សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ រកឃេីញមុខអ្នកបាញ់លេីភ្នំ គិរីរម្យ ឈ្មោះ ឆាយ ម្នាក់ហេីយ នៅមានទៀត ពេលនេះ សមត្ថកិច្ច នគរបាល និង កងកម្លាំងកងរាជអាវុធហត្ថខេត្តកំពង់ស្ពឺ កំពុងសហការចុះស្រាវជ្រាវករណីនេះដោយយកចិត្តទុកដាក់បំផុត ។
អ្នកភូមិប្រាប់ថា អោយតែគាត់មកលេងចំការម្ដងៗ គឺបាញ់លេងរហូត មិនដឹងថាគាត់កេីតរោគចិត្ត ឬ ជំងឺឃ្លានបាញ់ទេ ។ មនុស្សពូកែបាញ់ដូចគាត់ បេីទៅ អ៊ុយក្រែន ឬ ហ្គាហ្សា ដឹងតែមានតម្លៃហ្មង តែកម្ពុជា មានសុខសន្តិភាព មិនត្រូវការមនុស្សប្រភេទនេះទេ ។
សូមបញ្ជាក់ថា : សមត្ថកិច្ចចម្រុះជាច្រើននាក់បានចុះទៅស្រាវជ្រាវភ្លាមៗ បន្ទាប់ពីមានការផ្ទុះអាវុធជាច្រើនគ្រាប់នៅលើភ្នំគិរីរម្យ និងបានរកឃើញសំបកគ្រាប់បាញ់រួចជាង២០០គ្រាប់ ។
ប្រភពព័ត៌មានបានឲ្យដឹងថា កាលពីព្រឹកថ្ងៃទី១៣ ខែវិច្ឆិកា ឆ្នាំ២០២៣ អាជ្ញាធរខេត្តកំពង់ស្ពឺ បានបង្កើតគណៈកម្មការចំរុះមួយចុះទៅស្រាវជ្រាវនៅចំណុចផ្ទះលំហែស្ថិតនៅភូមិថ្មី ហៅចំការតែ ឃុំចំបក់ ស្រុកភ្នំស្រួច ខេត្តកំពង់ស្ពឺ ជារបស់ឈ្មោះ ឆាយ ភេទប្រុស អាយុប្រហែល២៨ឆ្នាំ រស់នៅរាជធានីភ្នំពេញ ដែលគណៈកម្មការនេះមាន អាជ្ញាធរភូមិ ឃុំ មន្ត្រីបរិស្ថាន និងកម្លាំងនគរបាល និងកងរាជអាវុធហត្ថផងដែរ បន្ទាប់ពីទទួលបានព័ត៌មានពីការបាញ់បោះសេរីជាច្រើនគ្រាប់។
ប្រភពព័ត៌មានបន្ថែមថា : ក្រោយសួរនាំសាក្សីមួយចំនួននៅកន្លែងកើតហេតុ សមត្ថកិច្ចបានដឹងថា កាលពីថ្ងៃទី១១ ខែវិច្ឆិកា ឆ្នាំ២០២៣ ចាប់ពីវេលាម៉ោង១៦:០០នាទី រហូតដល់យប់ជ្រៅ នៅទីតាំងកើតហេតុមានកម្មពិធីខួបកំណើត និងមានការបាញ់បោះសេរីជាបន្តបន្ទាប់។
ប្រភពបន្ថែមថា : សមត្ថកិច្ចបានរកឃើញវត្ថុតាងជុំវិញកន្លែងកើតហេតុរួមមាន សំបកគ្រាប់កាំភ្លើងខ្លីចំរុះចំនួន ១១២គ្រាប់ សំបកគ្រាប់កាំភ្លើងM16ចំនួន ៣៦គ្រាប់ និងសំបកគ្រាប់កាំភ្លើងAKចំនួន៥៥គ្រាប់។ គណ:កម្មការបាននាំវត្ថុតាងទាំងអស់យកទៅរក្សាទុកនៅអធិការដ្ឋាននគរបាលស្រុកភ្នំស្រួច ដើម្បីធ្វើការស្រាវជ្រាវបន្ត។
សូមជម្រាបជូនថា : សមត្ថកិច្ចទាំងកម្លាំងកងរាជអាវុធហត្ថ នគរបាល ត្រូវចាត់វិធានការដោយក្តៅគគុក ដើម្បីអនុវត្តច្បាប់ចំពោះជនប្រព្រឹត្តបទល្មើស បាញ់បោះសេរីក្នុងប្រទេសដែលមានច្បាប់ ៕
ដោយ ៖ សហការី
