🔥ឆ្លងចរន្តអគ្គិសនីឆេះផ្ទះប្រជាពលរដ្ឋមួយកន្លែងរងការខូចខាត

ភ្នំពេញ៖​ អគ្គិភ័យមួយបានឆាបឆេះផ្ទះប្រជាពលរដ្ឋមួយខ្នងបណ្តាលឱ្យរងការខូចខាតនិងបង្កការភ្ញាក់ផ្អេីលដល់បងប្អូនប្រជាពលរដ្ឋរាយការណ៍ទៅសមត្ថកិច្ចនិងក្រុមរថយន្តពន្លត់អគ្គិភ័យចុះអន្តរាគមន៍ភ្លាមៗ​ កាលពីវេលាម៉ោង៥និង៤៥នាទីល្ងាចថ្ងៃទី០៦ ខែមករា ឆ្នាំ២០២៤ នៅតាមផ្លូវបេតុងភូមិកន្ទោកត្បូង សង្កាត់កន្ទោក ខណ្ឌកំបូល ។

ម្ចាស់ផ្ទះឈ្មោះ សយ សុខណា ភេទប្រុស អាយុ៦២ឆ្នាំ មុខរបរជាងជួសជុលម៉ូតូ រស់នៅផ្ទះកើតហេតុ ។

តាមប្រភពព័ត៌មានបានឱ្យដឹងថា​ មុនពេលកេីតហេតុខណៈម្ចាស់នៅខាងក្រៅបន្ទប់ស្រាប់តែឃេីញមានផ្សែងហុយចេញពីក្នុងបន្ទប់ដេក​ ពេលនោះក៏នាំគ្នាចូលទៅមេីលក៏ឃេីញមានអណ្តាតភ្លេីងឆេះយ៉ាងសន្ធោសន្ធៅ​ ទេីបឆោឡោឡេីងផ្អេីលដល់អ្នកជិតខាងនាំគ្នាយកបំពង់ពន្លត់អគ្គិភ័យនិងដងទឹកមកពន្លត់​ និងអ្នកខ្លះរាយការណ៍ទៅអាជ្ញាធរមានសមត្ថកិច្ចរួមទាំងក្រុមមន្ត្រីបង្ការនិងពន្លត់អគ្គិភ័យមកអន្តរាគមន៍ភ្លាមៗ។ 

ក្រោយពីទទួលបានព័ត៌មានភ្លាមកងសង្គ្រោះនិងរុករក៧១១​ កងពលតូចលេខ៧០​ បានចេញរថយន្តពន្លត់អគ្គិភ័យទៅអន្តរាគមន៍ភ្លាមៗ​ តែមិនបានប្រេីប្រាស់ទឹកនោះទេ​ ដោយសារតែពលរដ្ឋជួលពន្លត់ទាន់ពេលវេលា។ 

សមត្ថកិច្ចបញ្ជាក់ថា​ មូលហេតុនៃការឆាបឆេះនោះបណ្តាលមកពីឆ្លងចរន្តអគ្គិសនី​ ដោយខូចខាតទ្រព្យសម្បត្តិមួយចំនួន​៕

ដោយ៖ សុខាសែនជ័យ