សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានផ្ដាំដោយមិនចេញឈ្មោះប៉ុន្តែហាក់បីដូចជាទំនងសំដៅទៅលើលោក សម រង្ស៊ី ថាប្រសិនជាចង់ដកមនុស្សរបស់សម្ដេច គឺត្រូវដកមនុស្សទាំងអស់ដែលនៅជុំវិញខ្លួនរបស់ សម រង្ស៊ី។
ថ្លែងនៅក្នុងជំនួបជាមួយនឹងកម្មករជិត ២ម៉ឺននាក់នៅក្នុងខេត្តកំពង់ស្ពឺ ព្រឹកថ្ងៃទី១៧ ខែមិថុនា ឆ្នាំ២០២៣ សម្ដេចតេជោបានលើកឡើងថា សម្ដេចបានទទួលនូវរបាយការណ៍និងព័ត៌មានទាំងអស់ពីផែនការរបស់ សម រង្ស៊ី ព្រមទាំងផែនការនៃការចង់ធ្វើបុណ្យផ្កាដើម្បីប្រមូលលុយពីរអ្នកគាំទ្ររបស់ខ្លួនផងដែរ។
អ្វីដែលកាន់តែច្បាស់ថែមទៀតនោះគឺទិន្នន័យនៃការប្រមូលលុយរបស់ សម រង្ស៊ី ក៏ត្រូវបានសម្ដេចតេជោដឹងផងដែរ។
សម្ដេចតេជោបានលើកឡើងថា មនុស្សរបស់សម្ដេចគឺមាននៅជុំវិញខ្លួនរបស់លោក សម រង្ស៊ី រួមទាំងអ្នកនៅរួមតុបាយជាមួយនឹងលោក សម រង្ស៊ី ផងដែរ។
ក្រៅពីនោះសម្តេចក៏រម្លឹកពីខេត្តកំពង់ស្ពឺ គឺសម្តេចតេជោ ប្រមុខរាជរដ្ឋាភិបាលកម្ពុជាបានមានប្រសាសន៍ដោយពេញចិត្តចំពោះវឌ្ឍនភាពរបស់ខេត្តកំពង់ស្ពឺដែលពីដើមត្រូវបានគេបង្អាប់ថា អាលាក់កងជើងជាដើម តែពេលនេះមានការរីកចម្រើនស្ទើរគ្រប់វិស័យដែលមិននឹកស្មានដល់។
សម្តេចបានមានប្រសាសន៍ថា ខេត្តកំពង់ស្ពឺ បច្ចុប្បន្ន គឺបានក្លាយជាខេត្តលំដាប់លេខ២នៃការអភិវឌ្ឍជាបន្តបន្ទាប់ ជាពិសេសវិស័យឧស្សាហកម្ម ៕
ដោយ ៖ សិលា
