សារព័ត៌មាន នគរវត្ត តែងតែនាំមុខគេជានិច្ច
អ្នកចាត់ការទូទៅលោក Andoni Iraola បាននិយាយថា ខ្សែបម្រើរបស់ Bournemouth កីឡាករ Hamed Traore នឹងអវត្តមានសម្រាប់ពេលខ្លះ បន្ទាប់ពីឆ្លងជំងឺគ្រុនចាញ់។ កីឡាករអន្តរជាតិកូតឌីវ័រអាយុ២៣ឆ្នាំត្រូវបានព្យាបាលនៅក្នុងមន្ទីរពេទ្យបន្ទាប់ពីសម្រាកអន្តរជាតិខែវិច្ឆិកា។
គាត់មិនមានឈ្មោះក្នុងក្រុមជម្រើសជាតិកូតឌីវ័រទេសម្រាប់ការប្រកួតពានរង្វាន់ Africa Cup of Nations ដែលនឹងចាប់ផ្ដើមនៅថ្ងៃទី១៣ ខែមករាខាងមុខនេះ។
លោក Iraola បន្តថា “ប៉ុន្មានសប្តាហ៍កន្លងមកនេះគឺជាស្ថានភាពដ៏លំបាកមួយសម្រាប់គាត់ផ្ទាល់។ យើងត្រូវតែធ្វើឱ្យប្រាកដថា គាត់មិនអីទេ ហើយគាត់បានជាសះស្បើយវិញយ៉ាងត្រឹមត្រូវ”។ ពេលនេះ Traore កំពុងសម្រាកព្យាបាលនៅផ្ទះ ហើយនឹងធ្វើតេស្តបន្ថែមទៀត។ ជំងឺត្រូពិចដែលរីករាលដាលដោយមូស គ្រុនចាញ់មិនឆ្លងទេ រោគសញ្ញាជាធម្មតាលេចឡើងពី៧ទៅ១៨ថ្ងៃបន្ទាប់ពីការឆ្លង។
Traore បានចូលរួមជាមួយ Bournemouth ក្នុងខែមករា ក្នុងលក្ខខណ្ឌខ្ចីជើងពីក្លិបអ៊ីតាលី Sassuolo មុនពេលកិច្ចព្រមព្រៀងអចិន្ត្រៃយ៍ដែលមានតម្លៃប្រហែល២០លានផោនត្រូវបានយល់ព្រមក្នុងរដូវក្តៅ។
គាត់បានបង្ហាញខ្លួនត្រឹមតែ១០ប្រកួតនៅ Premier League ហើយមិនបានលេងឱ្យ Bournemouth ចាប់តាំងពីថ្ងៃទី១ ខែវិច្ឆិកា។ គាត់បានបង្ហាញខ្លួននៅក្នុងការទទួលជ័យជម្នះរបស់កូតឌីវ័រលើ Seychelles និង Gambia នៅថ្ងៃទី១៧ និងថ្ងៃទី២០ ខែវិច្ឆិការៀងគ្នា។
បច្ចុប្បន្នក្រុម Bournemouth ស្ថិតនៅលេខ១២ក្នុងតារាងនឹងធ្វើដំណើរទៅជួបក្រុមម្ចាស់ផ្ទះមាន់ខ្នាយមាស Tottenham នៅថ្ងៃអាទិត្យ ទី៣១ ខែធ្នូនេះ៕
ដោយ៖ ភារៈ(រូបភាព ៖ BBC Sport)
