សារព័ត៌មាន នគរវត្ត តែងតែនាំមុខគេជានិច្ច
អ្នកចាត់ការទូទៅក្លិបមេឃខៀវ Manchester City លោក Pep Guardiola បានបង្ហើបថា លោកបានទទួលសារពីវីរបុរស Manchester United លោក Sir Alex Ferguson នៅមុនការប្រកួត UEFA Champions League វគ្គផ្តាច់ព្រ័ត្រ។
Man City បានក្លាយជាក្រុមទីពីរក្នុងប្រវត្តិសាស្ត្របាល់ទាត់អង់គ្លេសដែលឈ្នះពាន៣ក្នុងមួយរដូវកាល បន្ទាប់ពីទទួលបានពានរង្វាន់អឺរ៉ុបជាលើកដំបូងរបស់ពួកគេកាលពីយប់ថ្ងៃសៅរ៍ ដោយបានយកឈ្នះក្រុម Inter Milan ១–០ នៅវគ្គផ្តាច់ព្រ័ត្រ។
ក្រុមតែមួយគត់ផ្សេងទៀតដែលសម្រេចបាននូវស្នាដៃបែបនេះគឺ Man Utd ក្រោមការដឹកនាំរបស់លោក Ferguson បានឈ្នះក្នុងឆ្នាំ១៩៩៩ដោយបានឈ្នះពានរង្វាន់ Premier League និង FA Cup មុនពេលផ្តួលក្រុម Bayern Munich ដោយគ្រាប់បាល់ចុងម៉ោងចំនួន២គ្រាប់ក្នុងការប្រកួតវគ្គផ្តាច់ព្រ័ត្រនៃក្របខ័ណ្ឌ Champions League ដ៏អស្ចារ្យ។
Man Utd មានឱកាសវាយលុកសុបិន៣របស់អ្នកជិតខាងដ៏គួរឱ្យរំខានរបស់ពួកគេក្នុងការប្រកួតវគ្គផ្តាច់ព្រ័ត្រ FA Cup កាលពីសប្តាហ៍មុន ប៉ុន្តែពួកគេបានបរាជ័យក្នុងលទ្ធផល ២–១ នៅកីឡដ្ឋាន Wembley ។ គ្រាប់បើកឆាករបស់ Ilkay Gundogan ដែលជាគ្រាប់បាល់លឿនបំផុតក្នុងប្រវត្តិសាស្ត្រវគ្គផ្តាច់ព្រ័ត្រ FA Cup ត្រូវបានលុបចោលដោយការពិន័យពី Bruno Fernandes ប៉ុន្តែខ្សែបម្រើសញ្ជាតិអាឡឺម៉ង់បានគ្រប់គ្រងការប្រកួតជាមួយនឹងគ្រាប់បាល់មួយទៀតនៅតង់ទី២។
Man City មិនបានស្ថិតក្នុងភាពខ្លាំងបំផុតរបស់ពួកគេក្នុងការប្រកួតជាមួយ Inter Milan នៅទីក្រុង Istanbul ហើយត្រូវរង់ចាំរហូតដល់នាទីទី៦៨ដើម្បីបំប៉ោងសំណាញ់ទី។ ការស៊ុតដ៏ល្អរបស់ Rodri ពីខាងក្នុងប្រអប់ចម្ងាយជាង១០ម៉ែត្របានផុតដៃអ្នកចាំទី Andre Onana របស់ Inter Milan ហើយពួកគេបានគ្រប់គ្រងការវាយបកចុងក្រោយពីឱកាសស៊ុតចំគោលដៅរបស់កីឡាករ Inter Milan ។
ថ្លែងទៅកាន់សារព័ត៌មានក្រោយការប្រកួត លោក Guardiola បានសារភាពថា លោក Ferguson បានទាក់ទងគ្នាមុនពេលចាប់ផ្តើមការប្រកួតនៅកីឡដ្ឋាន Ataturk Olympic Stadium។ លោក Guardiola បាននិយាយថា “វាជាកិត្តិយសសម្រាប់ខ្ញុំដែលបាននៅជាមួយ Sir Alex Ferguson។ ខ្ញុំបានទទួលសារពីគាត់កាលពីព្រឹកមិញ សារនោះពិតជាល្អណាស់” ។
លោក Ferguson ត្រូវបានផ្តួល២ដងក្នុងការជួបគ្នាតែពីរលើករបស់គាត់ជាមួយលោក Guardiola កាលពីគាត់ដឹកនាំក្រុម Barcelona ដោយបានទម្លាក់ Man Utd ក្នុងវគ្គផ្តាច់ព្រ័ត្រ Champions League ឆ្នាំ២០០៩ និងឆ្នាំ២០១១។
ឥឡូវនេះលោក Guardiola បានឈ្នះពានរង្វាន់ធំៗចំនួន១២នៅ Man City បូករួមនឹងពានរង្វាន់ Community Shields ២ដងទៀត ដែលធ្វើឲ្យគាត់ក្លាយជាអ្នកចាត់ការដ៏ជោគជ័យបំផុតរបស់ក្លិប ៕
ដោយ៖ ភារៈ(រូបភាព ៖ 90min)
