សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សិស្សសាលា២នាក់ជិះម៉ូតូឌុបគ្នាបញ្ច្រាសទិសដៅចរាចរណ៍ជ្រុលទៅបុកជាមួយម៉ូតូវ៉េវពេញទំហឹងបណ្តាលឱ្យរងរបួសធ្ងន់ម្នាក់ស្រាល២នាក់ត្រូវបានកងសង្គ្រោះបន្ទាន់៧១១កងពលតូចលេខ៧០ដឹកទៅមន្ទីរពេទ្យភ្លាមៗ។
ហេតុការណ៍នេះបានកេីតឡើងកាលពីវេលាម៉ោង០២:៥០នាទី ថ្ងៃទី០៦ខែធ្នូ ឆ្នាំ២០២៣ នៅតាមផ្លូវជាតិលេខ៣ក្នុងភូមិព្រៃព្រីងត្បូង សង្កាត់ចោមចៅទី៣ ខណ្ឌពោធិ៍សែនជ័យ ។
ជនរងគ្រោះដែលរងរបួសធ្ងន់ឈ្មោះ ចន សុមាវត្តី ភេទស្រី អាយុ១៥ឆ្នាំ រស់នៅភូមិត្រពាំងទួល សង្កាត់កំបូល ខណ្ឌកំបូល ។
តាមប្រភពព័ត៌មានបានឱ្យដឹងថា មុនពេលកេីតហេតុគេបានឃេីញក្មេងស្រីសិស្សសាលា២នាក់ជិះម៉ូតូម៉ាកស្គូពី ពណ៌ស ពាក់ស្លាកលេខសៀមរាប 1AI -5705 ធ្វេីដំណេីរតាមបណ្តោយផ្លូវជាតិលេខ៣ក្នុងទិសដៅពីជេីងទៅត្បូងបញ្ច្រាសទិសដៅចរាចរណ៍ ខណៈមកដល់ចំណុចកេីតហេតុក៏គេចរ៉ឺម៉កដែលឈប់ប្របចិញ្ចេីមផ្លូវជ្រុលចង្កូតមកកណ្តាលផ្លូវបុកជាមួយម៉ូតូវ៉េវ ពណ៌ខៀវ ពាក់ស្លាកលេខកំពង់ចាម1E-8857 ដែលបេីកបរដោយនារីម្នាក់បណ្តាលឱ្យភាគីខាងម៉ូតូសិស្សសាលារងរបួសបាក់ជេីងម្នាក់ ចំណែកភាគីខាងម៉ូតូវ៉េវរងរបួសស្រាល។
ក្រោយពេលកេីតហេតុជនរងគ្រោះត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅព្យាបាលនៅមន្ទីរពេទ្យកុមារជាតិ។
ចំណែកម៉ូតូត្រូវបានសមត្ថកិច្ចធ្វេីការវាស់វែងយកទៅរក្សាទុករង់ចាំដោះស្រាយនៅពេលក្រោយ៕
ដោយ៖ សុខាសែនជ័យ
