សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នាយកដ្ឋាននគរបាលបង្ការពន្លត់អគ្គិភ័យនៃអគ្គស្នងការដ្ឋាននគរបាលជាតិ បានឱ្យដឹងនៅព្រឹកថ្ងៃសុក្រទី០៤ ខែសីហា ឆ្នាំ២០២៣នេះថា៖ មានករណីឆ្លងចរន្តអគ្គិសនីបណ្ដាលឱ្យឆាបឆេះផ្ទះប្រជាពលរដ្ឋមួយកន្លែងនៅក្នុងមូលដ្ឋានខណ្ឌឫស្សីកែវទាំងព្រឹកបង្កការភ្ញាក់ផ្អើលដល់ប្រជាពលរដ្ឋនាំគ្នារាយការណ៍ប្រាប់សមត្ថកិច្ចជួយធ្វើអន្តរាគមន៍ទាន់ពេលវេលា។
ប្រភពដដែលបន្តថា ហេតុការណ៍គ្រោះអគ្គិភ័យនេះ បានកើតឡើងនៅវេលាម៉ោង ០៦និង៣០នាទីព្រឹកថ្ងៃសុក្រ ៣រោចខែទុតិយាសាឍ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី០៤ ខែសីហា ឆ្នាំ២០២៣ នៅផ្ទះលេខ២៤៨ ផ្លូវបេតុង ភូមិទួលថ្ងាន់ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
ម្ចាស់ទីតាំងឈ្មោះ សារី វណ្ណា ភេទប្រុស អាយុ៤៧ឆ្នាំ ជនជាតិខ្មែរ មុខរបរមេធាវី ។ មូលហេតុ បណ្តាលមកពីឆ្លងចរន្តអគ្គិសនី។
– ប្រភេទសំណង់៖ ថ្មបេតុង ទំហំ ០៥ម៉ែត្រ គុណ ២០ម៉ែត្រ។
- ខូចខាតសម្ភារឆេះបន្ទប់ជាន់ឡៅតឿចំនួន០១បន្ទប់ រួមទាំងសម្ភារប្រើប្រាស់ប្រចាំថ្ងៃអស់មួយចំនួន និងពុំបានឆេះរាលដាលដល់ផ្ទះអ្នកក្បែរខាងឡើយ ។ ក្នុងករណីនេះដែរមិនបណ្តាលឱ្យស្លាប់មនុស្ស និងរបួសមនុស្សនោះទេ។
គួរបញ្ជាក់ថា ក្នុងប្រតិបត្តិការនេះកងកម្លាំងបង្ការពន្លត់អគ្គិភ័យនិងសង្គ្រោះ នៃស្នងការដ្ឋាននគរបាលរាជធានីភ្នំពេញ បានប្រេីប្រាស់រថយន្តអគ្គិភ័យចំនួន០៧ គ្រឿង ប្រេីប្រាស់ទឹកអស់ចំនួន០៥ រថយន្ត ស្មើនឹង២០ម៉ែត្រគូប ។ រថយន្តអគ្គិភ័យសាលាខណ្ឌឫស្សីកែវចំនួន០១ គ្រឿង ប្រើប្រាស់ទឹកអស់ចំនួន ០១ រថយន្ត ស្មើនឹង០៤ម៉ែត្រគូប ។ ករណីនេះពន្លត់ទៅវិញនៅវេលាម៉ោង០៧:២០នាទីព្រឹកនាថ្ងៃខែ ឆ្នាំដដែល៕
ដោយ៖សហការី
