សារព័ត៌មាន នគរវត្ត តែងតែនាំមុខគេជានិច្ច
ខ្សែបម្រើស្លាប Antony អាចត្រឡប់ទៅក្រុម Manchester United សម្រាប់ការប្រកួត Champions League របស់ពួកគេជាមួយក្រុម Galatasaray នៅរាត្រីថ្ងៃអង្គារនេះ។ ខ្សែបម្រើស្លាបសញ្ជាតិប្រេស៊ីលរូបនេះមិនបានលេងតាំងពីដើមខែកញ្ញាមកម្ល៉េះ បន្ទាប់ពីមានការចោទប្រកាន់ពីការបំពានលើមិត្តស្រីក្នុងផ្ទះមកលើរូបគេ។
Antony ដែលបានបដិសេធការចោទប្រកាន់នេះ មិនត្រូវបានចាប់ខ្លួន ឬចោទប្រកាន់នៅក្នុងប្រទេសប្រេស៊ីល ឬចក្រភពអង់គ្លេសនោះទេ។ គាត់បានត្រលប់ទៅហ្វឹកហាត់វិញកាលពីថ្ងៃអាទិត្យ ហើយគ្រូបង្វឹកលោក Erik ten Hag និយាយថាគាត់ កំពុងពិចារណាសម្រាប់ការប្រកួតក្នុងពូល A ។
លោក Ten Hag បានបញ្ជាក់ផងដែរថា ខ្សែការពារ Lisandro Martinez នឹងតម្រូវឱ្យវះកាត់របួសជើង។ កីឡាករអន្តរជាតិអាហ្សង់ទីនវ័យ២៥ឆ្នាំរូបនេះបានខកខានចុងបញ្ចប់នៃរដូវកាលមុនបន្ទាប់ពីបានរបួសកជើងក្នុងខែមេសា ហើយ United រំពឹងថា គាត់នឹងអវត្តមានរយៈពេល៣ខែទៀតដោយសារតែរបួសនេះមិនទាន់ជា។
ទោះជាយ៉ាងនេះក្តី Manchester United អាចនឹងត្រូវបានជំរុញដោយការត្រលប់មកវិញរបស់ខ្សែការពារឆ្វេង Sergio Reguilon ដែលបានខកខានការចាញ់ក្នុងផ្ទះកាលពីថ្ងៃសៅរ៍ក្រោមស្នាដៃក្រុម Crystal Palace ជាមួយនឹងបញ្ហារបួស។ នេះអាចអនុញ្ញាតឱ្យ Sofyan Amrabat ផ្លាស់ទីទៅក្នុងការលេងដែលធ្លាប់ស្គាល់របស់គាត់នៅក្នុងតួនាទីខ្សែបម្រើ។
United មានបញ្ជីឈ្មោះកីឡាកររបួសរយៈពេលវែង ដែលរួមមានខ្សែការពារ Aaron Wan-Bissaka, Luke Shaw និង Tyrell Malacia។ Manchester United មានការចាប់ផ្តើមដ៏អាក្រក់បំផុតមិនធ្លាប់មានក្នុងរដូវកាល Premier League ជាមួយនឹងការចាញ់ម្ចាស់ផ្ទះ Palace ១–០ កាលពីថ្ងៃសៅរ៍ដែលធ្វើឱ្យពួកគេឈរនៅលេខរៀងទី១០ ក្នុងតារាងដោយមាន៩ពិន្ទុពីការប្រកួតចំនួន៧។
ពួកគេក៏បានចាញ់ការប្រកួតបើកឆាករបស់ពួកគេក្នុងយុទ្ធនាការក្នុងពូលនៃក្របខ័ណ្ឌ Champions League រដូវកាលនេះផងដែរក្នុងលទ្ធផល ៤–៣ នៅលើទឹកដីក្រុម Bayern Munich ។
ការវិលត្រឡប់របស់ Antony កើតឡើងដោយក្រុម United បាត់បង់កីឡាករជាច្រើន។ កីឡាករវ័យ២៣ឆ្នាំដែលទិញពី Ajax ក្នុងតម្លៃ៨១.៣លានផោនកាលពីខែសីហា ឆ្នាំ២០២២ បានបង្ហាញខ្លួនចំនួន៤ប្រកួតក្នុងរដូវកាលនេះ ប៉ុន្តែមិនបានស៊ុតបញ្ចូលទី ឬ Assist នោះទេ។ គាត់ស៊ុតបញ្ចូលទីបាន៨គ្រាប់ក្នុងការបង្ហាញខ្លួន៤៤លើកសម្រាប់ United ក្នុងឆ្នាំ២០២២–២០២៣។
ទាក់ទងនឹងការចោទប្រកាន់ដែលធ្វើឡើងប្រឆាំងនឹងកីឡាកររូបនេះ វាត្រូវបានគេយល់ថា គាត់បាននិយាយទៅកាន់ប៉ូលីស Greater Manchester កាលពីថ្ងៃព្រហស្បតិ៍ ហើយមិនមានការរឹតបន្តឹងណាមួយលើគាត់បន្ទាប់ពីការសម្ភាសន៍នោះទេ។ ប្រភពពីក្លិបបិសាចក្រហមបានឲ្យដឹងថា គាត់បានផ្តល់ភស្តុតាងក្នុងការគាំទ្រចំពោះការបដិសេធយ៉ាងខ្លាំងរបស់គាត់ចំពោះការចោទប្រកាន់នេះ។
ការប្រកួតរវាងក្រុមបិសាចក្រហម Manchester United និងក្រុមភ្ញៀវGalatasaray នៅធ្វើឡើងនៅរាត្រីថ្ងៃអង្គារនេះ វេលាម៉ោង២រំលងអធ្រាត្រ។ បច្ចុប្បន្ន Man Utd កំពុងឈរបាតតារាងក្នុងពូល A ក្រោយប្រកួតចាញ់ Bayern Munich ខណៈដែលក្រុម Galatasaray បានចាប់ផ្តើមយុទ្ធនាការ Champions League របស់ពួកគេជាមួយនឹងលទ្ធផលស្មើ ២–២ ក្នុងផ្ទះជាមួយ FC Copenhagen។ Galatasaray ស្ថិតក្នុងចំណាត់ថ្នាក់លេខ២ក្នុងការប្រកួត Super Lig របស់ប្រទេសទួរគី ដោយឈ្នះ៦ដង និងស្មើ១ដងក្នុងចំណោម៧ប្រកួត ៕
ដោយ៖ ភារៈ(រូបភាព ៖ BBC Sport)
