សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់ ៖ យោងដីកាបង្គាប់ឲ្យឃុំខ្លួនបណ្ដោះអាសន្ន លេខ១១៧០និង១១៧២ ឃ.ខ/២៣ ចុះថ្ងៃអាទិត្យ ៧កើត ខែកគ្គិក ឆ្នាំថោះ ចត្វាស័ក ព.ស ២៥៦៧ ត្រូវនឹងថ្ងៃទី១៩ ខែវិច្ឆិកា ឆ្នាំ២០២៣ ចេញដោយលោក ខេង សុខលីណា ចៅក្រមស៊ើបសួរនៃសាលាដំបូងខេត្តពោធិ៍សាត់ បានបង្គាប់ឲ្យឃុំខ្លួនជនត្រូវចោទ២នាក់ជាបណ្ដោះអាសន្ន ជននេះត្រូវបានដាក់ឲ្យស្ថិតក្រោមការពិនិត្យពីបទៈ លួចមានស្ថានទម្ងន់ទោស ។
ដីកាបង្គាប់ឲ្យឃុំខ្លួនបណ្ដោះអាសន្នលេខ១១៧០ ឃ.ខ/២៣ ដដែលខាងលើ ឈ្មោះ នន ណាក់ ហៅតៃ ភេទប្រុស អាយុ ៥៦ឆ្នាំ ជនជាតិខ្មែរ កាន់សាសនា ព្រះពុទ្ធ មុខរបរ ធ្វើស្រែ កម្រិតវប្បធម៌ថ្នាក់ទី០៨ ស្ថានភាពគ្រួសារ មានប្រពន្ធ និងកូនចំនួន០៥នាក់ បច្ចុប្បន្ន មានទីលំនៅ ភូមិស្ដុកជុំ ឃុំកោះជុំ ស្រុកកណ្ដៀង ខេត្តពោធិ៍សាត់ ប្រវត្តិនៃការផ្ដន្ទាទោសដោយតុលាការ(មាន)ធ្លាប់ផ្ដន្ទាទោសដាក់ពន្ធនាគារចំនួន០៣ឆ្នាំ បទៈ លួច និងករណីមិនរាងចាលតាមសាលក្រមព្រហ្មទណ្ឌលេខ១២៨០ (ឃ)ចុះថ្ងៃទី២០ ខែតុលា ឆ្នាំ២០២០ របស់សាលាដំបូងខេត្តបាត់ដំបង ។ ហើយត្រូវឃាត់ខ្លួនថ្ងៃទី១៩ ខែវិច្ឆិកា ២០២៣ ។ ជននេះត្រូវបានដាក់ឲ្យស្ថិតក្រោមការពិនិត្យពីបទៈ លួចមានស្ថានទម្ងន់ទោស(បំពុលឆ្កែលួចយកម៉ូតូ)និងករណីមិនរាងចាល ប្រព្រិត្តនៅចំណុចជំនីក ស្ថិតនៅភូមិក្សត្របុរី ឃុំសន្រ្ទែ ស្រុកភ្នំក្រវាញ ខេត្តពោធិ៍សាត់ កាលពីថ្ងៃទី១៨ ខែវិច្ឆិកា ឆ្នាំ២០២៣ បទល្មើសដែលមានចែង និងផ្ដន្ទាទោសតាមមាត្រា៣៥៣.៣៥៧ និងមាត្រា៨៣ នៃក្រមព្រហ្មទណ្ឌ ។
ចំណែកដីកាលេខ១១៧២ ឃ.ខ/២៣ ឯនេះវិញ ឈ្មោះ រឿន រុំ ភេទប្រុស អាយុ ៣៨ឆ្នាំ ជនជាតិខ្មែរ កាន់សាសនា ព្រះពុទ្ធ មុខរបរ ធ្វើស្រែ កម្រិតវប្បធម៌ថ្នាក់ទី០២បច្ចុប្បន្ន រស់នៅ ភូមិគក សង្កាត់ផ្ទះព្រៃ ក្រុង.ខេត្តពោធិ៍សាត់ ស្ថានភាពគ្រួសារ មានប្រពន្ធ និងកូនចំនួន០២នាក់ ប្រវត្តិនៃការផ្ដន្ទាទោសដោយតុលាកា(គ្មាន)។ ឃាត់ខ្លួនថ្ងៃទី១៨ ខែវិច្ឆិកា ឆ្នាំ២០២៣ ។ ជននេះត្រូវបានដាក់ឲ្យស្ថិតក្រោមការពិនិត្យពីបទ លួចមានស្ថានទម្ងន់ទោស(បំពុលឆ្កែលួចយកម៉ូតូ)និងប្រើប្រាសដោយខុសច្បាប់នូវសាធាតុញៀន ប្រព្រិត្តនៅចំណុចជំនីក ភូមិក្សេត្របុរី ឃុំសន្រ្ទែ ស្រុកភ្នំក្រវាញ ខេត្តពោធិ៍សាត់ កាលពីថ្ងៃទី១៨ ខែវិច្ឆិកា ឆ្នាំ២០២៣ បទល្មើសដែលមានចែង និងផ្ដន្ទាទោសតាមមាត្រា៣៥៣ ៣៥៧នៃក្រមព្រហ្មទណ្ឌ និងមាត្រ៤៥ នៃច្បាប់ស្ដីពីការត្រួតពិនិត្យគ្រឿងញៀន ។
ហេតុដូច្នេះសម្រេច បញ្ជាឲ្យភ្នាក់ងារមានសមត្ថកិច្ចនៃកម្លាំងសាធារណៈ ធ្វើការនាំខ្លួនជនត្រូវចោទដែលមានឈ្មោះខាងលើ ទៅពន្ធនាគារខេត្តពោធិ៍សាត់ ដោយអនុវត្តឲ្យបានត្រឹមត្រូវតាមនីតិវិធីច្បាប់ ៕
ដោយ៖ ប៉ឹម ពិន
