សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ ពិធីបុណ្យអុំទូក បណ្ដែតប្រទីប សំពះព្រះខែនិងអកអំបុករៀបចំឡើងដោយរដ្ឋបាលខេត្តរតនគិរីរយៈពេល២ថ្ងៃគឺថ្ងៃទី២៣ដល់ថ្ងៃទី២៤ ខែវិច្ឆិកា ឆ្នាំ២០២៣នារមណីយដ្ឋានបឹងកន្សែងត្រូវបានបិទបញ្ចប់ដោយជោគជ័យក្រោមវត្តមានលោក គិត ទ្រី អ្នកតំណាងរាស្រ្តមណ្ឌលរតនគិរី លោក ណាប់ ប៊ុនហេង ប្រធានក្រុមប្រឹក្សាខេត្ត និងលោក ញ៉ែម សំអឿន អភិបាលខេត្តរតនគិរីនិងលោកស្រី បានប្រព្រឹត្តទៅយ៉ាងរលូន ត្រចះត្រចង់ ពោរពេញទៅដោយសម្រែក ហ៊ោរ កញ្ជ្រៀវ សប្បាយរីករាយ ញញឹមញញែម ពីសំណាក់បងប្អូនប្រជាពលរដ្ឋយ៉ាងច្រើនកុះករ រួមជាមួយនឹងក្រុមកីឡាករ កីឡាការិនីចំណុះទូកទាំង៣៦ទូកផងដែរ។
បើតាមរបាយការណ៍របស់មន្ទីរទេសចរណ៍ខេត្តរតនគិរីបានបង្ហាញថា ពិធីបុណ្យអុំទូកបណ្តែតប្រទីបសំពះព្រះខែ និងអកអំបុករយៈពេល២ថ្ងៃនៅបឹងកន្សែង មានប្រជាពលរដ្ឋក្នុងខេត្តមានការចូលទស្សនា ចំនួន ៤៨,២០៩នាក់, ភ្ញៀវទេសចរជាតិម៩,៨៩៣នាក់,និងភ្ញៀវអន្តរជាតិ៩១៧ នាក់ (សរុបរួម ៥៩,០១៩នាក់) ។
ក្នុងឱកាសនៃពិធីបុណ្យអុំទូក បណ្តែតប្រទីប សំពះព្រះខែនិងអកអំបុក នៅបឹងកន្សែងនៅថ្ងៃទី២៤ ខែវិច្ឆិកា ឆ្នាំ២០២៣ដែលជាថ្ងៃទី២ នៃពិធីបុណ្យលោក ញ៉ែម សំអឿន អភិបាលខេត្តរតនគិរី និងលោកស្រី រួមនឹងថ្នាក់ដឹកនាំខេត្តជាច្រើនរូបទៀតបានលែងកូនត្រី គល់រាំង,ត្រីកាបស៊ីស្មៅ និងត្រីត្រសក់ សរុបប្រមាណ៤ម៉ឺនក្បាលចូលទៅក្នុងបឹងកន្សែងផងដែរ។
នារសៀលថ្ងៃទី២៤ ខែវិច្ឆិកា ឆ្នាំ២០២៣នេះលោក ញ៉ែម សំអឿន អភិបាលខេត្តរតនគិរីបានកោតសរសើរនិងវាយតម្លៃខ្ពស់ចំពោះគ្រប់មន្ទីរ អង្គភាព រដ្ឋបាលក្រុង ស្រុក និងវិស័យឯកជនទាំងអស់ ដែលបានចូលរួមសហការរៀបចំផលិតទូក និងសម្រិត សម្រាំង តុបតែងទូកបានល្អ ព្រមទាំងមានកីឡាករ កីឡាការិនីឆ្នើមៗ ដែលមានកម្លាំងខ្លាំងខ្លាប្រកប ដោយថាមពល និងមានបច្ចេកទេសគ្រប់គ្រាន់ ដែលធ្វើឲ្យពិធីប្រណាំងទូកនាឆ្នាំនេះបានដំណើរការ ទៅដោយរលូន និងទទួលបានជោគជ័យស្របតាមកម្មវិធីដែលបានគ្រោងទុក។
ថ្លែងអំណរគុណដល់គណៈកម្មការរៀបចំពិធីប្រណាំងទូក និងគ្រប់ អនុគណៈកម្មការទាំងអស់ដែលបានខិតខំប្រឹងប្រែងបំពេញតួនាទី ភារកិច្ចរបស់ខ្លួនប្រកបដោយស្មារតី ទទួលខុសត្រូវខ្ពស់ រួមសហការបានល្អ ទាំងការងារតុបតែងលម្អភ្លើងពណ៌ ការរៀបចំប្រទីប ការពារ សន្តិសុខ សណ្តាប់ធ្នាប់ ការងាររៀបចំបច្ចេកទេសប្រណាំងទូក ការផ្សព្វផ្សាយព័ត៌មាន ការរៀបចំស្តង់ ពិព័រណ៍បង្ហាញនិងលក់ផលិត្តផលនានាក៏ដូចជាសំអាតអនាម័យបរិស្ថានជុំវិញនោះទៀតផង៕
ដោយ ៖ ជីវ័ន្ត
