សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ដោយអនុវត្តតាមទិសដៅការងាររបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ មន្រ្តីនគរបាលខណ្ឌទាំង១៤ បន្តចុះត្រួតពិនិត្យរដ្ឋបាលតាមបន្ទប់ជួល និងផ្សព្វផ្សាយគោលនយោបាយភូមិ-សង្កាត់ មានសុវត្ថិភាព។
ជាក់ស្ដែងលោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ នៅថ្ងៃទី២០ ខែមករា ឆ្នាំ២០២៤ បានចាត់ឱ្យលោកនាយប៉ុស្តិ៍នគរបាលរដ្ឋបាលក្រាំងធ្នង់ ដឹកនាំមន្ត្រីក្រោមឱវាទ ចុះត្រួតពិនិត្យរដ្ឋបាលតាមបន្ទប់ជួល និងផ្សព្វផ្សាយគោលនយោបាយភូមិ-សង្កាត់ មានសុវត្ថិភាព និងផលប៉ះពាល់នៃការប្រើប្រាស់សារធាតុញៀន ស្ថិតនៅភូមិជាងទង សង្កាត់ក្រាំងធ្នង់ ខណ្ឌសែនសុខ។
ជាមួយគ្នានេះ នៅតាមបណ្តាអធិការដ្ឋាននគរបាលខណ្ឌទាំង១៤ ក៏បានពង្រឹងអនុវត្តភារកិច្ចការងារបម្រើសេវាសាធារណៈជូនប្រជាពលរដ្ឋ ជាពិសេសសេវាលើការងារផ្តល់អត្តសញ្ញាណប័ណ្ណ សៀវភៅគ្រួសារ(ក៤) សៀវភៅស្នាក់នៅ(ក២) នៅក្នុងនោះនៅថ្ងៃទី១៩ ខែមករា ឆ្នាំ២០២៤ បានផ្តល់សេវាធ្វើអត្តសញ្ញាណប័ណ្ណ ចំនួន២១៤នាក់ (ផ្តល់ឡើងវិញ ចំនួន១២៧នាក់ និងផ្តល់ថ្មីចំនួន៨៧នាក់), សៀវភៅស្នាក់នៅថ្មី ចំនួន២២គ្រួសារ, ទុតិយតាសៀវភៅស្នាក់នៅ ចំនួន៤២គ្រួសារ, សៀវភៅគ្រួសារថ្មី ចំនួន២៣គ្រួសារ និងទុតិយតាសៀវភៅគ្រួសារ ចំនួន០៦គ្រួសារ។
ចំណែកលោកវរសេនីយ៍ឯក នេត ស៊ីថុន អធិការនគរបាលខណ្ឌ៧មករា បានចាត់ឲ្យលោកនាយប៉ុស្តិ៍នគរបាលរដ្ឋបាលមនោរម្យ សហការជាមួយកម្លាំងជំនាញផ្នែកប្រឆាំងគ្រឿងញៀន ដឹកនាំមន្ត្រីក្រោមឱវាទ ចុះផ្សព្វផ្សាយពីផលប៉ះពាល់នៃការប្រើប្រាស់សារធាតុញៀន និងគោលនយោបាយភូមិ-សង្កាត់ មានសុវត្ថិភាព ដល់ប្រជាពលរដ្ឋ នៅចំណុចច្រកឌឿងហែម ផ្លូវ១២៨ ភូមិ០៨ សង្កាត់មនោរម្យ ខណ្ឌ៧មករា។
ដោយឡែកនៅថ្ងៃនេះដែរ លោកឧត្តមសេនីយ៍ត្រី យ៉ែម នៅ និងលោកវរសេនីយ៍ឯក ហ៊ុន សុជាតិ ស្នងការរង បានដឹកនាំកម្លាំងក្រុមប្រចាំបញ្ជាវេនទី៥ ចូលរួមប្រជុំជួរដើម្បីត្រៀមអន្តរាគមន៍ និងចេញល្បាតការពារសន្តិសុខ សុវត្ថិភាព ជូនប្រជាពលរដ្ឋក្នុងភូមិសាស្ត្ររាជធានីភ្នំពេញផងដែរ៕
ដោយ៖ តារា
