គិតត្រឹមម៉ោង៣រសៀលថ្ងៃទី៧ឧសភានេះ កម្ពុជាបន្ដឈរលេខរៀងទី១ ទទួលមេដាយច្រើនជាងគេ ៦០គ្រឿង

ភ្នំពេញ ៖ គិតត្រឹមម៉ោង៣រសៀលថ្ងៃទី៧ ខែឧសភា ឆ្នាំ២០២៣នេះ កម្ពុជាបន្ដឈរលេខរៀងទី១ ទទួលមេដាយច្រើនជាងគេ ៦០គ្រឿង ក្នុងនោះមាសចំនួន២៥, ប្រាក់ចំនួន១៦ និងសំរិទ្ធចំនួ​ន១៩។ នេះបើយោងតាមការបញ្ជាក់ពី លទ្ធផលផ្លូវការរបស់ SeaGames 2023 ។

SEA Games 2023: បង្ហាញឲ្យដឹងថា គិតត្រឹមម៉ោង៣រសៀលថ្ងៃទី៧ ខែឧសភា ឆ្នាំ២០២៣នេះ កម្ពុជាបន្ដឈរលើកំពូលតារាង មានមេដាយច្រើនជាងគេចំនួន ៦០គ្រឿង ក្នុងនោះមេដាយមាស ២៥គ្រឿង, មេដាយប្រាក់ចំនួន ១៦គ្រឿង និងមេដាយសំរិទ្ធចំនួន ១៩គ្រឿង។

ថ្នាក់ដឹកនាំជាច្រើនស្ថាប័ន បានតាមដាន នៃព្រឹត្តិការណ៍ស៊ីហ្គេមលើកទី៣២ បង្ហោះលើ facebook ជាបន្តបន្ទាប់ គាំទ្រ អ្វីដែលខ្មែរធ្វើបាន។ 

សូមបញ្ជាក់ថា, នៅរាត្រីថ្ងៃទី៥ ខែឧសភា ឆ្នាំ២០២៣នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញប្រកាសបើកព្រឹត្តិការណ៍នៃការប្រកួតកីឡាស៊ីហ្គេម លើកទី៣២ ជាផ្លូវការ ប្រកបដោយភាពរីករាយ និងមោទកភាពបំផុតសម្រាប់កម្ពុជាដែលធ្វើជាម្ចាស់ផ្ទះ។

នៅក្នុងឱកាសនោះ សម្តេចតេជោ នាយករដ្ឋមន្ត្រីបានមានប្រសាសន៍លើកឡើងនូវពាក្យស្លោកថា កីឡារស់នៅក្នុងសន្តិភាព សន្តិភាពដើម្បីទាំងអស់គ្នា ទាំងអស់គ្នាដើម្បីសន្តិភាព។

សម្តេចតេជោ ហ៊ុន សែន ក៏បានថ្លែងអំណរគុណចំពោះវត្តមាន លោក ថងលួន ស៊ីសូលីត ប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ ដែលបានអញ្ជើញមកបើកព្រឹត្តិការណ៍ស៊ីហ្គេមនៅកម្ពុជា ថ្លែងអំណរគុណតំណាងគណៈកម្មាធិការអូឡាំពិកអន្ដរជាតិ (IOC) កីឡាករ កីឡាការិនី និងបងប្អូនប្រជាពលរដ្ឋ ដែលចូលរួម និងគាំទ្រដល់ព្រឹត្តិការណ៍ស៊ីហ្គេមនេះ៕

ដោយ ៖ សិលា