សារព័ត៌មាន នគរវត្ត តែងតែនាំមុខគេជានិច្ច
ហាណូយ៖ តបតាមការអញ្ជើញរបស់នាយឧត្តម សេនីយ៍ ផាន វ៉ាន់យ៉ាង (Phan Văn Giang ) រដ្ឋមន្ត្រីក្រសួងការពារប្រទេស នៃសាធារណរដ្ឋសង្គមនិយមវៀតណាមនាយឧត្តមសេនីយ៍ ទៀ សីហា ឧបនាយករដ្ឋ មន្ត្រី រដ្ឋមន្ត្រីក្រសួងការពារជាតិ បានដឹកនាំគណៈប្រតិភូយោធាជាន់ខ្ពស់ក្រសួងការពារជាតិកម្ពុជា ធ្វើទស្សនកិច្ច ជាមិត្តភាព និងជាផ្លូវការនៅសាធារណរដ្ឋសង្គមនិយមវៀតណាម ចាប់ពីថ្ងៃទី១២ ដល់ថ្ងៃទី១៤ ខែវិច្ឆិកា ឆ្នាំ ២០២៣។ អមប្រតិភូនាឱកាសនោះដែរមាន នាយឧត្តម សេនីយ៍ ឥត សារ៉ាត់ អគ្គមេបញ្ជាការរង,នាយសេនាធិ ការចំរុះ ខ.ភ.ម,នាយឧត្តមសេនីយ៍ ម៉ៅ សុផាន់ អគ្គមេ បញ្ជាការរង ខ.ភ.មមេបញ្ជាការកងទ័ពជើងគោក នាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយ និងកិច្ចការបរទេស ព្រមទាំងនាយទាហានជាន់ខ្ពស់ ក្នុងក្រសួងការពារជាតិជាច្រើនរូបទៀត ។
ព្រឹកថ្ងៃទី១៣ ខែវិច្ឆិកា នាយឧត្តមសេនីយ៍ទៀ សីហា អមដោយឧត្តមសេនីយ៍ឯកបំរុង ហ្វុង ស៊ីទីន អនុ ប្រធានអគ្គសេនាធិការកងទ័ពប្រជាជនវៀតណាម បានដឹកនាំគណៈប្រតិភូយោធាជាន់ខ្ពស់ក្រសួងការពារជាតិទៅដាក់កម្រងផ្កាគោរពវិញាណក្ខន្ធនៅស្តូបវីរៈជន និងបន្ទាប់មក បានបន្តទៅដាក់កម្រងផ្កាគោរពវិញាណក្ខន្ធ លោកប្រធាន ហូ ជីមិញ នៅក្នុងរដ្ឋធានីហាណូយ។
បន្ទាប់មកគណៈប្រតិភូក្រសួងការពារជាតិដឹកនាំដោយ នាយឧត្តមសេនីយ៍ ទៀ សីហា បានចូលជួបប្រជុំទ្វេភាគីជាមួយនាយឧត្តមសេនីយ៍ ផាន វ៉ាន់យ៉ាង (Phan Văn Giang) រដ្ឋមន្ត្រីក្រសួងការពារប្រទេសវៀតណាម ដែល ប្រព្រឹត្តទៅនៅក្រសួងការពារប្រទេសវៀតណាម ដោយបានធ្វើពិធីត្រួតពលកងកិត្តិយសត្រែទ័ព កងទ័ពប្រជា ជនវៀតណាមផងដែរ ។ ក្នុងជំនួបទ្វេភាគីរវាងរដ្ឋមន្ត្រីក្រសួងការពារប្រទេសទាំងពីរកម្ពុជា-វៀតណាម បានផ្តោតការយកចិត្តទុកដាក់លើការពង្រឹងកិច្ចសហប្រតិ បត្តិការរវាងកងទ័ពទាំងពីរកម្ពុជា-វៀតណាម ដើម្បីនាំ មកនូវការរីកចម្រើនដល់កងទ័ពទាំងពីរ កម្ពុជា- វៀត ណាម និងរក្សាឱ្យបាននូវទំនាក់ទំនងដ៏ល្អផូរផង់រវាងកងទ័ព និងប្រជាជននៃប្រទេសទាំងពីរកម្ពុជា- វៀតណាមកាន់តែល្អប្រសើរ៕
ដោយ៖ សូរិយា
