សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នារីជាជនសង្ស័យម្នាក់ជិះម៉ូតូមកធ្វេីសកម្មភាពលួងលោមក្មេងៗដោះយកគ្រឿងអលង្ការ ហើយខណៈដោះយកក្រវិលក្មេងស្រីម្នាក់បានហេីយត្រូវប្រជាពលរដ្ឋឃេីញទាន់ក៏ចាប់ប្រគល់ជូនសមត្ថកិច្ចកាលពីវេលាម៉ោង៩និង២០នាទីព្រឹក ថ្ងៃទី១២ ខែកក្កដា ឆ្នាំ២០២៣ នៅក្នុងភូមិព្រៃព្រីងជេីង២ សង្កាត់ចោមចៅទី៣ ខណ្ឌពោធិ៍សែនជ័យ។
ជនសង្ស័យឈ្មោះ ឈាង ស្រីលិន អាយុ២១ឆ្នាំ មុខរបរបម្រើការងារនៅភោជនីយដ្ឋានមួយកន្លែង ស្នាក់នៅភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ។ ដោយឡែកក្មេងស្រីរងគ្រោះអាយុ៣ខួប ហេីយក្រវិលមាសដែលជនសង្ស័យដោះយកនោះមានទម្ងន់៣ហ៊ុន ។
តាមប្រភពព័ត៌មានបានឱ្យដឹងថា មុនពេលកេីតហេតុខណៈម្តាយកំពុងរវល់លក់ដូរដោយទុកកូនស្រីឱ្យរត់លេងនៅមុខផ្ទះ លុះមកដល់វេលាកេីតហេតុស្រាប់តែមាននារីជាជនសង្ស័យម្នាក់ជិះម៉ូតូម៉ាកស្គូពីពណ៌ស ពាក់ស្លាកលេខភ្នំពេញ2HC-1076 មកឈប់និយាយលួមលោមកុមារីនោះ ហេីយបានដោះយកក្រវិលមាសពីក្មេងស្រីបានសម្រេច តែភ្លាមៗប្រជាពលរដ្ឋដែលនៅក្បែរនោះឃេីញទាន់ក៏ឃាត់ខ្លួនប្រគល់ជូនសមត្ថកិច្ចតែម្តង។
បច្ចុប្បន្នជនសង្ស័យត្រូវបានសមត្ថកិច្ចធ្វេីការសាកសួរនិងបញ្ជូនទៅផ្នែកព្រហ្មទណ្ឌដេីម្បីចាត់ការបន្តតាមច្បាប់៕
ដោយ៖សុខាសែនជ័យ
