សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើករថយន្តលឿនជ្រុលទៅបុកម៉ូតូ ជិះដោយបុរស២នាក់ ក្នុងទិសដៅបញ្រ្ចាសគ្នា បណ្តាលឲ្យបុរសម្នាក់បានស្លាប់នៅនឹងកន្លែង ម្នាក់ទៀតរងរបួសធ្ងន់ ហើយរថយន្តបានបន្ថែមល្បឿនបើករត់ទាំងដាច់កង់មួយចំហៀងរហូតមកដល់ផ្លូវឧកញ៉ាម៉ុងរិទ្ធីទៅមុខលែងរួច ទើបអ្នកបើកបរទុករថយន្តចោលហើយដោះស្លាកលេខរត់គេចខ្លួនបាត់។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងម៉ោង ១១និង៣០នាទីយប់ថ្ងៃទី ៣១ខែធ្នូឆ្នាំ ២០២៣ ស្ថិតនៅលើផ្លូវបេតុងក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
សមត្ថកិច្ចបានឲ្យដឹងថាសព ឈ្មោះ ឆាន ឆុន អាយុ ១៨ឆ្នាំ មុខរបរ បុគ្គលិកក្រុមហ៊ុន រស់នៅភូមិជ្រោយមន្រ្ដីក្រោម ឃុំឫស្សីជ្រោយ ស្រុកមុខកំពូល ខេត្តកណ្ដាល ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសរងគ្រោះ២នាក់ បានជិះម៉ូតូម៉ាកហុងដាឌ្រីមសង់សេ១២៥ ពណ៌ខ្មៅពាក់ស្លាកលេខ ភ្នំពេញ 1HD-1756 ជិះឌុបគ្នាតាមបណ្តោយផ្លូវបេតុងទិសដៅពីត្បូងមកជើងក្នុងល្បឿនមធ្យម ខណៈបើកមកដល់ចំណុចកើតហេតុដោយមានការដ្ឋាន កំពុងតែបិទបារ៉ាស់ជួសជុលផ្លូវរៀងចង្អៀតបន្តិចស្រាប់តែមានរថយន្តបង្កម៉ាក តូយ៉ូតា Camry ពណ៌សបានដោះស្លាកលេខចេញ ធ្វើដំណើរក្នុងទិសដៅបញ្រ្ចាសគ្នា ពីជើងមកត្បូងក្នុងល្បឿនលឿន បានរេចង្កូតជ្រុលទៅបុកម៉ូតូពេញទំហឹងដួលជនរងគ្រោះ ខ្ទាតពេញផ្លូវពេលនោះដែរ ពលរដ្ឋជិតខាងរត់ទៅជួយលើកតែអកុសលបុរសម្នាក់ ត្រូវបានស្លាប់ភ្លាមៗនៅនឹងកន្លែងចំណែកបុរសម្នាក់ទៀតរងរបួសធ្ងន់ ត្រូវបានដឹកទៅសង្រ្គោះភ្លាមៗផងដែរ។
ចំណែករថយន្តបង្កបានបន្តល្បឿន បើករត់រហូតទាំងដាច់កង់ម្ខាង បើកទៅដល់ផ្លូវឧកញ៉ាមុងរិទ្ធីក៏ទៅមុខលែងរួចភ្លាមនោះដែរ អ្នកបើករថយន្តបង្កក៏បានចុះដោះស្លាកលេខចេញ រួចរត់គេចខ្លួនទុករថយន្តចោល។
បន្ទាប់ពីកើតហេតុសមត្ថកិច្ចមូលដ្ឋាន សហការជាមួយនឹងសមត្ថកិច្ចជំនាញចរាចរណ៍ ចុះមកដល់រួចវាស់វែងធ្វើកំណត់ហេតុយករថយន្ត និងម៉ូតូទៅរក្សាទុក។
ចំណែកឯសពសមត្ថកិច្ចធ្វើកំណត់ហេតុ ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
ដោយ៖ ជ្រោយពេជ្រ
