សារព័ត៌មាន នគរវត្ត តែងតែនាំមុខគេជានិច្ច
កីឡាករ Lionel Messi បានបង្ហាញទម្រង់លេងយ៉ាងល្អទោះបីលេចឮដំណឹងថារបួសក៏ដោយ ដើម្បីរកគ្រាប់បាល់ទី៩របស់គាត់ក្នុង៦ប្រកួត ខណៈដែលក្រុម Inter Miami បានផ្តួលក្រុម Philadelphia Union ដើម្បីឈានដល់វគ្គផ្តាច់ព្រ័ត្រ Leagues Cup កាលពីរសៀលថ្ងៃទីអង្គារ។
ខ្សែប្រយុទ្ធដែលជួយឲ្យអាហ្សង់ទីឈ្នះ World Cup រូបនេះបានស៊ុតបញ្ចូលទីគ្រាប់ទី២របស់ក្រុម Inter Miami ក្នុងជ័យជម្នះ ៤–១ គឺមួយថ្ងៃបន្ទាប់ពីមានដំណឹងថា កជើងរបស់គាត់របួសក្នុងការហ្វឹកហាត់។
គ្រាប់បាល់៣គ្រាប់ទៀតរបស់ក្រុម Inter Miami រកបានដោយកីឡាករ Josef Martinez, Jordi Alba និង David Ruiz បានស៊ុតបញ្ចូលទីឱ្យក្រុមនេះ ខណៈដែលកីឡាករ Alejandro Bedoya របស់ក្រុម Philadelphia Union រកបាន១គ្រាប់ឲ្យក្រុមម្ចាស់ផ្ទះ។
លទ្ធផលនេះក៏មានន័យថា ក្រុម Inter Miami មានសិទ្ធិសម្រាប់ការប្រកួតប្រចាំតំបន់ Concacaf Champions Cup នៅរដូវកាលក្រោយ ដែលអាចបើកផ្លូវទៅកាន់ FIFA Club World Cup ដែលត្រូវប្រកួតប្រជែងនៅឆ្នាំ២០២៥។
លោក Gerardo Martino គ្រូបង្វឹករបស់ក្រុម Inter Miami បាននិយាយថា “គោលដៅរបស់យើងគឺមានលក្ខណៈគ្រប់គ្រាន់សម្រាប់ការប្រកួតអន្តរជាតិនៅរដូវកាលក្រោយ ហើយយើងបានធ្វើវា។ ឥឡូវនេះ យើងត្រូវរៀបចំខ្លួនដើម្បីឈ្នះការប្រកួតនេះ ដែលធ្វើឲ្យយើងមានអារម្មណ៍ថាមានកម្លាំងចិត្ត និងមានទំនុកចិត្តខ្លាំងណាស់”។
ការឈ្នះលើកទី៦ជាប់ៗគ្នារបស់ Inter Miami ចាប់តាំងពី Messi មកចូលរួមក្រុមក្នុងខែកក្កដា បានផ្តល់ឱកាសឱ្យកីឡាករវ័យ៣៦ឆ្នាំរូបនេះត្រៀមខ្លួនសម្រាប់វគ្គផ្តាច់ព្រ័ត្រលើកទី៤២នៃអាជីពរបស់គាត់ចាប់តាំងពីការប្រកួតជម្រុះ World Cup ដែលវគ្គផ្តាច់ព្រ័ត្រ League Cup នេះមានក្រុមមកពីម៉ិកស៊ិក និង Major League Soccer នៅសហរដ្ឋអាមេរិក។
ពេលនេះក្រុម Inter Miami នឹងប្រកួតជាមួយ Nashville SC ក្នុងវគ្គផ្តាច់ព្រ័ត្រថ្ងៃអាទិត្យនេះ។ ក្រុមNashville SC នឹងធ្វើជាម្ចាស់ផ្ទះនៃការប្រកួតនេះ បន្ទាប់ពីបានប្រកួតឈ្នះ ២–០ លើក្រុម Monterrey ក្នុងវគ្គពាក់កណ្តាលផ្តាច់ព្រ័ត្រ ៕
ដោយ ៖ ភារៈ(រូបភាព ៖ BBC Sport)
