សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅទីស្តីការក្រសួង នាព្រឹកថ្ងៃសុក្រ ៩កើត ខែ បុស្ស ឆ្នាំថោះ ព.ស.២៥៦៧ ត្រូវនឹងថ្ងៃទី១៩ ខែមករា ឆ្នាំ២០២៤ លោកថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញជាអធិបតីភាពក្នុងការប្រគល់-ទទួល“ដ្រូន Mavic 3E និងឧបករណ៍វាស់ស្ទង់បាតទន្លេ(Bathymetric)” ដែលជាជំនួយរបស់ក្រុមហ៊ុនចិន Guang Dong និងបិទវគ្គបណ្តុះ បណ្តាលស្តីពីការប្រើប្រាស់សម្រាប់ការងារវាស់ស្ទង់បម្រើឱ្យវិស័យធនធានទឹកដល់មន្ត្រីនាយកដ្ឋានជំនាញពាក់ព័ន្ធ និងមន្ទីររាជធានី-ខេត្តទាំង២៥។
ថ្លែងក្នុងអង្គពិធី ឯកឧត្តមរដ្ឋមន្ត្រីមានប្រសាសន៍លើក ឡើងថាគោលបំណងសំខាន់នៃការប្រគល់ឧបករណ៍នាពេលនេះគឺដើម្បីបំពាក់នូវឧបករណ៍វាស់ស្ទង់បែបទំនើបសម្រាប់បម្រើឱ្យការងារវិស័យធនធានទឹក និងបង្កើនចំណេះជំនាញបន្ថែមទៀតដល់មន្ត្រីរបស់ក្រសួង និងមន្ត្រីដែលមកពីបណ្តាមន្ទីររាជធានី-ខេត្ត អំពីការប្រើប្រាស់ដ្រូនសម្រាប់ហោះផ្តិតយករូបភាពបច្ចុប្បន្នភាពពីលើអាកាស ដែលជាបច្ចេកវិទ្យាទំនើបងាយស្រួលក្នុងការវាស់ស្ទង់ ក៏ដូចជាការកំណត់ព្រំអាងទឹក ហេដ្ឋារចនា សម្ព័ន្ធសំណង់ការងារទឹក បង្កើតបានជាផែនទីដែលមានរូបភាពបច្ចុប្បន្នភាពច្បាស់លាស់ជាមួយនឹងខ្សែកម្រិតកម្ពស់ដី ជាពិសេសអាចហោះមើល ទីតាំងមួយ ចំនួនដែលពិបាកក្នុងការធ្វើដំណើរទៅដល់។
លោករដ្ឋមន្ត្រីមានប្រសាសន៍ថា តាមរយ:វគ្គបណ្តុះ បណ្តាលដ៏មានសារសំខាន់ពេញមួយថ្ងៃកាលពីម្សិល មិញ ការប្រគល់-ទទួល “ដ្រូន Mavic 3E និងឧបករណ៍វាស់ស្ទបាតទន្លេ(Bathymetric)” នាព្រឹកនេះគឺពិតជាបានចូលរួមចំណែកយ៉ាងសំខាន់ ក្នុងបរិបទថ្មីនៃការអនុវត្តយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដែលបានកំណត់យកអាទិភាពគន្លឹះចំនួន៥ គឺមនុស្សផ្លូវ ទឹកភ្លើង និងបច្ចេកវិទ្យា ស្របតាមគោលនយោបាយរដ្ឋាភិបាលឌីជីថលកម្ពុជា ឆ្នាំ២០២២-២០៣៥ និងក្របខណ្ឌគោលនយោបាយសេដ្ឋកិច្ច និងសង្គមឌីជីថល ឆ្នាំ ២០២១-២០៣៥ ឆ្ពោះទៅសម្រេចបាននូវចក្ខុវិស័យកម្ពុជាឆ្នាំ២០៣០ និងចក្ខុវិស័យកម្ពុជាឆ្នាំ២០៥០។
