សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ទីបំផុត! សមត្ថកិច្ចនគរបាលស្រុកភ្នំព្រឹក បានចុះស្រាវជ្រាវរហូតឈានដល់ការឃាត់ខ្លួនជនសង្ស័យពីរនាក់ យកមកអនុវត្តតាមច្បាប់ ក្រោយពួកគេធ្វេីសកម្មភាពប្រេីប្រាស់ម៉ូតូកង់បីចូលទៅលួចកាច់ពោត ដល់ក្នុងចំការអ្នកដទៃ នៅស្រុកភ្នំព្រឹក។ នេះបេីយោងតាមប្រភពព័ត៍មានពីស្នងការដ្ឋាននគរបាលខេត្តបាត់ដំបង នៅព្រឹកថ្ងៃទី១៨ ខែសីហា ឆ្នាំ២០២៣។
ប្រភពដដែលបន្តថា មានករណីលួច(កាច់ពោត) កើតឡើង០១លើក កាលពីរសៀលថ្ងៃទី១៦ ខែសីហាម្សិលមិញនេះ នៅចំណុច ភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង បង្កឡើងដោយមិនស្គាល់អត្តសញ្ញាណ បានធ្វើសកម្មភាពលួច កាច់ពោត របស់ជនរងគ្រោះឈ្មោះ ម៉ូវ សុផាត ភេទប្រុស អាយុ ២៩ ឆ្នាំ រស់នៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង បណ្តាលឱ្យបាត់ពោត នៅក្នុងចំការអស់ប្រមាណ០២រ៉ៃដី។
មន្រ្តីដដែលបន្តថា ក្រោយពេលដែលដឹងថាបាត់ជនរងគ្រោះបានប្តឹងមកសមត្ថកិច្ចនគរបាលស្រុក ហេីយផ្តេីមពីបញ្ហានេះ លោកអធិការនគរបាលស្រុក វរសេនីយ៍ទោ ហេង បារាំង បានដឹកនាំកម្លាំងក្នុងអង្គភាពធ្វេីការស្រាវជ្រាវ ដោយអនុត្តតាមយោបល់ដឹកនាំរបស់ លោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង និងលោកឧត្តមសេនីយ៍ត្រី លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ រួមជាមួយជនរងគ្រោះផង បានស្វែងងរកអ្នកលួចនេះរហូតដល់វេលាថ្ងៃដដែលបានរកឃើញ ម៉ូតូកងបីម៉ាកវេវពណ៌ខៀវចំនួន ០១គ្រឿង ពាក់ស្លាកលេខ បាត់ដំបង 1E-9177 មានដឹកផ្លែពោតចំនួន ០២ កំណាត់ការ៉ុង(440ផ្លែ) នៅក្នុងដីចំការរបស់ជនរងគ្រោះ សមត្ថកិច្ចបានយកមករក្សាទុក នៅកន្លែងអធិការដ្ឋានជាបណ្តោះអាសន្នរហូតដល់ថ្ងៃទី ១៧ ខែសីហា ឆ្នាំ២០២៣ វេលោម៉ោង ១៣ និង ៣០ នាទី បានស្វែងរកម្ចាស់ម៉ូតូនេះឃេីញនិងនាំខ្លួនមកធ្វេីការសាកសួរនោះគឺឈ្មោះ ឡុង កុម្ភះ ហៅខែ ភេទប្រុស អាយុ ២៥ ឆ្នាំ មុខរបរ កម្មករ និងឈ្មោះ ជឿន ឌឿន ភេទប្រុស អាយុ២៧ ឆ្នាំ មុខរបរកម្មករ ទាំង២នាក់ មានទីលំនៅភូមិ ភ្នំតូច ឃុំពេជ្រចិន្តា ស្រុក ភ្នំព្រឹក ខេត្តបាត់ដំបង ។
ពេលធ្វើការសាកសួរពួកគាត់ឆ្លេីយសារភាពថា ពិតជាបានប្រេីប្រាស់ម៉ូតូកង់បីនេះទៅលួចបេះផ្លែពោតគេនៅក្នុងចំការ ប៉ុន្តែពេលកំពុងបេះ បានមួយចំនួនហេីយនោះ ម្ចាស់គេដឹង ក៏នាំគ្នារត់ចោលម៉ូតូតែម្តង។
បច្ចុប្បន្ននៅព្រឹកថ្ងៃទី១៨ ខែសីហានេះ កម្លាំងនគរបាលស្រុកបសនរៀបចំសំណុំរឿងបញ្ជូនជនសង័្សយទាំងពីរនាក់មកកាន់ការិយាល័យជំនាញខេត្ត ដេីម្បីអនុវត្តតាមច្បាប់៕
ដោយ៖សហការី
