ថៃផ្ទុះការតវ៉ាព្រោះខឹងនឹងលទ្ធផលបោះឆ្នោតសភាជ្រើសរើសនាយករដ្ឋមន្ត្រី

ចែករំលែក៖

កាលពីថ្ងៃទី១៤ ខែកក្កដា ក្រុមបាតុករជាង ១០០នាក់បានប្រមូលផ្តុំគ្នានៅទីក្រុងបាងកក ដោយមានការខកចិត្តនៅពេលដែលបេក្ខជននាយករដ្ឋមន្ត្រីតែមួយគត់បានបរាជ័យក្នុងការបោះឆ្នោតជុំទីមួយ។
កាលពីថ្ងៃទី ១៣ ខែកក្កដា សភាជាតិនៃប្រទេសថៃត្រូវបានកោះប្រជុំដើម្បីបោះឆ្នោតជ្រើសរើសនាយករដ្ឋមន្ត្រីថ្មី ប៉ុន្តែបេក្ខជនតែមួយគត់គឺលោកPita Limjaroenrat – មេដឹកនាំគណបក្ស Move Forward មិនទទួលបានសំឡេងគ្រប់គ្រាន់ដើម្បីក្លាយជានាយករដ្ឋមន្ត្រីនោះទេ។ សមាជិកព្រឹទ្ធសភាភាគច្រើន (ដែលត្រូវបានតែងតាំងដោយយោធា) បានបដិសេធឬបោះឆ្នោតប្រឆាំង។
ដោយមានការខកចិត្តចំពោះលទ្ធផលនេះ បាតុករជាង ១០០ នាក់បានប្រមូលផ្តុំគ្នានៅកណ្តាលទីក្រុងបាងកក ដើម្បីសម្តែងការមិនសប្បាយចិត្តរបស់ពួកគេ។ ក្រុមអ្នកតវ៉ាបានរិះគន់សមាជិកព្រឹទ្ធសភាថា មិនគោរពឆន្ទៈអ្នកបោះឆ្នោត ដោយគំរាមបន្តការតវ៉ាក្នុងករណីដែលលោក ភីតា នៅតែមិនទទួលបានសំឡេងចាំបាច់ ដើម្បីក្លាយជាមេដឹកនាំបន្ទាប់របស់ប្រទេសថៃក្នុងការបោះឆ្នោតជុំទី២ក្នុងរដ្ឋសភានៃប្រទេសនេះ ដែលគ្រោងនឹងប្រព្រឹត្តទៅនៅថ្ងៃទី ១៩ ខែកក្កដា។
ដោយហៅតាមមីក្រូហ្វូន លោក Seksit Yaemsanguansak ដែលចូលរួមក្នុងការតវ៉ានោះបានអំពាវនាវឱ្យអ្នកផ្សេងទៀតត្រៀមខ្លួនដើម្បីដើរតាមផ្លូវសម្រាប់ការតវ៉ាទ្រង់ទ្រាយធំនៅសប្តាហ៍ក្រោយ។
លោក សេក ស៊ីត បាននិយាយដោយសំដៅលើចំនួនអ្នកបោះឆ្នោតដែលបានបោះឆ្នោតគាំទ្រគណបក្សនៅក្នុងសម្ព័ន្ធគណបក្សប្រឆាំងចំនួនប្រាំបីដែលដឹកនាំដោយគណបក្សនេះថា “សូមបង្ហាញជាមួយគ្នានៅពេលដែលមនុស្ស ២៦ លាននាក់ដើរតាមផ្លូវថា តើបញ្ហាធំប៉ុនណា។
មិនត្រឹមតែរិះគន់សមាជិកព្រឹទ្ធសភាទេ ក្រុមអ្នកតវ៉ានៅខាងក្រៅមជ្ឈមណ្ឌលសិល្បៈ និងវប្បធម៌បាងកកថែមទាំងទាមទារឱ្យដកខ្លួនចេញពីមុខតំណែងទៀតផង។
ចែករំលែកជាមួយទីភ្នាក់ងារសារព័ត៌មាន Straits Times អ្នកស្រី Anna Annanon ដែលចូលរួមក្នុងការតវ៉ាបាននិយាយថា “សមាជិកព្រឹទ្ធសភាមិនគោរពការបោះឆ្នោតរបស់យើង” ហើយបានព្រមានថា ការតវ៉ាអាចនឹងផ្ទុះឡើងនៅទូទាំងប្រទេសថៃ ប្រសិនបើសមាជិកព្រឹទ្ធសភាមិនដកខ្លួន៕ ដោយ៖ ធីរីណា