សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ លោក វង សូត អនុប្រធានទី២រដ្ឋសភា និងលោកជំទាវ បានអញ្ជើញជួបសំណេះសំណាលជាមួយសិស្សានុសិស្ស និងនាំយករង្វាន់លើកទឹកចិត្ត ផ្តល់ជូនដល់សិស្ស ដែលប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២២-២០២៣ ចំនួន៧១៥នាក់ ដែលមកពី៤វិទ្យាល័យក្នុងខេត្តត្បូងឃ្មុំ គឺវិទ្យាល័យក្រែក វិទ្យាល័យ ហ៊ុន សែន ពញាក្រែក វិទ្យាល័យ ជាស៊ីម កណ្តោលជ្រុំ និងវិទ្យាល័យ ហេង សំរិនអន្លង់ជ្រៃ ដើម្បីជាការលើកទឹកចិត្ត ដល់ក្មួយៗ សិស្សានុសិស្ស ដែលបានខិតខំរៀនសូត រហូតទទួលបានជ័យលាភីក្នុងការប្រលងសញ្ញាបត្រមធ្យមសិក្សាទុតិយភូមិនេះ ដែលពិធីនេះត្រូវបានធ្វើឡើង នាព្រឹកថ្ងៃទី ១៦ ខែធ្នូ ឆ្នាំ២០២៣ នៅសាលាស្រុកពញាក្រែក ខេត្តត្បូងឃ្មុំ។
ក្នុងឱកាសនោះ លោក វង សូត បានកោតសរសើរចំពោះសិស្សានុសិស្ស ដែលមានឆន្ទៈក្នុងការខិតខំប្រឹងប្រែងរៀនសូត្រ រួមផ្សំជាមួយនឹងការយកចិត្តទុក្ខដាក់ពី មន្ទីរអប់រំយុវជន និងកីឡា គណៈគ្រប់គ្រងសាលា លោកគ្រូ អ្នកគ្រូ អាជ្ញាធរគ្រប់លំដាប់ថ្នាក់ និងដោយមានការលើកទឹកចិត្តពីឪពុកម្តាយ រហូតប្រឡងជាប់ និងទទួលបាននិទ្ទេសល្អទៀតផង។ លោក បានបញ្ជាក់ថា ៖ រាជរដ្ឋាភិបាល នីតិកាលទី៧ នៃរដ្ឋសភា បានដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដែលមានមុំមួយ គឺផ្តោតទៅលើការអភិវឌ្ឍមូលធនមនុស្ស ដែលមានទាំងសមត្ថភាពខ្ពស់ ចំណេះដឹង ជំនាញច្បាស់លាស់ និងមានសុខភាពល្អ។ ហេតុដូចនេះ សូមក្មួយៗ ប្រកាន់ខ្ជាប់នូវសីលធម៌ គុណធម៌ ភាពកត្តញ្ញូ និងបន្តខិតខំប្រឹងប្រែងរៀនសូត្រឱ្យបានពូកែ ដើម្បីក្លាយខ្លួនជាធនធានមនុស្សដ៏ល្អរបស់ប្រទេសជាតិនាថ្ងៃអនាគត។
លោក វង សូត បានលើកឡើងថា ទាំងអស់នេះ គឺជាលទ្ធផលជោគជ័យមួយផ្នែករបស់ក្មួយៗ នៅកម្រិតចំណេះដឹងទូទៅ ក៏ប៉ុន្តែ ចំពោះមុខ យើងត្រូវគិតគូអំពីអនាគត ជាពិសេស ត្រូវបន្តការសិក្សា លើមុខជំនាញ ក្នុងក្របខ័ណ្ឌបច្ចេកទេស ដើម្បីចូលរួមប្រកួតប្រជែងក្នុងទីផ្សារការងារ តាមរយៈការប្រលងប្រជែង