សង្គ្រាមអុីស្រាអែល-ប៉ាឡេស្ទីន៖ ស្លាប់និងរបួសជិត៦០០នាក់

ចែករំលែក៖

នៅព្រឹកថ្ងៃទី 7 ខែតុលា (ម៉ោងក្នុងតំបន់) ក្រុមប្រដាប់អាវុធប៉ាឡេស្ទីននៅតំបន់ហ្គាហ្សាស្ទ្រីបភ្លាមៗបានបាញ់រ៉ុក្កែតរាប់ពាន់គ្រាប់ចូលទៅក្នុងទីក្រុងភាគខាងត្បូងនិងកណ្តាលរបស់អុីស្រាអែល។
ខ្មាន់កាំភ្លើងជាច្រើនបានចូលទៅក្នុងទឹកដីអុីស្រាអែលដោយជោគជ័យ និងប៉ះទង្គិចគ្នាជាច្រើនជាមួយទាហានអុីស្រាអែល។ ការវាយប្រហាររួមគ្នាទ្រង់ទ្រាយធំនេះបានកើតឡើងក្នុងខួបលើកទី 50 នៃសង្រ្គាមអារ៉ាប់-អុីស្រាអែលក្នុងឆ្នាំ 1973 ហើយរហូតមកដល់បច្ចុប្បន្នបានធ្វើឱ្យប្រជាជនអុីស្រាអែល 22 នាក់ស្លាប់ និង 545 នាក់ផ្សេងទៀតរងរបួស។
ភ្លាមៗនោះ កងទ័ពអុីស្រាអែលបានប្រកាសពីស្ថានភាពត្រៀមខ្លួនធ្វើសង្រ្គាម ហើយបានហៅទ័ពបម្រុង។ នាយករដ្ឋមន្ត្រីអុីស្រាអែលបានបើកកិច្ចប្រជុំសន្តិសុខបន្ទាន់។ ក្តីបារម្ភអន្តរជាតិត្រូវបានលើកឡើងអំពីស្ថានភាពនេះ។
គ្រាប់រ៉ុក្កែតរាប់ពាន់គ្រាប់ពីតំបន់ហ្គាហ្សាត្រូវបានបាញ់ចូលទឹកដីអុីស្រាអែលនៅព្រឹកនេះ។ ស៊ីរ៉ែនបានបន្លឺឡើងពេញទីក្រុង រួមទាំងក្រុងយេរូសាឡឹមផងដែរ។ ទន្ទឹមនឹងនោះ ខ្មាន់កាំភ្លើងក្រុមហាម៉ាស់ជាច្រើននាក់បានជ្រៀតចូលទឹកដីអុីស្រាអែលដោយជោគជ័យ និងកំពុងធ្វើការវាយប្រហារគ្នានៅក្នុងទីប្រជុំជនភាគខាងត្បូង។
នៅលើកញ្ចក់ទូរទស្សន៍ មេបញ្ជាការកងពលតូច Qassam នៃចលនា Hamas លោក Mohammad Deif បានប្រកាសពីការចាប់ផ្តើមយុទ្ធនាការ “Storm Al Aqsa” ប្រឆាំងនឹងអុីស្រាអែលថា “យុទ្ធនាការបានចាប់ផ្តើមជាមួយនឹងគ្រាប់រ៉ុក្កែតចំនួន 5.000 គ្រាប់ដែលត្រូវបានបាញ់ចេញពីតំបន់ Gaza ។ យុទ្ធនាការនេះនឹងអូសបន្លាយរហូតដល់ប្រជាពលរដ្ឋយើងមានសេរីភាព និងសេចក្តីថ្លៃថ្នូរ ហើយនឹងមិនមានបទឈប់បាញ់ណាមួយឡើយ រហូតដល់ការឈ្លានពាននិងការឡោមព័ទ្ធរបស់អុីស្រាអែលត្រូវបានបញ្ចប់។ យើងនឹងមិនទទួលយកអន្តរការីណាមួយឡើយ»។
កងកម្លាំងប្រដាប់អាវុធ Jihad នៅតំបន់ Gaza ក៏បានប្រកាសថា ពួកគេកំពុងឈរក្បែរចលនា Hamad រហូតដល់ជ័យជម្នះចុងក្រោយត្រូវបានសម្រេច។
ភ្ញាក់ផ្អើលដោយការវាយប្រហារពីតំបន់ហ្កាហ្សា កងទ័ពអុីស្រាអែលបានប្រកាសពីស្ថានភាពត្រៀមខ្លួនធ្វើសង្រ្គាម។ រដ្ឋមន្ត្រីក្រសួងការពារជាតិ Yoav Gallang បានកោះហៅកងទ័ពបម្រុង ដោយស្នើឱ្យប្រជាជនស្នាក់នៅក្នុងផ្ទះនៅពេលនេះ៖ «ក្រុមហាម៉ាស់នៅព្រឹកនេះ បានធ្វើឱ្យមានកំហុសធ្ងន់ធ្ងរ ដោយចាប់ផ្តើមសង្រ្គាមប្រឆាំងនឹងរដ្ឋអុីស្រាអែល។ ទាហានរបស់កងកម្លាំងការពារអុីស្រាអែល (IDF) កំពុងប្រយុទ្ធជាមួយសត្រូវនៅគ្រប់ចំណុចជ្រៀតចូល។ ខ្ញុំសូមអំពាវនាវដល់ប្រជាជនអុីស្រាអែលឱ្យអនុវត្តតាមការណែនាំដែលទើបតែបានចេញប្រជាជាតិអុីស្រាអែលនឹងឈ្នះសង្គ្រាមនេះ»៕ ដោយ៖ ធីរីណា