ក្នុងឱកាសនេះដែរលោករដ្ឋមន្ត្រីបានរម្លឹកទៅអតីតកាលនាពេលដែលមិនទាន់មានដ្រូន និងឧបករណ៍បច្ចេក វិទ្យាទំនើបនេះថា មន្រ្តីបច្ចេកទេសក្រសួង និងបណ្តាមន្ទីរធនធានទឹក និងឧតុនិយមរាជធានី-ខេត្តទាំង២៥ ត្រូវកាន់ឧបករណ៍ក្តារម៉ែត្រចុះទៅវាស់វែងជាក់ស្តែងដោយដៃផ្ទាល់ ហើយពេលខ្លះមធ្យោបាយ ធ្វើដំណើរមិនអាចចូលទៅដល់ត្រូវធ្វើដំណើរថ្មើរជើងក្នុងចម្ងាយឆ្ងាយ និងចំណាយពេលវេលាយូរក្នុងការប្រមូលទិន្នន័យ។
លោករដ្ឋមន្ត្រីបានបញ្ជាក់ថា ការធ្វើទំនើបកម្មវិស័យធនធានទឹកនឹងជួយបង្កើននូវសមត្ថភាពមន្ត្រីជំនាញបន្ថែមទៀត ក្នុងការជួយគ្រប់គ្រងប្រព័ន្ធធារាសាស្ត្រ និងការងារទន្លេ តាមរយ:ឧបករណ៍ទំនើបដែលបានចែកជូននេះ ដើម្បីយកទៅប្រើប្រាស់ក្នុងការបង្ហោះផ្តិតយករូប ភាពបច្ចុប្បន្នភាពពីលើអាកាសយកមកផ្គុំបញ្ចូលគ្នាតាម រយៈការប្រើប្រាស់កម្មវិធី(Software) មួយចំនួនទៀតដែលជាបច្ចេកវិទ្យាទំនើបងាយស្រួលចំណេញ ពេល វេលា វាស់ស្ទង់បាតទន្លេ ព្រមទាំងច្រាំងនៅផ្នែកខាងលើផ្ទៃទឹក កំណត់ទំហំព្រំអាងទឹក និងវិសាលភាពហេដ្ឋា រចនាសម្ព័ន្ធប្រព័ន្ធធារាសាស្ត្រ អាចផលិតជាផែនទីដែលមានរូបភាពបច្ចុប្បន្នភាពច្បាស់កម្រិតលម្អៀងតូច ជា មួយនឹងខ្សែកម្រិតកម្ពស់ដី សម្រាប់ប្រើជាមូលដ្ឋាន និងទឡ្ហីករណ៍ច្បាស់លាស់ដោយឈរលើបទដ្ឋានបច្ចេកនទេសត្រឹមត្រូវ ក្នុងការគ្រប់គ្រង និងអភិរក្សនូវរាល់ហេដ្ឋា រចនាសម្ព័ន្ធធារាសាស្រ្ត និងធនធានទឹកទាំងអស់ដែលជាទ្រព្យសម្បត្តិសាធារណៈរបស់រដ្ឋ។
លោករដ្ឋមន្រ្តីបានថ្លែងអំណរគុណយ៉ាងជ្រាលជ្រៅដល់ក្រុមហ៊ុនចិន Guang Dong និងបានបង្ហាញនូវការជឿ ជាក់យ៉ាងមុតមាំថា ឧបករណ៍ និងចំណេះដឹងដែលទទួលបាននាពេលនេះនឹងបានជួយបង្កើននូវប្រសិទ្ធនភាពការងារ ជាមួយនឹងការអនុវត្តឱ្យបានត្រឹមត្រូវ និងចំគោលដៅ ដើម្បីបម្រើផលប្រយោជន៍ឱ្យវិស័យធនធាននទឹក ដែលក្រសួងបានដាក់ជូន កាន់តែមានភាពរីកចម្រើន និងទទួលបានប្រសិទ្ធផលខ្ពស់បន្ថែមទៀត។
ជាចុងក្រោយលោករដ្ឋមន្ត្រីបានផ្តាំផ្ញើដល់នាយកដ្ឋានជំនាញពាក់ព័ន្ធ និងបណ្តាមន្ទីររាជធានី-ខេត្តទាំង២៥ ត្រូវយកចិត្តទុកដាក់ថែរក្សានូវឧបករណ៍នេះ ដើម្បីបម្រើប្រយោជន៍សាធារណ:បានយូរអង្វែងផងដែរ៕
ដោយ៖ សូរិយា
