា ដែលដើរតួជាមន្ត្រីនគរបាលចរាចរណ៍ ចេញមុខគំរាមអ្នកបើកគោយន្ត និងទារលុយដោយខ្លួនឯង អនុវត្តច្បាប់ដោយខ្លួនឯង ជាអំពើខុសឆ្គងបំផុត ក្នុងនោះសូម្បីតែលោកមេបញ្ជាការកងរាជអាវុធហត្ថខេត្ត ក៏ចាត់ទុកថានេះជាការប្រព្រឹត្តអំពើខុសច្បាប់ លោកក៏មានវិធានការផងដែរ។

នៅថ្ងៃទី៣០ ខែមេសា ឆ្នាំ២០២៣ លោកឧត្តមសេនីយ៍ត្រី អេង ហុី អ្នកនាំពាក្យកងរាជអាវុធហត្ថលើផ្ទៃប្រទេស បានបញ្ជាក់ផងដែរថា, នៅថ្ងៃទី៣០ ខែមេសា ឆ្នាំ២០២៣ កងរាជអាវុធហត្ថបានឃើញអត្ថបទរូបភាពព័ត៌មានពាក់ព័ន្ធនឹងយោធិននៃកងរាជអាវុធហត្ថខេត្តកំពង់ធំ ដែលគ្រោះថ្នាក់ចរាចរណ៍រវាងរថយន្ដនិងគោយន្ដ ហើយមានការទារលុយ និងស្ទួចយកគោយន្តនោះផងដែរ។

ខ្ញុំបាទ ឧត្តមសេនីយ៍ត្រី អេង ហុី អ្នកនាំពាក្យកងរាជអាវុធហត្ថលើផ្ទៃប្រទេស សូមគោរពជម្រាបជូនសាធារណជន អ្នកសារព័ត៌មាន និងបុគ្គលដែលពាក់ព័ន្ធជ្រាបថា ឯកឧត្តម នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស បានបញ្ជាឱ្យលោកឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ ធ្វើការត្រួតពិនិត្យករណីខាងលើនិងដោះស្រាយដោយគោរពគោលការណ៍ “ការពារ បម្រើ និងសង្គ្រោះប្រជាពលរដ្ឋ”។

សូមគោរពជូនសាធារណជន អ្នកសារព័ត៌មាន និងបុគ្គលដែលពាក់ព័ន្ធជ្រាបជាព័ត៌មាន។ សូមគោរពអរគុណ ៕

IMG_1943 IMG_1942 IMG_1944

ដោយ ៖ សហការី