🔴តុលាការដោះលែងនារីស្រស់ស្អាតនោះឱ្យមានសេរីភាពហើយ ខណៈដែលបើករថយន្តទំនើបបុកបុរសម្នាក់ជិះម៉ូតូអាគុយបណ្តាលឱ្យស្លាប់

ចែករំលែក៖

ភ្នំពេញ ៖ លោក ប៉េង ម៉េងគ័ង ព្រះរាជអាជ្ញារងនិងជាអ្នកនាំពាក្យ អយ្យការអមសាលាដំបូងរាជធានីភ្នំពេញ បានប្រាប់បណ្តាញសារព័ត៌មានក្នុងស្រុកថា សំណុំរឿងស្រីស្រស់បើករថយន្តបុកបណ្តាលឱ្យស្លាប់អ្នកដទៃនោះ ត្រូវបានតំណាងអយ្យការបើកការស៊ើបសួរចប់សព្វគ្រប់ហើយ ហើយនៅថ្ងៃទី៥ ខែធ្នូ ឆ្នាំ២០២៣ សំណុំរឿងនោះក៏ត្រូវបានចាត់បញ្ជូនទៅខាងចៅក្រមស៊ើបសួររួចហើយដែរ ។

លោកអ្នកនាំពាក្យខាងអយ្យការបញ្ជាក់ ថា តំណាងអយ្យការបានចេញដីកាសន្និដ្ឋានបញ្ជូនរឿងឱ្យស៊ើបសួរពីបទ. បើកបរធ្វេសប្រហែស ខ្ជីខ្ជា មិនប្រុងប្រយ័ត្នឬមិនគោរពកាតព្វកិច្ច ដែលបទប្បញ្ញត្តិស្តីពីចរាចរណ៍ផ្លូវគោក បណ្តាលឱ្យស្លាប់អ្នកដទៃជាបទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញត្តិមាត្រា ៨៥ នៃច្បាប់ស្តីពីចរាចរណ៍ផ្លូវគោក ។ ចំណែកអ្នកបើកបរដែលហៅថា«ជនបង្ក»មានឈ្មោះ Chea Naka ជាតារាសម្តែងមានឈ្មោះល្បីនៅលើបណ្តាញសង្គមម្នាក់នោះត្រូវបានអនុញ្ញាតឱ្យមានសេរីភាពវិញ បន្ទាប់ពីសងសំណងរដ្ឋប្បវេណីដល់ក្រុមគ្រួសារជនរងគ្រោះ ដែលបញ្ចប់ត្រឹមដកពាក្យបណ្តឹង ។

សូមបញ្ជាក់ថា បុរសម្នាក់បានស្លាប់បាត់បង់ជីវិតភ្លាមៗ ខណៈកំពុងជិះម៉ូតូអាគុយមួយគ្រឿង ដែលបង្កដោយស្រីស្រស់ស្រវឹងស្រាបើករថយន្តស៊េរីទំនើបបុកអូសជាច្រើនម៉ែត្រ កាលពីវេលាម៉ោង ១ និង៣០នាទីយប់រំលងអធ្រាត្រឈានចូលថ្ងៃទី២ ខែធ្នូ ឆ្នាំ២០២៣ ស្ថិតនៅត្រង់ចំណុចមុខព្រលានយន្តហោះអន្តរជាតិភ្នំពេញ តាមបណ្ដោយមហាវិថីសហព័ន្ធរុស្ស៊ី ក្នុងសង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។

បើតាមសមត្ថកិច្ចឱ្យដឹងថា ជនរងគ្រោះមានឈ្មោះ សុខ ម៉ាល័យ អាយុ៣៤ឆ្នាំ មុខរបរលើកអីវ៉ាន់ក្នុងព្រលានយន្តហោះ រស់នៅក្នុងសង្កាត់កាកាបទី១ ខណ្ឌពោធិ៏សែនជ័យ រាជធានីភ្នំពេញ។ ចំណែកអ្នកបើកបរឈ្មោះ Chea Naka ជាតារាសម្តែងម្នាក់មានឈ្មោះបោះសំឡេងនៅលើបណ្តាញសង្គមគ្រាន់បើដែរ ។

សាក្សីនៅកន្លែងកើតហេតុបានឱ្យដឹងថា ដំបូងគេឃើញជនរងគ្រោះជិះម៉ូតូអាគុយ ពណ៌ខ្មៅ១គ្រឿងមិនមានស្លាកលេខ ធ្វើដំណើរតាមបណ្ដោយមហាវិថីសហព័ន្ធរុស្ស៊ីក្នុងទិសដៅពីលិចទៅកើតក្នុងល្បឿនលឿនល្មម ខណៈមកដល់ចំណុចខាងលើស្រាប់តែមានរថយន្ត ម៉ាក FORD MUSTANG ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ 2BW-0080 បើកបរដោយនារីស្រស់ស្អាតម្នាក់ រួមដំណើរជាមួយបុរស៣នាក់យ៉ាងលឿនរេចង្កូតពេញផ្លូវទៅបុកជនរងគ្រោះកំពុងជិះម៉ូតូអាគុយអូសជាច្រើនម៉ែត្រ បណ្ដាលឱ្យស្លាប់បាត់បង់ជីវិតនៅកន្លែងកើតហេតុ ។

ពេលនោះនារីដែលជាជនបង្កបានចុះពីលើរថយន្តក្នុងសភាពស្រវឹងស្រាជោកជាំ ក៏ត្រូវបានសមត្ថកិច្ចនគរបាលខណ្ឌពោធិ៍សែនជ័យឃាត់ខ្លួននិងនាំទៅស្នាក់ការប៉ុស្តិ៍នគរបាលរដ្ឋបាលកាកាបទី១ ដើម្បីធ្វើការសាកសួរ ហើយបានបញ្ជូនខ្លួននារីជាជនបង្កទៅកាន់សាលាដំបូងរាជធានីភ្នំពេញមិនបានប៉ុន្មានម៉ោងផង ភាគីខាងជនបង្កនិងជនរងគ្រោះបានធ្វើការចរចាគ្នា ដោយជនបង្កបានសងសំណងរដ្ឋប្បវេណី រហូតភាគីខាងជនរងគ្រោះបានដកពាក្យបណ្តឹងវិញ។ ទោះបីភាគីបង្កបានសងសំណងរដ្ឋប្បវេណីដល់ភាគីជនរងគ្រោះសព្វគ្រប់ក៏ដោយ ប៉ុន្តែជនបង្កនៅជាប់បណ្តឹងអាជ្ញាដែលត្រូវអនុវត្តនីតិវិធី តែតុលាការអនុវត្តតែសំណុំរឿងតែប៉ុណ្ណោះ ចំណែកជនបង្កជានារីស្រស់ស្អាតនោះត្រូវបានដោះលែងឱ្យមានសេរីភាពវិញហើយ៕