សារព័ត៌មាន នគរវត្ត តែងតែនាំមុខគេជានិច្ច
កាលពីថ្ងៃទី ៨ ឧសភា កងទ័ពអាកាសឥណ្ឌាបាននិយាយថា យន្តហោះចម្បាំង MiG-21 របស់កងកម្លាំងនេះបានធ្លាក់ចូលទៅក្នុងផ្ទះមួយនៅក្នុងភូមិមួយក្នុងរដ្ឋ Rajasthan ។យោងតាមការប្រកាសរបស់កងទ័ពអាកាសឥណ្ឌា យន្តហោះ MiG-21 កៅអីតែមួយបានធ្លាក់ បន្ទាប់ពីអ្នកបើកបរមានអាសន្នហើយបានចុចប៊ូតុងសង្គ្រោះបន្ទាន់យ៉ាងលឿនដើម្បីចេញ ហើយបច្ចុប្បន្នមានរបួសតិចតួចប៉ុណ្ណោះ។
ទោះបីជាយ៉ាងណាក៏ដោយ កម្ទេចកម្ទីយន្តហោះបានធ្លាក់លើផ្ទះមួយខ្នងនៅភូមិ Bahlol Nagar ក្នុងសង្កាត់ Hanumangarh ជាអកុសលបានសម្លាប់មនុស្ស 3 នាក់ និងជាច្រើននាក់ទៀតរងរបួសនៅលើដី។
យោងតាមសេចក្តីប្រកាស កងទ័ពអាកាសឥណ្ឌាបាននិយាយថា មូលហេតុនៃឧបទ្ទវហេតុនេះកំពុងត្រូវបានស៊ើបអង្កេតដោយអាជ្ញាធរ។
អ្នកបើកយន្តហោះដែលបានរៀបរាប់ខាងលើបានខិតខំប្រឹងប្រែងដើម្បីនាំយកយន្តហោះទៅកាន់តំបន់ជាយក្រុង កាត់បន្ថយចំនួនមនុស្សស្លាប់។
បច្ចុប្បន្ននៅកន្លែងកើតហេតុមនុស្សជាង២.០០០នាក់បានប្រមូលផ្តុំ។ ប៉ូលិស និងអាជ្ញាធរមូលដ្ឋានកំពុងប្រឹងប្រែងរក្សាសណ្តាប់ធ្នាប់។
ឧបទ្ទវហេតុនេះកើតឡើងបន្ទាប់ពីឧបទ្ទវហេតុដ៏ធ្ងន់ធ្ងរមួយទៀតដែលបានកើតឡើងក្នុងខែមករា ដែលអ្នកបើកយន្តហោះម្នាក់បានស្លាប់ ពេលដែលយន្តហោះចម្បាំងរបស់កងទ័ពអាកាសឥណ្ឌាពីរគ្រឿងគឺ Sukhoi Su-30 និង Mirage 2000 បានធ្លាក់ក្នុងអំឡុងពេលហោះហើរក្នុងរដ្ឋ Rajasthan ៕ ដោយ៖ ធីរីណា
រូបថត ៖ PTI
