សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ គ្រោះអគ្គិភ័យមួយបានឆាបឆេះផ្ទះល្វែងរបស់ប្រជាពលរដ្ឋមួយកន្លែងជាប់ផ្លូវលំ ក្រុមទី២១ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បង្កការភ្ញាក់ផ្អេីលដល់អាជ្ញាធរមូលដ្ឋានចុះអន្តរាគមន៍ជួយពន្លត់ កាលពីវេលាម៉ោង១១:៤០នាទីព្រឹក ថ្ងៃទី១៩ ខែវិច្ឆិកា ឆ្នាំ២០២៣ ។
តាមប្រភពពីប្រជាពលរដ្ឋបានឱ្យដឹងថា ម្ចាស់ផ្ទះមានឈ្មោះ ជា ប៉ូឡាយ ភេទប្រុស និងប្រពន្ធឈ្មោះ អ៉ឹម សុខណា ភេទស្រី មានមុខរបរលក់ហ្គាស និងបញ្ចូលហ្គាស នៅផ្ទះកេីតហេតុខាងលេី ។
ប្រភពដដែលបានឱ្យដឹងថា មុនពេលកេីតហេតុ ម្ចាស់មិននៅដោយចាក់សោរទ្វារចេញក្រៅ ក្រោយមកក៏ឮសំឡេងផ្ទុះធុងហ្គាសលាន់ឮជាខ្លាំង និងមានអណ្ដាតភ្លេីងឆេះឡេីងយ៉ាងសន្ធោសន្ធៅ ភ្លាមៗនោះប្រជាពលរដ្ឋបាននាំគ្នាវ៉ៃសោទម្លុះទ្វារនិងកញ្ចក់ដេីម្បីជួយបាញ់ទឹកពន្លត់ និងរាយការណ៍ទៅអាជ្ញាធរមូលដ្ឋាន ព្រមទាំងមន្ត្រីជំនាញឱ្យចេញរថយន្តពន្លត់អគ្គិភ័យមកជួយបាញ់ទឹកពន្លត់ដេីម្បីកុំឱ្យមានការឆាបឆេះកាន់តែខ្លាំងនិងរាលដាលដល់ផ្ទះអ្នកជិតខាង ។
ក្រោយទទួលព័ត៌មានខាងលេីភ្លាម មន្ត្រីជំនាញបានប្រញាប់ចេញរថយន្តពន្លត់អគ្គិភ័យជាច្រេីនគ្រឿងទៅជួយបាញ់ទឹកពន្លត់យ៉ាងញាប់ដៃញាប់ជេីងដោយប្រេីពេលវេលាប្រមាណតែ១ម៉ោងក៏រលត់ទៅវិញជាស្ថាពរ និងពុំមានគ្រោះថ្នាក់ដល់អាយុជីវិតមនុស្សណាម្នាក់ និងមិនរាលដាលដល់ផ្ទះដ៏ទៃទៀតនោះទេ គ្រាន់តែខូចខាតសម្ភារៈក្នុងផ្ទះរងគ្រោះប៉ុណ្ណោះ ៕
ដោយ ៖ ភារ៉ា ដង្កោ
