សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់ ៖ សមត្ថកិច្ចឃាត់ចាប់ខ្លួនដាក់ខ្នោះដៃបន្ទាប់បុរសសង្ស័យរូបនេះ គំរាមសម្លាប់ឪពុកបង្កើត វាយកម្ទេចបង្អួចផ្ទះច្រើនវង់ ដុតបំផ្លាញគ្រែ និងសម្លាប់សត្វពាហនៈ(គោ)១ក្បាលផងនោះ ដែលគេសង្ស័យប្រើប្រាស់គ្រឿងញៀនហួសកម្រិត ។
ហេតុការណ៍សមត្ថកិច្ចឃាត់ខ្លួនបុរសសង្ស័យស្រវឹងគ្រឿងញឿននេះ ធ្វើឡើងកាលពីម្សិលមិញ ថ្ងៃព្រហស្បត្តិ៍ ៧រោច ខែពិសាខ ឆ្នាំថោះ បព្ចាស័ក ព.ស ២៥៦៧ ត្រូវនឹងថ្ងៃទី១១ ខែឧសភា ឆ្នាំ២០២៣ ត្រង់ចំណុចផ្ទះរបស់ឈ្មោះ កែវ ឡាយ ភេទប្រុស ៦៥ឆ្នាំ ជនជាតិខ្មែរ មុខរបរ កសិករ ស្ថិតនៅ ភូមិដង្គារ សង្កាត់ផ្ទះព្រៃ ក្រុង.ខេត្តពោធិ៍សាត់(ត្រូវជាឪពុកបង្កើតជនសង្ស័យ)។
របាយការណ៍នគរបាលក្រុងពោធិ៍សាត់ឃើញថា ជនសង្ស័យមានឈ្មោះ ឡឹង គា ភេទប្រុស អាយុ ២៩ឆ្នាំ ជនជាតិខ្មែរ បច្ចុប្បន្ន រស់នៅជាមួយឪពុក ស្ថិតនៅភូមិ.សង្កាត់កើតហេតុ ។
របាយការណ៍សមត្ថកិច្ចនគរបាលក្រុងដដែល ការឃាត់ខ្លួនជនសង្ស័យរូបនេះ ធ្វើឡើងក្រោយជននេះធ្វើសកម្មភាពវាយកម្ទេចបង្អួចផ្ទះចំនួន៤វង់ សម្លាប់សត្វពាហនៈចំនួន១ក្បាល ដុតគ្រែ១គ្រឿង និងគំរាមសម្លាប់ឪពុក ។បច្ចុប្បន្ន ជនសង្ស័យកំពុងបន្តនីតិវិធី នៅអធិការដ្ឋាននគរបាលក្រុងពោធិ៍សាត់ ៕
ដោយ៖ ប៉ឹម ពិន
