សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានលើកឡើងថា ៖ ក្រសួងមហាផ្ទៃ និងរដ្ឋបាលថ្នាក់ក្រោមជាតិត្រូវមានយន្តការវាយតម្លៃឱ្យបានច្បាស់លាស់ ចៀសវាងនូវការអន្តរាគមន៍ផ្សេងៗ និងត្រូវរៀបចំមនុស្សឱ្យចំគោលដៅ។
សម្តេចធិបតីបានថ្លែងបន្តថា «បើអ្នកតម្រង់ទិសមិនសកម្ម ឬមិនច្បាស់ យើងប្រាកដជាពិបាកហើយ ដូច្នេះបើមូលដ្ឋានស្ទះគឺស្ទះដល់លើ កុំរឹងលើរង្គើរក្រោម ត្រូវរឹងក្រោមទើបលើរឹងមាំ»។
សម្តេចធិបតី ហ៊ុន ម៉ាណែត បានថ្លែងដូចនេះ នៅក្នុងពិធីសម្ពោធដាក់ឱ្យប្រើប្រាស់ជាផ្លូវការអាគារថ្មីទីស្តីការក្រសួងមហាផ្ទៃនៅថ្ងៃទី ០៦ ខែវិច្ឆិកា ឆ្នាំ ២០២៣ ដោយក្នុងនោះលោកបានបន្ថែមថា ក្រសួងត្រូវយកចិត្តទុកដាក់ និងផ្តល់ឱកាសដល់បេក្ខជនជាស្រ្តី ដើម្បីជួយលើកម្ពស់សមភាពយែនឌ័រនៅក្នុងការរៀបចំក្នុងជួរថ្នាក់ដឹកនាំ។
សម្តេចធិបតីបានថ្លែងបន្តថា ៖ ក្រសួងត្រូវពង្រឹងការគ្រប់គ្រងទ្រព្យសម្បត្តិរដ្ឋ និងប្រើប្រាស់ទ្រព្យសម្បតិ្តរដ្ឋទាំងនោះអោយបានល្អក្នុងដែនសមត្ថកិច្ចរបស់ខ្លួន។ បន្ថែមពីលើនេះ ក្រសួងត្រូវលើកកម្ពស់ការទទួលខុសត្រូវ និងភាពជាម្ចាស់របស់ថ្នាក់ក្រោមជាតិ ក្នុងការអនុវត្តមុខងារនិងការប្រើប្រាស់ធនធានហិរញ្ញវត្ថុដែលបានផ្ទេរពីក្រសួងស្ថាប័នថ្នាក់ជាតិឱ្យមានប្រសិទ្ធិភាព តម្លាភាព និងគណនីភាព។ «លុយតិចដាក់ចំគោលដៅបានផលច្រើន តែបើថវិកាច្រើនហើយប្រើអត់ចំគោលដៅ គឺអត់ប្រសិទ្ធិភាព»។
នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានណែនាំដល់ថ្នាក់ក្រោមជាតិមានរដ្ឋបាលរាជធានី ខេត្ត ក្រុង ស្រុក ឲ្យពង្រឹងនូវបទដ្ឋានរចនាសម្ព័ន្ធប្រព័ន្ធការងាររបស់ខ្លួន រៀបចំកែសម្រួលនីតិវិធីនានាមានស្តង់ដារ និងរហ័សជូនទៅដល់សាធារណៈជនដែលទៅទទួលសេវា។
សម្ដេចធិបតី ហ៊ុន ម៉ាណែត បានលើកឡើងថា ដោយជំរុញទៅកាន់រដ្ឋបាល ខេត្ត ក្រុង ស្រុក ខណ្ឌ សង្កាត់ ទាំងអស់ពង្រឹងយន្តការច្រកចេញចូលតែមួយដើម្បីការផ្ដល់សេវាជូនប្រជាពលរដ្ឋកាន់តែប្រសើរ។
ជាមួយគ្នានេះសម្ដេចបានបញ្ជាក់ថាការងារទាំងអស់នេះ ត្រូវមានតម្លាភាពនិងភាពស្អាតស្អំចំពោះជាតិ ហើយរដ្ឋបាលរាជធានី ខេត្ត ត្រូវគ្រប់គ្រងតាមដានទៅដល់ក្រុងស្រុកខណ្ឌសង្កាត់ ក្នុងការរៀបចំហេដ្ឋារចនាសម្ព័ន្ធនៅក្នុងមូលដ្ឋានរបស់ខ្លួនផងដែរ៕
ដោយ ៖ សហការី