នៅកម្រិតឧត្តមសិក្សា ទៅតាមការសម្រេចចិត្ត និងទេពកោសល របស់ខ្លួនឯង ពោលគឺ ទៅតាមសមត្ថភាព ដែលខ្លួនឯងមានពិតប្រាកដ។ ឆ្លៀតឱកាសនេះ លោក ក៏បានលើកទឹកចិត្តដល់ក្មួយៗដែលមិនបានប្រលងជាប់ និងដែលមានទទួលបាននិទេសមិនល្អ សូមកុំអស់សង្ឃឹម និងជំរុញឱ្យក្មួយៗចូលរៀនជំនាញបច្ចេកទេស ដែលរាជរដ្ឋាភិបាល បាននិងកំពុងយកចិត្តទុក្ខដាក់ជំរុញការបណ្តុះបណ្តាលនេះដល់យុវជន ដើម្បីចាប់យកមុខរបរ ជំរុញសេដ្ឋកិច្ចគ្រួសារ និងសង្គមជាតិ។
បើតាមលោក អ៉ិន ពៅសម្បត្តិ ប្រធានមន្ទីរ អប់រំយុវជន និងកីឡា ខេត្តត្បូងឃ្មុំ បានឱ្យដឹងថា លទ្ធផលប្រលងសញ្ញាបត្រមធ្យមសិក្សាទុតិយភូមិ សម័យប្រលងថ្ងៃទី៦ ខែវិច្ឆិកា ឆ្នាំ ២០២៣ នៅទូទាំងខេត្តត្បូងឃ្មុំ ដែលមានបេក្ខជនដាក់ពាក្យប្រឡងសរុបរួមចំនួន ៥,៥៦៥ នាក់ ស្រី ៣,១៤៣ នាក់ បេក្ខជនបានមកប្រឡងសរុបចំនួន ៥,៤៩១ នាក់ ស្រី ៣,១១៣ នាក់ បេក្ខជនប្រឡងជាប់សរុបចំនួន ៤,០៧០ នាក់ ស្រី ២,៤២៦ នាក់ ស្មើនឹង ៧៤.១២ ភាគរយ ក្នុងនោះនិទ្ទេសA ៥៥ នាក់ ស្រី ៣៨ នាក់ និទ្ទេសB ២៣៩ នាក់ ស្រី ១៥៣ នាក់ និទ្ទេសC ៧២៣ នាក់ ស្រី ៤៤៣ នាក់ និទ្ទេសD ១,៤១៨ នាក់ ស្រី ៨៨៣ នាក់ និទ្ទេសE ១,៦៣៥ នាក់ ស្រី ៩០៩ នាក់។
គួរបញ្ជាក់ថា រង្វាន់លើកទឹកចិត្តដែលលោក វង សូត និងលោកជំទាវ បានផ្តល់ជូនសិស្សប្រឡងជាប់និទ្ទេស A នៅក្នុងស្រុកពញាក្រែកចំនួន៩នាក់ ក្នុងម្នាក់ៗ ទទួលបានថវិកា ចំនួន ២លានរៀល និទ្ទេសB ចំនួន៣៩នាក់ ក្នុងម្នាក់ៗ ទទួលបានថវិកា ចំនួន៤០ម៉ីនរៀល និទ្ទេសC ចំនួន១៤២នាក់ និទ្ទេសD ចំនួន២៣៨ និងនិទ្ទេសE ចំនួន២៨៦នាក់ក្នុងម្នាក់ៗ ទទួលបានថវិកា ចំនួន៥ម៉ីនរៀល ឧបត្ថម្ភវិទ្យាល័យក្រែក វិទ្យាល័យ ហ៊ុន សែនពញាក្រែក វិទ្យាល័យ ជាស៊ីមកណ្តោលជ្រុំ និងវិទ្យាល័យ ហេង សំរិនអន្លង់ជ្រៃ ក្នុងវិទ្យាល័យមួយៗ ថវិកា១លាន រៀង និងឧបត្ថម្ភលោកគ្រូ អ្នកគ្រូក្រុមប្រឹក្សា និងអភិបាលស្រុក ការិយាល័យអប់រំស្រុក និងនាយក នាយករង វិទ្យាល័យទាំង៤ សរុប៤២នាក់ ក្នុងម្នាក់ៗ ទទួលបានថវិកា ចំនួន៥ម៉ីនរៀលផងដែរ ៕
ដោយ ៖ សហការី
