ជនជាតិស្វ៊ីសម្នាក់ជាប់ចោទទិញពេស្យាចារកុមារ ម្ដាយជាអ្នកលក់កូនឱ្យជនបរទេស ក្នុងតម្លៃមួយខែ១៥០ដុល្លារអាមេរិក ដោយក្នុងមួយសប្តាហ៍តម្រូវឲ្យយកកុមារនោះទៅជួបជនបរទេស៣ទៅ៤ដង

ចែករំលែក៖

ភ្នំពេញ ៖ បុរសជនជាតិស្វ៊ីសឈ្មោះ Stephan Werner អាយុ៥៨ឆ្នាំ ជាភ្ញៀវទេសចរ ស្នាក់នៅមិនពិតប្រាកដ បានត្រូវនគរបាលការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញចាប់ឃាត់ខ្លួន បញ្ជូនទៅសាលាដំបូងរាជធានីភ្នំពេញ កាលពីថ្ងៃទី២៩ ខែកញ្ញា ឆ្នាំ២០២៣ នេះ ពាក់ព័ន្ធនឹងករណីទិញពេស្យាចារកុមារ ។

តាមប្រភពព័ត៌មានឲ្យដឹងថា ការទិញ-លក់ពេស្យាចារកុមារនេះ គឺម្ដាយជនរងគ្រោះផ្ទាល់តែម្ដង បានលក់កូនរបស់ខ្លួនឲ្យទៅជនបរទេសរូបនេះក្នុងតម្លៃមួយខែ១៥០ដុល្លារអាមេរិក ដោយក្នុងមួយសប្តាហ៍តម្រូវឲ្យយកកុមារនោះទៅជួបជនបរទេស៣ទៅ៤ដង ។ ចំណែកជនបរទេសរូបនេះ ក៏បានទិញសម្ភារៈប្រើប្រាស់បន្តិចបន្តួចឲ្យម្ដាយកុមាររងគ្រោះបន្ថែមទៀតដែរ ។

ពេលឃាត់ខ្លួនជនសង្ស័យ សមត្ថកិច្ចបាននាំយកទៅសាកសួរ រួចកសាងសំណុំរឿងតាមនីតិវិធី ។ ចំណែកកុមាររងគ្រោះ ត្រូវបានបញ្ជូនទៅមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ ។

អំពើទិញពេស្យាចារកុមារ ជាបទល្មើសធ្ងន់ធ្ងរបំផុត រំលោភបំពានលើសិទ្ធិកុមារ អំពើប្រព្រឹត្តដោយជនបរទេសនេះ គឺម្ដាយជនរងគ្រោះផ្ទាល់តែម្ដង បានលក់កូនរបស់ខ្លួនឲ្យទៅជនបរទេសរូបនេះ ដែលពុំបានគិតអំពី សីលធម៌ជាម្តាយ ៕