សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅថ្ងៃសុក្រ ទី១៩ ខែមករា ឆ្នាំ២០២៤ នៅវិមានរដ្ឋសភានៃព្រះរាជាណាចក្រកម្ពុជា គណៈកម្មការជ្រើសរើស ដឹកនាំដោយ លោក កែប ជុតិមា ប្រធានគណៈកម្មការទី៤ នៃរដ្ឋសភា និងអនុប្រធានគណៈកម្មការអប់រំ ទំនាក់ទំនង និងវប្បធម៌ នៃក្រុមសភាជាតិកម្ពុជា នៃសភានិយាយភាសាបារាំង បានសម្ភាសផ្ទាល់មាត់ជ្រើសរើសយកជ័យលាភីចំនួន២នាក់ (ប្រុស១នាក់ ស្រ្តី១នាក់) ក្នុងចំណោមបេក្ខជន បេក្ខនារី ចំនួន៨នាក់ ដែលត្រូវបានជ្រើសរើសដំណាក់កាលទី១ដោយក្រសួងអប់រំ យុវជន និងកីឡា ដើម្បីទៅចូលរួមមហាសន្និបាតសភាយុវជននៃសភានិយាយភាសាបារាំង (PFJ) លើកទ១០ ដែលនឹងប្រព្រឹត្តទៅនៅទីក្រុងម៉ុងរ៉េអាល់ នៃប្រទេសកាណាដា ចាប់ពីថ្ងៃទី៤ ដល់ថ្ងៃទី៩ ខែកក្កដា ឆ្នាំ២០២៤។
ប្រធានបទចំនួន៤ដែលនឹងត្រូវលើកយកមកពិភាក្សានាមហាសន្និបាត PFJ លើកទី១០ នាឆ្នាំនេះគឺ៖
១.ការប្រយុទ្ធប្រឆាំង នឹងអថាវរភាពក្នុងមជ្ឈដ្ឋានយុវភាព (La lutte contre la précarité parmi la jeunesse)
២.ការជំរុញប្រជាប្រិយភាពនិងការប្រើប្រាស់ភាសាបារាំងជាផ្លូវការនៅសតវត្សទី២១ (La promotion des usages officiels et populaires de la langue française au XXIème siècle)
៣.ការគ្រប់គ្រងដែនសកម្មភាព របស់ អ្នកមាន ឥទ្ធិពល (L’encadrement de l’activité des influenceurs)
៤.ជំរុញកាតព្វកិច្ច ពលរដ្ឋរបស់យុវជនក្នុងជីវិតពិតប្រាកដជាជាងក្នុងជីវិតលើបណ្តាញសង្គម (Favoriser l’engagement civique des jeunes dans la vie réelle plutôt que sur les réseaux sociaux)។
វេទិកានេះ ប្រារព្ធធ្វេីឡើងរៀងរាល់២ឆ្នាំម្តង ស្របពេលជាមួយគ្នានឹងមហាសន្និបាតសភានិយាយភាបារាំង នៅក្នុងបណ្តាប្រទេសជាសមាជិកAPF។
សូមបញ្ជាក់ថា សភាយុវជននៃសភានិយាយភាសាបារាំង(Parlement Francophone des Jeunes-PFJ) ត្រូវបានបង្កើតឡើងនាកិច្ចប្រជុំកំពូលថ្នាក់ប្រមុខរដ្ឋ ប្រមុខរដ្ឋាភិបាលនៃប្រទេសនិយាយភាសាបារាំង នៅទីក្រុងម៉ុងតុង(Moncton) នាខែកញ្ញា ឆ្នាំ១៩៩៩។ សភាយុវជន នៃប្រទេសនិយាយភាសាបារាំង មានគោលបំណងលើកកម្ពស់លទ្ធិប្រជាធិបតេយ្យនៃភាពជាអ្នកតំណាង និងលើកកម្ពស់ចំណេះដឹងផ្នែកនីតិបញ្ញត្តិរបស់យុវជនដែលមកពីមជ្ឈដ្ឋាននានាក្នុងបណ្តាប្រទេសនិយាយភាសាបារាំង តាមរយៈការដើរតួជាសមាជិកសភា។ លើសពីនេះទៀត PFJ ក៏ផ្ដោតលើការអភិវឌ្ឍ ការបណ្តុះបណ្តាលពលរដ្ឋ និងពង្រឹងសាមគ្គីភាពរវាងយុវជននៃប្រទេសនិយាយភាសាបារាំង។
អគ្គលេខាធិការដ្ឋានរដ្ឋសភា នឹងប្រកាសលទ្ធផលស្តីពីការជ្រើសរើសផ្តាច់ព្រ័ត្រនេះ នៅដើមសប្តាហ៍បន្ទាប់ ៕
ដោយ ៖ សិលា
