សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ជនសង្ស័យម្នាក់ប្រើល្បិចខ្ចីម៉ូតូមិត្តភក្តិរបស់ខ្លួនថាទៅយកប្អូននៅរាជធានីភ្នំពេញ តែអស់រយៈពេលជាច្រើនថ្ងៃមិនឃើញយកម៉ូតូមកអោយម្ចាស់វិញ ត្រូវបានជនរងគ្រោះជាម្ចាស់ម៉ូតូប្តឹងនគរបាលឱ្យចាប់ខ្លួនករណីរំលោភលើទំនុកចិត្ត ។
ករណីឃាត់ខ្លួននេះធ្វើឡើងនៅថ្ងៃទី១២ ខែកញ្ញា ឆ្នាំ២០២៣ វេលាម៉ោង២៣និង០០នាទី ដែលករណីនេះបានកើតឡើងនៅថ្ងៃទី២ ខែកញ្ញា ឆ្នាំ២០២៣ វេលាម៉ោង៤និង៣០នាទីទៀបភ្លឺ នៅចំណុចភូមិចុងបឹង ឃុំម្កាក់ ស្រុកអង្គស្នួល ខេត្តកណ្តាល។
មន្ត្រីនគរបាលស្រុកអង្គស្នួលបានអោយដឹងថា ជនរងគ្រោះឈ្មោះ តុង លីន ភេទប្រុស អាយុ២៥ឆ្នាំ ជនជាតិខ្មែរ មុខរបរកសិករ នៅភូមិកន្លែងគល់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។
ចំណែកជនសង្ស័យឈ្មោះរិទ្ធ ឧត្តម(ហៅដំ) ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ បច្ចុប្បន្នរស់នៅភូមិត្រពាំងថ្លាន់ សង្កាត់ពន្យាំង ខណ្ឌព្រែកព្នៅ រាជធានីភ្នំពេញ។ ផលប៉ះពាល៖ បាត់ម៉ូតូ០១គ្រឿង ម៉ាក Beat(ប៊ីត) ស៊េរីឆ្នាំ២០២១ ពណ៌ខ្មៅ ពាក់ផ្លាកលេខ ភ្នំពេញ 1JF-3876។
ប្រភពដដែលបន្តថា កាលពីថ្ងៃទី១ ខែកញ្ញា ឆ្នាំ២០២៣ វេលាម៉ោង១៦និង២០នាទី ជនរងគ្រោះបានជិះម៉ូតូរបស់ខ្លួនទៅឌុបជនសង្ស័យទៅផឹកប៊ីយែរនៅផ្ទះឈ្មោះ លក្ខ័ រុន ភេទប្រុស អាយុ៣០ឆ្នាំ មុខរបរកសិករ រស់នៅភូមិចុងបឹង ឃុំម្កាក់ ស្រុកអង្គស្នួល ខេត្តកណ្ដាល។ លុះផឹកស្រវឹងហេីយយប់ជ្រៅផង ជនរងគ្រោះនិងជនសង្ស័យបានដេកនៅផ្ទះឈ្មោះ ល័ក្ខ រុន ។ លុះដល់ថ្ងៃទី០២ ខែកញ្ញា ឆ្នាំ២០២៣ វេលាម៉ោង០៤និង៣០នាទីទៀបភ្លឺ ជនរងគ្រោះបានងើបពីដេកបម្រុងទៅផ្ទះ តែជនសង្ស័យបានខ្ចីម៉ូតូរបស់ជនរងគ្រោះដោយប្រាប់ថា ទៅយកប្អូននៅចោមចៅសិន ។ ពេលនោះជនរងគ្រោះបានឱ្យម៉ូតូទៅជនសង្ស័យខ្ចី និងទូរស័ព្ទ០១គ្រឿង លុយ០២មុឺនរៀលដេីម្បីជិះទៅយកប្អូននៅចោមចៅ ហេីយជនសង្ស័យក៏ជិះម៉ូតូចេញទៅបាត់មិនត្រឡប់មកវិញឡើយ គឺបាត់ដំណឹងឈឹង។
លុះដល់ថ្ងៃទី១១ ខែកញ្ញា ឆ្នាំ២០២៣ ទេីបជនរងគ្រោះមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលម្កាក់ ។ រហូតដល់ថ្ងៃទី១២ខែកញ្ញាឆ្នាំ២០២៣ វេលាម៉ោង២៣និង០០នាទី ជនរងគ្រោះបាននាំខ្លួនជនសង្ស័យយកមកប្រគល់ជូនសមត្ថកិច្ចប៉ុស្តិ៍ម្កាក់ ហើយនគរបាលប៉ុស្តិ៍ម្កាក់ក៏បានបញ្ជូនមកកាន់អធិការដ្ឋាននគរបាលស្រុកអង្គស្នួល។ ចំពោះករណីនេះ កម្លាំងផ្នែកជំនាញកំពុងកសាងសំណុំរឿងបន្តតាមនីតិវិធី៕
ដោយ៖ ស្អាងជ័យ
