សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី ៖ ក្រោយពីទទួលដំណឹងថា, ដំរីសំបូរ ដែលលោកអ្នកធ្លាប់ឃើញនៅវត្តភ្នំនោះ បានលាចាកលោកហើយក្នុងអាយុ៦៣ឆ្នាំ នៅខេត្តមណ្ឌលគិរី ដោយជំងឺធ្មេញ១ខែ ក្លាយទៅជារឿងគួរឱ្យស្ដាយស្រណោះចំពោះ «ដំរីសំបូរ» ដែលគេស្គាល់ថាដំរីវត្តភ្នំដ៏ល្បីល្បាញ គឺបានលាចាកលោកហើយ នៅថ្ងៃទី១៩ ខែតុលា ក្នុងអាយុ៦៣ឆ្នាំ នៅខេត្តមណ្ឌលគិរី ពោលគឺក្នុងពេលចូលនិវត្តន៍បាន៩ឆ្នាំពីការបម្រើសេវាកម្មទេសចរណ៍។
កម្ពុជាបានអភិរក្សសត្វកម្រៗទាំងនេះ យ៉ាងខ្លាំងតាមរយះក្រសួងបរិស្ថាន ។
បើតាមការបញ្ជាក់របស់គម្រោងជ្រលងសត្វដំរី Elephant Valley Project (EVP) ដំរីសំបូរ បានស្លាប់ដោយសារតែជំងឺធ្មេញ។ មុនពេលស្លាប់ ជំងឺធ្មេញនោះបានធ្វើឱ្យសុខភាពរបស់សំបូរចុះទ្រុឌទ្រោមយ៉ាងខ្លាំងនារយៈពេល១ខែចុងក្រោយនេះ។
មុនចាកចេញទៅខេត្តមណ្ឌលគិរី ដំរីសំបូរ រស់នៅរាជធានីភ្នំពេញបានជាង២០ឆ្នាំជាមួយលោក ស៊ីន សន ដែលជាម្ចាស់ ហើយមានទំនាក់ទំនងយ៉ាងជិតស្និទ្ធជាមួយក្រុមគ្រួសារលោក អ៊ីម សុផល ដែលជាហ្មដំរី។
បើតាមមន្ទីរព័ត៌មានខេត្តមណ្ឌលគិរី ចាប់តាំងពីឆ្នាំ២០១៤មក ដំរីសំបូរ រស់ក្រោមការមើលថែរបស់អង្គការថែរក្សាសត្វដំរីស្រុក (Elliy) ដែលមានទីតាំងនៅភូមិពូត្រុំ សង្កាត់រមនា ក្រុងសែនមនោរម្យ ខេត្តមណ្ឌលគិរី។
គួរជម្រាបថា ដំរីសំបូរ គឺជាដំរីដ៏ចំណាស់ជាងគេមួយរបស់ប្រទេសកម្ពុជា ដែលរួចជីវិតផុតពីរបបខ្មែរក្រហម។ គ្រប់គ្នាធ្លាប់ឃើញភ្ញៀវទេសចរជិះលេងកម្សាន្តនៅតាមរមណីយដ្ឋានវត្តភ្នំ មុខព្រះបរមរាជវាំង នារាជធានីភ្នំពេញ។ ប្រជាពលរដ្ឋកម្ពុជាបានសម្ដែងនូវការស្ដាយស្រណោះយ៉ាងពន់ពេកចំពោះការលាចាកលោករបស់លោកតាដំរីមួយនេះ និងបានបួងសួងសូមវិញ្ញាណក្ខន្ធសំបូរបានទៅកាន់សុគតិភព។
សូមបញ្ជាក់ថា៖ បងប្អូនដែលកន្លងទៅធ្លាប់ទៅលេងរមនីយ៍ដ្ឋានវត្តភ្នំពិតជាស្គាល់ «ដំរីសំបូរ »យ៉ាងច្បាស់ បានជិះ ថតរូបអនុស្សាវរីយ៍ រាប់សិបឆ្នាំកន្លងទៅហើយ ៕
ដោយ ៖ សហការី
