សារព័ត៌មាន នគរវត្ត តែងតែនាំមុខគេជានិច្ច
មហាសេដ្ឋី Elon Musk បានរិះគន់រដ្ឋបាលសហរដ្ឋអាមេរិកចំពោះការបញ្ជូនគ្រាប់បែកចង្កោមទៅអ៊ុយក្រែន ដោយនិយាយថាការសម្រេចចិត្តនេះបង្ហាញពីជំហររបស់ទីក្រុងវ៉ាស៊ីនតោនគឺ “លាក់ពុត” ។
ជាក់ស្តែង ថៅកែក្រុមហ៊ុន Tesla បានសរសេរនៅលើ Twitter កាលពីថ្ងៃទី១៥ ខែកក្កដាថា “អាមេរិកតែងតែថ្កោលទោសអ្នកដែលប្រើគ្រាប់បែកចង្កោមថាជាអំពើអាក្រក់ ប៉ុន្តែឥឡូវនេះបញ្ជូនអាវុធនេះទៅប្រើប្រាស់។ ការសម្រេចចិត្តនេះនឹងមិននាំមកនូវអ្វីល្អទេ ជាអំពើឃោឃៅ ជាការលាក់ពុត។ ”
មុននោះ នាថ្ងៃទី៧ ខែកក្កដា ទីប្រឹក្សាសន្តិសុខជាតិអាមេរិក លោក Jake Sullivan បាននិយាយថា ទីក្រុងវ៉ាស៊ីនតោន សម្រេចបញ្ជូនគ្រាប់បែកចង្កោមទៅកាន់អ៊ុយក្រែន ទោះបីជាមានការជំទាស់ពីអង្គការសហប្រជាជាតិក៏ដោយ។
ទីក្រុងគៀវបានសាទរជំនួយនេះថាមានឥទ្ធិពលខ្លាំងខាងផ្លូវចិត្តនិងអារម្មណ៍លើយោធារុស្ស៊ី។ ទន្ទឹមនឹងនេះដែរ ក្រុមសិទ្ធិមនុស្សជាច្រើនបានអំពាវនាវឱ្យសហរដ្ឋអាមេរិកបញ្ចប់ការប្រើប្រាស់គ្រាប់បែកចង្កោមក្នុងជម្លោះក្នុងប្រទេសអ៊ុយក្រែន ហើយបានស្នើឱ្យក្រុងវ៉ាស៊ីនតោនបដិសេធការអំពាវនាវរបស់ទីក្រុងកៀវឱ្យផ្គត់ផ្គង់អាវុធហាមឃាត់បន្ថែមទៀត។
យោងតាមអង្គការទាំងនេះ គ្រោះថ្នាក់ដែលបង្កឡើងដោយគ្រាប់បែកចង្កោមគឺមិនហួសហេតុនោះទេ អាវុធអាចបាញ់រាប់រយគ្រាប់លើផ្ទៃដីទំហំនៃទីលានបាល់ទាត់ស្តង់ដារពីរ។ ទោះជាយ៉ាងណាក៏ដោយ ធាតុមិនទាន់ផ្ទុះបង្កគ្រោះថ្នាក់ធ្ងន់ធ្ងរនិងយូរអង្វែងដល់ជនស៊ីវិលអស់រយៈពេលជាច្រើនឆ្នាំបន្ទាប់ពីជម្លោះបានបញ្ចប់។ ដូច្នេះហើយ ការប្រើប្រាស់អាវុធនេះគឺស្ទើរតែជាឧក្រិដ្ឋកម្មសង្គ្រាម មិនថាវាបម្រើគោលបំណងអ្វីនោះទេ។
ហេតុផលមួយក្នុងចំណោមហេតុផលដែលមន្ទីរបញ្ចកោណដកស្រង់ដើម្បីពន្យល់ពីការផ្គត់ផ្គង់អាវុធធម្មតាដែលមានគោលបំណងពីរដែលបានកែប្រែ (DPICM) ដល់អ៊ុយក្រែនគឺថា សហរដ្ឋអាមេរិកខ្វះគ្រាប់កាំភ្លើងធំ 155 មិលី្លម៉ែត្រធម្មតាដើម្បីបញ្ជូនទៅកាន់ទីក្រុងគៀវ។
រដ្ឋមន្ត្រីការពារជាតិរុស្ស៊ីលោក Sergei Shoigu បាននិយាយថា ក្នុងករណីដែលអាមេរិកផ្គត់ផ្គង់គ្រាប់បែកចង្កោមនិងគ្រាប់រំសេវដល់ទីក្រុងគៀវ កងកម្លាំងរុស្ស៊ីនឹងត្រូវបង្ខំឱ្យប្រើអាវុធស្រដៀងគ្នាប្រឆាំងនឹងកងកម្លាំងប្រដាប់អាវុធអ៊ុយក្រែន។
លោកក៏បានបន្ថែមថា រុស្ស៊ីបានបដិសេធមិនប្រើប្រាស់អាវុធបែបនេះក្នុងប្រតិបត្តិការយោធាពិសេស ដោយដឹងពីការគំរាមកំហែងរបស់ខ្លួនចំពោះជនស៊ីវិល។ យោងតាមលោក Shoigu ការផ្គត់ផ្គង់គ្រាប់បែកចង្កោមរបស់អាមេរិកនឹងធ្វើឱ្យជម្លោះកាន់តែយូរ៕ ដោយ៖ ធីរីណា
រូបថត៖ AP
