សារព័ត៌មាន នគរវត្ត តែងតែនាំមុខគេជានិច្ច
ប្រធានក្រុមជម្រើសជាតិអាហ្សង់ទីន Lionel Messi នឹងដឹកនាំក្រុមរបស់គាត់ប្រកួតជាមួយអូស្ត្រាលីក្នុងការប្រកួតមិត្តភាពនៅទីក្រុងប៉េកាំងនៅខែក្រោយជាមួយនឹងដំណើរទស្សនកិច្ចលើកដំបូងរបស់គាត់ទៅកាន់ប្រទេសចិនក្នុងរយៈពេល៦ឆ្នាំដែលគ្រោងនឹងធ្វើឱ្យមានការប្រទាញប្រទង់គ្នាយ៉ាងខ្លាំងសម្រាប់សំបុត្រទស្សនា។
ស្ថានទូតអាហ្សង់ទីនប្រចាំប្រទេសចិនបានប្រកាសកាលពីថ្ងៃអង្គារថាម្ចាស់ជើងឯក World Cup អាហ្សង់ទីននឹងប្រកួតជាមួយអូស្ត្រាលីនៅថ្ងៃទី១៥ ខែមិថុនា ដោយនាំ Messi មកកាន់ប្រទេសនេះជាលើកដំបូងចាប់តាំងពីឆ្នាំ២០១៧។
ការប្រកួតនេះនឹងក្លាយជាលើកទី៧ហើយដែលកីឡាករវ័យ៣៥ឆ្នាំរូបនេះបានទៅលេងប្រទេសចិន ហើយមកដល់ពេលដែលអនាគតរបស់គាត់នៅក្លិប Paris Saint-Germain ជាប្រធានបទនៃការរំពឹងទុកយ៉ាងខ្លាំង។ ប្រភពជិតស្និទ្ធនឹងកីឡាកររូបនេះបានឲ្យដឹងថា គាត់បានទទួលសំណើជាផ្លូវការដើម្បីចូលរួមជាមួយក្លិបអារ៉ាប៊ីសាអ៊ូឌីត Al-Hilal នៅរដូវកាលក្រោយ។
Messi បានទទួលការស្វាគមន៍យ៉ាងក្លៀវក្លារាល់ការមកលេងប្រទេសចិនកាលពីមុនរបស់គាត់ ដែលមានអ្នកគាំទ្របាល់ទាត់យ៉ាងច្រើន បើទោះបីជាក្រុមជម្រើសជាតិបុរសមិនមានពេលមកប្រទេសនេះញឹកញាប់យ៉ាងណាក៏ដោយ។
ចាប់តាំងពីការធ្វើដំណើរទៅកាន់ប្រទេសចិនលើកដំបូងរបស់គាត់ក្នុងឆ្នាំ២០០៥ Messi បានលេងឱ្យក្រុមអាហ្សង់ទីន ឬអតីតក្លិប Barcelona ក្នុងការប្រកួតមិត្តភាព។ ក្រុមអេស្ប៉ាញបានយកឈ្នះក្រុម Beijing Guoanនៅលីកកំពូលចិន ៣-០ ក្នុងការប្រកួតមិត្តភាពកាលពីឆ្នាំ២០១០។
ព័ត៌មាននៃការប្រកួតមិត្តភាពនេះបានរីករាលដាលយ៉ាងឆាប់រហ័សនៅលើប្រព័ន្ធផ្សព្វផ្សាយសង្គមរបស់ចិន ដោយមានអ្នកគាំទ្រជាច្រើនបានបញ្ចេញអារម្មណ៍យ៉ាងអន្ទះសារចង់ទស្សនាការប្រកួតនេះ។ អ្នកគាំទ្រម្នាក់បាននិយាយនៅលើបណ្ដាញសង្គមថា “ប្រសិនបើខ្ញុំអាចទទួលបានសំបុត្រ ខ្ញុំមិនខ្វល់អ្វីទាំងអស់ ខ្ញុំនឹងចូលទស្សនាការប្រកួតនេះនៅក្នុងប្រទេសរបស់ខ្ញុំ” ៕
ដោយ៖ ភារៈ(រូបភាព ៖ Reuters/CNA)
