សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន ៖ មនុស្សក្នុងលោកមានវិចារណញ្ញាណ ដឹងខុស ដឹងត្រូវ ចេះយំស្រែក សើច សប្បាយ ស្នេហា ប៉ុន្តែអ្នកខ្លះមានស្នេហា ខ្វះឧត្តមគតិ ជាឪពុក ម្តាយ ហាក់ចាញ់សត្វផង បង្កើតកូនហើយ យកទៅបោះចោល ឯណាទៅតម្លៃជាអ្នកផ្តល់កំណើត ?
ជាក់ស្តែង ! អ្នកណាគេអីក៏ចិត្តដាក់ម៉្លេះ…រើសបានទារកម្នាក់ដែលប្លុងចោលក្នុងចម្ការដំឡូងមីមួយកន្លែង មានទម្ងន់២.៧គីឡូក្រាម មានច្រមុះស្រួច សម្បុរសណ្តែកបាយ ។ លុះពេលអ្នកភូមិដើរទៅកាប់ផ្លែចេកក្បែរចម្ការនោះក៏បានប្រទះឃើញទារកដេកគ្របស្លឹកដំឡូងពីលើ មានទាំងឈាមហូរចេញពីផ្ចិត ដែលបង្ហាញថា ទើបតែសម្រាលថ្មីៗ ហើយស្ត្រីជាម្តាយបានចាកចេញ ដោយទុកកូនចោលដូចសត្វធាតុ ។ ដោយឃើញទារកនៅមានដង្ហើមក៏រត់ទៅប្រាប់អ្នកជិតខាងឱ្យរាយការណ៍ជូនមេភូមិ និងសមត្ថកិច្ចនគរបាលឱ្យចុះពិនិត្យភ្លាមៗ ។
ហេតុការណ៍នេះបានបង្កឱ្យមានការភ្ញាក់ផ្អើល នៅវេលាម៉ោង៧និង៣០នាទីព្រឹកថ្ងៃទី២ ខែមករា ឆ្នាំ២០២៤ ស្ថិតនៅចំណុចចម្ការដំឡូងមី ក្នុងភូមិព្រៃមង្គល សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានបានឱ្យដឹងថា ៖ អ្នកដែលប្រទះឃើញទារកមុនគេឈ្មោះ គុម ស្រីលីន ភេទស្រី រស់នៅក្នុងភូមិខាងលើ ។ ក្រោយពីប្រទះឃើញ ដោយសារតែនាងមានជីវភាពក្រីក្រខ្វះខាតមិនអាចយកមកចិញ្ចឹមបាន ក៏ប្រគល់ឱ្យទៅមេការស្តង់ដំឡូងមីម្នាក់ ឈ្មោះ វ៉ិត សុខលី អាយុ៣៤ឆ្នាំ ប្រពន្ធឈ្មោះ ទិត្យ ឆវ័ន្ត អាយុ៣១ឆ្នាំ ដែលមានកូនស្រី២នាក់ កូនទី១ អាយុ៨ឆ្នាំ កូនទី២ អាយុ៦ឆ្នាំ ។ រីឯទារកសុំពីស្ត្រីដែលរើសបានជាកូនប្រុស ត្រូវបានពួកគាត់ដាក់ឈ្មោះឱ្យភ្លាមៗថា « លី សុខសំណាង » ។
បើតាមការរៀបរាប់ពីស្ត្រីឈ្មោះ ភិន ឡោស អាយុ៤២ឆ្នាំ រស់នៅភូមិព្រៃមង្គល បានឱ្យដឹងទាំងការតក់ស្លុតប្រាប់អ្នកសារព័ត៌មានថា នៅព្រឹកថ្ងៃកើតហេតុ កូនស្រីរបស់គាត់បានដើរទៅកាប់ផ្លែចេកនៅក្នុងចម្ការក្បែរផ្ទះ ពេលនាងក្រឡេកមើលទៅក្នុងចម្ការដំឡូងមីក្បែររបង ស្រាប់តែប្រទះឃើញមានទារកមួយ ត្រូវបានគ្របស្លឹកដំឡូងមី តែនៅមានដង្ហើម និង មានឈាមប្រឡាក់ពេញខ្លួនក៏រត់ទៅប្រាប់គាត់ជាម្តាយឱ្យនាំគ្នាទៅមើល និងលើកបីយកទៅលាងជម្រះខ្លួន និងរាយការណ៍ជូនអាជ្ញាធរភូមិនិងនគរបាលផងដែរ៕
ដោយ ៖ ស សារ៉េត
